Boomboloshi 10 - Baibo Busansulushi Bwa Libuku Ili

Tola

¹ Abimeleki ndyaakafwa, Tola mwanaakwe Puwa, mwishikulu wakwe Dodo wa mumukowa wakwe Isaka wakesa mukufuna Isilaeli. Wakalinga kwikala kuShamiya mucishi ca tulundu ca Efuleemu.

² Wakaba moomboloshi wa bene Isilaeli kwamyaaka makumi obilo ayotatwe. Mpeeke wakafwa akubikwa kweenka kuShamiya.

Jeya

³ Tola ndyaakafwa kwakesa Jeya wa kuGilyadi. Jeya wakalinga moomboloshi wa bene Isilaeli kwamyaaka ili makumi obilo ayobilo.

⁴ Wakalinga kucite baana basankwa makumi otatwe. Womwi awomwi wakalinga kutanta mbongolo yakwe. Bakalinga kucite mandabala makumi otatwe mucishi ca Gilyadi ayo abobulya aciitwa ayi mandabala akwe Jeya.

⁵ Mpeeke Jeya wakafwa akubikwa kuKamoni.

Jefuta

⁶ Mpeeke bene Isilaeli bakabisha alimwi pameenso aMwaami Lesa ceebo bakatalika kusebensela baBaali aba Ashitaloti. Bakasebensela abalesa ba kuSilya, Sidoni, Moabu, Amoni alimwi aba kuFilisitiya. Bakafutatila Mwaami Lesa akucileka kumusebensela.

⁷ Paceebo ceeci Mwaami Lesa wakakalalila bene Isilaeli akubaaba mumaansa abene Filisiti aa bene Amoni.

⁸ Bene Filisiti abene Amoni bakapensha akucobola bene Isilaeli bakalinga kwikala kwicwe lya Mulonga wa Joodani muGilyadi cishi ca bene Amoli. Bakabapensha kwamyaaka likumi amyaaka yosanwe alimwi ayotatwe.

⁹ Lyalo bene Amoni bakasubuka Joodani akuya mukulwana bamumukowa wakwe Juda, Benjameni awakwe Efuleemu. Ncakwiila bene Isilaeli bakapenga abuumbi.

¹⁰ Mpomunyaawo bene Isilaeli bakalilila Mwaami Lesa ayi, “Twamubishisha mukwiinga twakakaka mwebo nobaLesa besu akutalika kusebensela baBaali.”

¹¹ Alakwe Mwaami Lesa wakabakumbula ayi, “Sa nshikwe kumufuna kubene Ijipiti, bene Amoli, bene Amoni, bene Filisiti,

¹² bene Sidoni, bene Ameleki abene Maoni abo bakalinga kumupensha kalekale? Mwebo ndimwakandilila ayi mucaafwe, sa nshikwe kumucafwa?

¹³ Sombi nebo nendakamucafwa mwakamfutatila akutalika kusebensela balesa bamwi. Aboobo ndakaaka, teshi mufuneewo alimwi, sobwe.

¹⁴ Kamuya mulilile balesa mbomwakalisalila. Balesa abo mbobeelete kumucafwa muciindi ca mapensho.”

¹⁵ Lyalo bene Isilaeli bakaambila Mwaami Lesa ayi, “Ncakwiila twakamubishisha. Amucite mbuli mbomusuni kuli ndiswe, sombi lwasunubo twamusenga ayi mutucaafwe.”

¹⁶ Kuswawaawo bakacileka kukonkela balesa bamwi akutalika kusebensela Mwaami Lesa alimwi. Aboobo wakabafwita nkumbu kumapensho ngobakalinga kucite.

¹⁷ Mpeeke bashilumamba ba bene Amoni bakalibambila kulwana akuyaka misumba kuGilyadi. Bene Isilaeli abalo bakabungana akuyaka misumba yabo kuMisipa.

¹⁸ Mpeeke bamatanjilili ba bene Isilaeli bakeepushanya ayi, “Ino ngani weshi atutanjilile pakulwana bene Amoni? Uyo weshi atutanjilile ingayi ngweshi akatanjilile abantu boonse muGilyadi.”