Boomboloshi 11 - Baibo Busansulushi Bwa Libuku Ili

¹ Jefuta wa kuGilyadi wakalinga ngushilumamba muyumu. Baishi bakalinga mbaGilyadi alimwi bakamushalila mumwanakashi mufuule.

² Gilyadi wakalinga kucite abamwi baana basankwa mbwaakashalila mumukaakwe mwiine. Baana abo ndibakakula, bakatanda Jefuta. Bakamwaambila ayi, “Taaku ca baishiwesu nceshi ukabweseewo na bakafwe mukwiinga webo uli mwaana wamuluundu.”

³ Mpomunyaawo Jefuta wakacica akushiya bamakwabo akuya mukwikala kucishi ca Tobu. Lyalo wakanyumfwana abasankwa bamwi bataaku mbobabete alimwi batanyumfwi abo bakatalika kumukonkela.

⁴ Mukuya kwanshiku bene Amoni bakaya mukulwana bene Isilaeli.

⁵ Paceebo ceeco bamaloba ba kuGilyadi bakaya mukwiita Jefuta kuTobu.

⁶ Bakaya bamwaambila ayi, “Tiya ututanjilile mukulwana bene Amoni.”

⁷ Alakwe wakabakumbula ayi, “Sa teshi ndimwe mwakantanda muŋanda ya bata ceebo cakutansuna? Ino ono inga mwesa buyani kuli ndime ndimwabona ayi muli mumapensho?”

⁸ Abalo bakakumbula ayi, “Twesa kuli ndiwe cino ciindi ceebo tulisuni kwaamba ayi utanjilile bashilumamba boonse mukulwana bene Amoni, lyalo ulaakuba mutanjilili pabene Gilyadi boonse.”

⁹ Lyalo Jefuta wakabaambila ayi, “Na muntole kumisheesu ayi nkalwane abene Amoni, alimwi na Mwaami Lesa akabaabe mumaansaangu, sa ncakwiila ndaakuba muleli wanu?”

¹⁰ Abalo bakakumbula ayi, “Ee, Mwaami Lesa ngokamboni wesu. Tulaakucita kweelana ambowaamba.”

¹¹ Aboobo Jefuta wakaya abamaloba abo ba kuGilyadi, mpeeke bantu bakamupa butanjilili bwa bashilumamba abuleli. Lyalo Jefuta wakabooshaawo maswi ngaakaambila bamaloba kuMisipa kunembo lya Mwaami Lesa.

¹² Mpomunyaawo Jefuta wakatumya nkombe kumwaami wa bene Amoni ayi, “Ino ncibiibinshi ncetwamucitila, ico calengesha ayi mwise mukutulwana mucishi cesu?”

¹³ Alakwe mwaami wa bene Amoni wakakumbula ayi, “Bene Isilaeli ndibakaswa kuIjipiti bakabwesa cishi cesu kuswa kuMulonga wa Anoni kuya mukushika kuMulonga wa Jaboku akuMulonga wa Joodani. Ono amubooshe cishi cangu ici muluumuno.”

¹⁴ Lyalo Jefuta wakaboosha beshinkombe kumwaami wa bene Amoni

¹⁵ mukumukumbula ayi, “Bene Isilaeli tabakwe kubwesawo cishi ca bene Moabu nabi ca bene Amoni.

¹⁶ Bene Isilaeli ndibakaswa kuIjipiti bakeenda muluyanga kuya kulweenge Lusalala tibili akuKadeshi.

¹⁷ Kuswawaawo bakatuma nkombe kumwaami wa kuEdomu kusenga ayi beende mucishi cakwe. Sombi lakwe wakabakasha. Lyalo bakatuma nkombe kumwaami wa kuMoabu, alakwe wakabakasha. Aboobo bene Isilaeli bakekalabo muKadeshi.

¹⁸ “Ono kuswa kooko, bakapasulabo muluyanga bashinguluka cishi ca Edomu aMoabu kuya mukushika kwicwe lya cishi ca Moabu kwitala lya Mulonga wa Anoni. Bakayaka misumba yabo uko. Tabakwe kusubuka mulonga ceebo yakalinga njenyinsa ya cishi ca Moabu.

¹⁹ “Kuswawaawo bene Isilaeli bakatuma nkombe kuli Sioni mwine Amoli mwaami wa kuEshiboni, kwaamba ayi abasuminishe kwiinda mucishi cakwe pakuya kucishi cabo.

²⁰ Alakwe Sioni wakabakasha mukwiinga taakwe kubashoma. Paceebo ceeco wakaleta bashilumamba bakwe boonse akuyaka misumba kuJaasi. Lyalo bakalwana bene Isilaeli.

²¹ Mpeeke Mwaami Lesa, Lesa wa bene Isilaeli wakaaba Sioni abashilumamba bakwe boonse mumaansa a bene Isilaeli. Aboobo bene Isilaeli bakabwesa cishi coonse ca bene Amoli bakalinga kwikala mucishi ico.

²² Bakabwesa cishi coonse kuswa kuMulonga wa Anoni kumalenge kuya kuMulonga wa Jaboku kumatwa. Kuswa kooko cakaya mukupolela kuluyanga kwicwe tibili akuMulonga wa Joodani kumbo.

²³ “Lyalo Mwaami Lesa, Lesa wa bene Isilaeli wakatanda bene Amoli kwaamba ayi bantu bakwe babwese cishi cabo. Ono webo inga twakupetanshi cishi ico?

²⁴ Koshiite acishi ico cakakupa Kemoshi lesa wako. Aswebo tunanooshiite aceeco cakatupa Mwaami Lesa, Lesa wesu.

²⁵ Sa webo ulicite nkusu kwiinda Balaki mwanaakwe Sipo mwaami wa kuMoabu? Sa mwaami uyo wakaambanaawo abene Isilaeli, nabi kulwanaabo?

²⁶ Bene Isilaeli bakekala kuEshiboni amishi ishingulukite, Alowa amishi ishingulukite amandabala anene oonse ali muya Mulonga wa Anoni myaaka ili myaanda yotatwe. Ceebonshi tookwe kubanyaya muciindi ico?

²⁷ Nebo nshikwe kukubishishaawo, sombi webo utoombishisha mukuyanda kundwana. Mwaami Lesa, moomboloshi, aaomboloshe akwishiba ulubite pakati ka bene Isilaeli abene Amoni.”

²⁸ Nacibi boobo mwaami wa bene Amoni wakasuula makani akaamba Jefuta.

²⁹ Mpomunyaawo Mushimu wa Mwaami Lesa wakesa pali Jefuta. Lyalo wakeenda muGilyadi amucishi ca bene Manase. Kuswawaawo wakaboolela kuMisipa mucishi ca Gilyadi ngooyo kuAmoni.

³⁰ Mpeeke Jefuta wakashomesha cakulumbila kuMwaami Lesa ayi, “Na mukaabe bene Amoni mumaansaangu,

³¹ woonse uyo weshi akataangune kuswa muŋanda yangu akuncinsha kunshila ndaakuswa kunkondo, ndaakumubenga ayi ngumulambu wakutenta kuli ndimwe.”

³² Mpomunyaawo Jefuta wakasubuka mulonga akuya mukulwana abene Amoni. Mwaami Lesa wakabaaba mumaansaakwe.

³³ Wakanyonyoola mandabala makumi obilo. Wakatalikila kuAlowa waya kufwaafwi akuMiniti akuya mukushika akuAbelo Kelamimu. Wakacaya bantu baanji, aboobo bene Amoli bakakomwa kubene Isilaeli.

Mwanaakwe Jefuta mwanakashi

³⁴ Jefuta ndyaakaboolela kumishaabo kuMisipa, mwanaakwe mwanakashi wakaswa muŋanda akumucinsha kunshila keesa bushana akulisha musebe. Uyo wakalinga ngomwaana eenka ngobakalinga kucitebo.

³⁵ Ono ndyaakamubona, wakakwamoona cakufwala cakwe akulila ayi, “Maawe omwanaangu wampeensha ceebo ndakashomesha cakulumbila kuMwaami Lesa, ono inga nshikoonshi kuleka kucita ncendakashomesha.”

³⁶ Mpeeke mwanaakwe wakamukumbula ayi, “Na mwakashomesha Mwaami Lesa, amucite kweelana ambomwakashomesha. Ceebo Mwaami Lesa waaba bene Amoni mumaansaanu mukuboosha cishole.”

³⁷ Lyalo wakasenga baishi ayi, “Ntoosengakobo cintu comwi amundekeleleeko kwamyeenshi yobilo nyindaane mutulundu abeensuma akuungumana ceebo ntoofwa kaantana kweebwaawo.”

³⁸ Wakamusuminisha kuya myeenshi yobilo. Wakaya ababye mutulundu mukuungumana ceebo cakufwa kaatana kweebwaawo.

³⁹ Myeenshi yobilo iyo ndiyakeenda, wakesa kuli baishi. Lyalo baishi bakacita kweelana ambobakashomesha cakulumbila kuMwaami Lesa. Aboobo wakafwa kaalibo mooye utana kukumanaawo amusankwa. Apa mpopakaswa cilabo ca bene Isilaeli

⁴⁰ cakwaamba ayi mwaaka amwaaka banakashi bacikula bwangu kabaya mukuungumanina mwanaakwe Jefuta mwanakashi mwine Gilyadi kwanshiku shone.