Boomboloshi 1 - Baibo Busansulushi Bwa Libuku Ili

Bene Juda abene Simyoni mbobakacata Adonibeseki

¹ Ono Joshuwa ndyaakafwa, bene Isilaeli bakeepusha Mwaami Lesa ayi, “Ino mbaani pakati kesu beshi bataangune kuya mukulwana abene Kenani?”

² Mwaami Lesa wakabakumbula ayi, “Bene Juda mbeshi bataangune kuya, ceebo cishi ndacaaba kale mumaansaabo.”

³ Lyalo bene Juda bakaambila bamakwababo bene Simyoni ayi, “Katiya tukalwane bene Kenani mucishi ico ncitwakapekwa. Pesule aswebo ndyeshi tukamucafweko kulwanina cishi canu.” Aboobo bene Simyoni bakayaabo.

⁴ Bene Juda ndibakaya mukulwana, Mwaami Lesa wakaaba bene Kenani alimwi abene Pelisi mumaansaabo. Bakacaya bantu bali 10,000 kuBeseki.

⁵ Anu uko nkobakacana mwaami Adonibeseki akulwanaakwe alimwi akukoma bene Kenani abene Pelisi.

⁶ Adonibeseki wakacica, sombi bakamutandaanya akumweensha. Lyalo bakamusutula shikumo shinene sha kumaansa akumyeendo.

⁷ Mpeeke Adonibeseki wakaamba ayi, “Ndakasutula shikumo shinene sha kumaansa akumyeendo sha bamaami bali makumi osanwe aobilo abo mbondakaambila kunoobweselela busekele panshi lya tebulu lyangu. Ono Lesa wambooshesha cishole.” Kuswawaawo bakamutola kuJelusalemu uko nkwaakaya mukufwita.

Bene Juda mbobakakoma Jelusalemu aEbuloni

⁸ Mpeeke bene Juda bakalwana ndabala ya Jelusalemu. Bakacaya bantu bakalinga kwikalaamo akwiitenta.

⁹ Pesule bakaya mukulwana abene Kenani abo bakalinga kwikala mucishi ca tulundu, ca kumalenge aca mushinyika.

¹⁰ Kuswawaawo bene Juda bakaya mukulwana bene Kenani bakalinga kwikala mundabala ya Ebuloni, iyo kalekale yakalinga kwiitwa ayi Kilyati Aba. Uko bakaya mukukoma bamumukowa wakwe Sheshayi, Ayimani alimwi aTalumayi.

Otiniyelo mbwaakakoma ndabala ya Debeli

¹¹ Mpomunyaawo bene Juda bakaya mukulwana ndabala ya Debe, iyo yakalinga kwiitwa ayi Kilyati Sefa kalekale.

¹² Mpeeke Kalebu wakaamba ayi, “Uyo weshi akakome Kilyati Sefa ndaakumupa mwanaangu Akisa ayi eebe.”

¹³ Mpeeke Otiniyelo mwanaakwe Kenasi mukwabo Kalebu wakakoma ndabala inene iyo, alakwe Kalebu wakeebesha Akisa mwanaakwe kuli nguwe.

¹⁴ Ono bushiku bwa bwiinga Otiniyelo wakaambila mukaakwe ayi asenge muunda kuli baishi. Ingayi mwanaakwe aseluke pambongolo, Kalebu wakeepusha ncaakalinga kusuni.

¹⁵ Mwanaakwe wakakumbula ayi, “Ndisuni lucafwo kuli ndimwe. Cishi ncemwakampa cili muluyanga lwakumalenge, ono amumpe atuntupu.” Aboobo Kalebu wakamupa tuntupu twa peculu atwa muunshi.

Kukoma kwa bene Juda abene Benjameni

¹⁶ Ono bene Keni bamulunyungu lwa mupongoshi wakwe Mose bakaya abene Juda kuswa kuJeliko, ndabala ya tupukupuku. Bakaya muluyanga lwa Juda kumalenge kufwaafwi aAladi uko nkobakaya mukwikala abene Amaleki.

¹⁷ Mpeeke bene Juda pantu pomwi abene Simyoni bamakwababo bakaya mukukoma bene Kenani bakalinga kwikala kuSefati. Lyalo bakanyonyoola ndabala iyo cakumaninina, mpeeke bakeetumba ayi Oma.

¹⁸ Sombi tabakwe kukoma ndabala inene ya Gasa amisena yakalinga kwiishingulukite, ya Ashikeloni amisena ya nguwo aya Ekiloni amisena ya nguwo.

¹⁹ Nakubi boobo Mwaami Lesa wakalingaabo. Aboobo bakakonsha kukoma cishi ca tulundu. Ono bakaalilwa kukoma bantu bakalinga kwikala mushinyika mukwiinga bakalinga kucite shikoci sha nshimbi.

²⁰ Lyalo Kalebu wakapekwa ndabala ya Ebuloni kweelana abwakaamba Mose. Wakatandaamo shipani shotatwe sha mumukowa wakwe Anaki.

²¹ Sombi bene Benjameni balo tabakwe kutandaanya bene Jebusi bakalinga kwikala muJelusalemu. Aboobo kushikila asunu bene Jebusi balekala abene Benjameni.

Bene Efuleemu abene Manase mbobakakoma ndabala ya Betelo

²² Ono mukowa wakwe Efuleemu awakwe Manase bakaya mukulwana ndabala inene ya Betelo. Mwaami Lesa wakalingaabo.

²³ Mpomunyaawo bakatuma basenseshi kuBetelo. Kalekale ndabala iyo yakalinga kwiitwa ayi Lusi.

²⁴ Mpeeke basenseshi abo bakabona musankwa wakalinga kuswa mundabala iyo akumwaambila ayi, “Tutondeshe mbweenga twenjila mundabala, aswebo tutookucitila shibotu.”

²⁵ Aboobo wakabatondesha bwakwinjila. Lyalo bene Efuleemu abene Manase bakacaya bantu boonse kushiyakobo musankwa uyo abamuŋanda yakwe.

²⁶ Lyalo muntu uyo wakaya kucishi ca bene Iti uko nkwaakayaka ndabala akwiitumba ayi Lusi. Asunu ndabala iyi mboiciitwa.

Bantu abo bene Isilaeli mbobakaalilwa kutanda

²⁷ Ono mukowa wa bene Manase taukwe kutanda bantu bakalinga kwikala mundabala ya Beti Shani, Tanaki, Doli, Ibulimu, Megido amishi yakalinga kwaashingulukite. Aboobo bene Kenani bakatolelela kwikalaamo.

²⁸ Sombi bene Isilaeli ndibakaba bunene ankusu, bakacikonsha kusebensesha bene Kenani cabusha, nakubi kwaamba ayi bakaalilwa kubatandaamo boonse.

²⁹ Abalo bamumukowa wakwe Efuleemu tabakwe kutanda bene Kenani ba kuGesa. Aboobo bene Kenani abo bakatolelela kwikala ambabo.

³⁰ Abalo bamumukowa wakwe Sebuluni tabakwe kutanda bamundabala ya Kitiloni aya Naaloli. Aboobo bene Kenani abo bakatolelela kwikala ambabo, sombi bakalinga kubasebensesha cabusha.

³¹ Abalo bamumukowa wakwe Asha tabakwe kutanda bantu bakalinga kwikala mundabala ya Ako, Sidoni, Aalabu, Akisibu, Eliba, Afeki aya Lewobu.

³² Bene Asha bakatolelela kwikala abene Kenani mukwiinga tabakwe kubatandaamo.

³³ Abalo bamumukowa wakwe Nafutali tabakwe kutanda bantu bakalinga kwikala mundabala ya Beti Shemeshi aya Beti Anati. Bene Nafutali bakatolelela kwikala abene Kenani, sombi bakalinga kubasebensesha cabusha.

³⁴ Bene Amoli bakashinkila bene Dani mucishi ca tulundu akubakasha kulongela mushinyika.

³⁵ Bene Amoli bakatolelela kwikala muKalundu ka Elesi, mundabala ya Aijaloni aya Shaalubimu. Sombi bamumukowa wakwe Efuleemu awakwe Manase ndibakaba bunene ankusu, bakabasebensesha cabusha.

³⁶ Nyinsa ya bene Amoli yakalinga kutalikila mumwinjililo wa kuAkilabimu kuya mukushika kuSela.