Bene Loma 8 - Baibo Busansulushi Bwa Libuku Ili

Bwikaalo bwa munkusu sha Mushimu Usalashi

¹ Ono abo bashoma muli Jesu Klistu, Lesa taabapi mulandu.

² Ceebo kweendeleshekwa aMushimu Usalashi uko kuleta buumi kwiinda muli Klistu Jesu, kwaŋangulula kumulawo wa bubi uyo uleta lufu.

³ Isho Milawo nsheyakaalilwa kucita ceebo buumi bwa buntu bwakeemana nkusu, Lesa wakashicita. Wakacita boobo kwiinda mukutuma Mwanaakwe, uyo wakesa mucishi ca panshi mubuntu bweenka mbuli ndiswe kwaamba ayi akome bubi.

⁴ Lesa wakacita ceeco kwaamba ayi swebo sotweendeleshekwa aMushimu Usalashi, tucite shoonse shiluleme kweelana aMilawo, kuteshi busuni mibili yesu.

⁵ Ceebo abo bekala mubuntu baleendeleshekwa asheesho shiyanda mibili yabo. Sombi abo beendeleshekwa aMushimu Usalashi balacita sheesho shisuni Mushimu Usalashi.

⁶ Ono kusunisha bunene shiyanda mubili kulaletela lufu, sombi kusunisha shiyanda Mushimu Usalashi kulaletela buumi butamaani alimwi aluumuno.

⁷ Aboobo na muntu kaasunibo shiyanda mubili wakwe, ulaba mulwani wakwe Lesa mukwiinga taakonkeli milawo yakwe Lesa, ncakwiila inga taacikoonshi.

⁸ Nkokwaamba ayi abo bacitabo shiyanda mibili yabo, inga tabakoonshi kusangalasha Lesa.

⁹ Ono na ncakwiila Mushimu wakwe Lesa uli muli ndimwe, tamukaali kweelana abuyanda mibili yanu, sombi buyanda Mushimu. Ceebo na Mushimu wakwe Klistu tookali muli ndimwe nkokwaamba ayi tamwishi bakwe Klistu.

¹⁰ Na Klistu uli muli ndimwe, Mushimu Usalashi ulaakulengesha kwaamba ayi mube abuumi. Nakubi kwaamba ayi mibili yanu ilaakufwa ceebo ca shibiibi, Lesa wakamululamika.

¹¹ Na Mushimu wakwe Lesa uyo wakabusha Jesu Klistu kuswa kubafu uli muli ndimwe, anu Lesa eenka uyo wakabusha Klistu kuswa kubafu, ulaakubusha mibili yanu ifwa kwiinda muMushimu wakwe uli muli ndimwe.

¹² Paceebo ceeco, nobamakwesu, tatweelete kwikala buyanda mibili yesu.

¹³ Ceebo na kamwikala kweelana abuyanda mibili yanu mulaakufwa. Sombi na kwiinda muMushimu Usalashi mwacilekela limwi shoonse shibiibi nshemucita, mulaakuba abuumi butamaani.

¹⁴ Mukwiinga abo batanjililwa aMushimu wakwe Lesa, mbana bakwe Lesa.

¹⁵ Mukwiinga Mushimu ngomwakatambula toomwaaluli basha akumulenga boowa. Sombi ulamulengesha kuba bana bakwe Lesa. Ncakwiila munkusu sha Mushimu uyu tuleeta Lesa ayi, “Aba,” nkokwaamba ayi, “Ta!”

¹⁶ Mushimu wakwe Lesa wiine ulasuminishanya amyoyo yesu ayi tuli bana bakwe Lesa.

¹⁷ Ono mbotuli bana bakwe Lesa tulaakuba acoolwe kwiinda mukutambula shintu nshaabambila bantu bakwe. Peculu lya waawo tulaakupekwa pantu pomwi aKlistu isho nshaamubambila Lesa. Ono na twapenshekwa mbuli mbwaakapenshekwa Klistu, swebo tulaakutambula bulemu bweenka mbwaacite.

Mbweshi tukabe abulemu

¹⁸ Ndishinishite kwaamba ayi mapensho ngotwiindaamo taaelene abulemu Lesa mbweshi akatuyubulwite.

¹⁹ Shintu shoonse Lesa nshaakalenga shitoolindila abuumbi kuyubululwa kwa bana bakwe.

²⁰ Ceebo shilengwa shoonse shakababo anga tashicite ncito, kuteshi mukuyanda kwa nshisho, sombi kwiinda mukuyanda kwakwe Lesa. Nakubi boobo kwakalinga lushomo lwakwaamba ayi

²¹ bumwi bushiku shilengwa shiine shilaakwaangululwa kubusha bwakubola akutambula bulemu alwaanguluko bweenka mbuli bana bakwe Lesa.

²² Mukwiinga tulishi kwaamba ayi kushikila acecino ciindi, shilengwa shoonse shilapenga kusheesho shicisa bweenka mbuli walutundu mbwaapenga pakutumbuka.

²³ Ono teeshibo shilengwa sheenka shipenga boobo, sobwe. Sombi aswebo sotucite aMushimu Usalashi uli ncecipo citaanshi ico Lesa ncaakatupa, tulapenshekwa abuumbi mumyoyo. Lyoonse tulalangila ayi Lesa akatutambule mbuli bana bakwe alimwi akupulusha mibili yesu.

²⁴ Mukwiinga kwiinda mulushomo ulu twakapulushikwa. Ono na twacibona ameenso ico ncetutoolangila, sa inga katucilangilabo? Sa kuli muntu ulangila ncaabwene kale? Taaku.

²⁵ Aboobo na tutoolangila cintu ncetutabwene, tulyeelete kutolelela kulangila.

²⁶ Awalo Mushimu Usalashi ulatucafwa mukwiinga tatucite nkusu. Tatwishi mbotweelete kupaila, sombi Mushimu Usalashi ulatusengelaako kuli Lesa mumaswi ataambiki.

²⁷ Mukwiinga Lesa ulabona mumyoyo ya bantu, aboobo uleshiba shitooyanda Mushimu Usalashi. Mukwiinga Mushimu uyu ulasengelako bantu bakwe Lesa kweelana akuyanda kwakwe Lesa mwiine.

²⁸ Tulishi kwaamba ayi Lesa shintu shoonse ulasheensha kabotu kubaabo bamusuni, nkokwaamba ayi abo bantu mbwaakeeta kweelana akubamba kwakwe.

²⁹ Abo Lesa mbaakasalila limwi, wakababika palubasu kwaamba ayi bakabe anga nguMwanaakwe alimwi ayi Mwanaakwe uyo akabe mutaanshi pakati ka bamakwabo baanji.

³⁰ Ono abo Lesa mbaakabika palubasu, mbwaakeeta. Abo mbwaakeeta mbobaabo mbwaakalulamika pameenso akwe. Alimwi abo mbwaakalulamika, mbobaabo mbwaakapako bulemu bwakwe.

Lesa ulitusuni kwiinda muli Jesu Klistu

³¹ Pasheebo shoonse ishi inga twaamboonshi? Na Lesa ulatusuminisha ngani weenga watupikisha? Taaku nabi womwi.

³² Lesa wakabenga Mwanaakwe mwiine ceebo ca ndiswe soonse. Ono na taakwe kukasha Mwanaakwe kupenshekwa, inga waalilwa buyani kutupa shintu shimwi shoonse?

³³ Anu ngani weenga wapa mulandu bantu aba Lesa mbwaakasala? Taaku nabi womwi mukwiinga Lesa wakaamba kale ayi baliluleme.

³⁴ Sa kuli weenga wakonsha kubapa mulandu? Taaku nabibo womwi. Ndushinisho nabibo Klistu Jesu, uyo wakafwa akubushikwa kuswa kubafu, uli kululyo lwakwe Lesa alimwi utootwaambililaako kuli nguwe, taakoonshi.

³⁵ Ino ono nciinshi nceenga catupansaanya alusuno lucite Klistu pali ndiswe? Sa ngamapensho, makatasho, kupenshekwa, nsala, bukandu, shiloondesha nabi lufu?

³⁶ Kweelana ambokulembetwe muMalembo akwe Lesa ayi, “Lyoonse bantu balapinga kutucaya ceebo ca ndimwe alimwi bantu balatucita anga nimbelele nshebatooya mukucaya.”

³⁷ Taaku, sombi mushintu shoonse ishi shitucitikila tulakoma kwiinda muli Klistu utusuni.

³⁸ Ceebo ndishinishite kwaamba ayi taaku nceenga catupansaanya alusuno lwakwe Lesa pali ndiswe. Lufu nabi buumi, baanjelo nabi beendeleshi ba kwiculu, shintu sha cecino ciindi nabi shintu sheshi shikaboneke,

³⁹ nabi shili kwiculu nabi panshi lya cishi, taaku cilengwa nabi comwi nceenga catupansaanya alusuno lwakwe Lesa, ulo ndwaatutondesha kwiinda muli Klistu Jesu Mwaami wesu.