Bene Loma 5 - Baibo Busansulushi Bwa Libuku Ili

Lesa mbwaalulamika bantu

¹ Ono mukwiinga Lesa watululamika ceebo ca lushomo lwesu, pali luumuno pakati kakwe Lesa aswebo kwiinda muMwaami wesu Jesu Klistu.

² Mwaami wesu uyu ngowakatucalwita nshila kwiinda mulushomo kwaamba ayi Lesa atucitile luse ulo ndotubeteemo abobulya. Aboobo tulasangalala mukwiinga tulashoma ayi tulaakutambula shipo sha mubulemu bwakwe Lesa.

³ Teshi ceeco ceenka, tulasangalala amumapensho ceebo tulishi kwaamba ayi mapensho ngaaisha muntu kutaboola pesule.

⁴ Kutaboola pesule nkokuleta bwikaalo buyanda Mwaami Lesa alimwi bwikaalo ubo mbobuleta kulangila.

⁵ Akwalo kulangila uku takutulenshi nsoni ceebo Lesa ulitusuni abuumbi kwiinda muMushimu Usalashi uyo ngwaakatupa.

⁶ Katutacite nkusu, Jesu wakatufwita swebo sobamucita shibi paciindi Lesa mwiine ncaakasala.

⁷ Nciyumu abuumbi muntu kufwita muntu ululeme. Mpashi muntu inga wayumaako moyo kufwita muntu kabotu.

⁸ Sombi Lesa wakatutondesha kwaamba ayi ulitusuni abuumbi ceebo Jesu Klistu wakatufwita katucili bamucita shibi.

⁹ Ono mukwiinga twakalulamikwa kwiinda mulufu lwakwe Klistu, ncakwiila tulishi kwaamba ayi ulaakutupulusha akubukali bwakwe Lesa.

¹⁰ Twakalinga balwani bakwe Lesa, sombi wakatucita kwaamba ayi tube beshicibusanyina kwiinda mulufu lwa Mwanaakwe. Ono mbotuli beshicibusanyina, tulishinishite kwaamba ayi ulaakutupulusha ceebo ngumuumi.

¹¹ Sombi teshi ceeci ceenka, tulasangalala muli Lesa ceebo Mwaami wesu Jesu Klistu wakalengesha ayi alimwi tube beshicibusa bakwe Lesa.

Bupusano buli pali Jesu Klistu aAdamu

¹² Bubi bwakesa mucishi ca panshi ceebo ca muntu womwi alimwi bubi ubo bwakaleta lufu. Mbweeke ubo lufu lwakashika kubantu boonse mukwiinga boonse bakabisha.

¹³ Bubi bwakalinga mucishi ca panshi Lesa kaatana kupa Milawo kubantu, sombi pataapu Milawo muntu taapekwi mulandu pashibiibi isho nshaacita.

¹⁴ Ono bantu boonse bakalinga mucishi ca panshi kuswa kuciindi cakwe Adamu kushikila akuciindi cakwe Mose, bakafwa. Kwakafwa abaabo boonse batakwe kubisha bweenka bwakabisha Adamu ndyaakasotoka mulawo ngwaakapekwa aLesa. Ono Adamu wakakoshanishikwa awooyo Lesa ngwaakaamba ayi ulaakwisa.

¹⁵ Nakubi boobo bantu bobilo aba balipusene ceebo cipo cakwe Lesa taceelene acibiibi cakacita Adamu. Ndushinisho kwaamba ayi bantu baanji bakafwa ceebo ca muntu womwi uyo. Sombi luse lwakwe Lesa acipo cakwe shileendaawo mukwiinga shilaletela bantu baanji shoolwe kwiinda muluse lwakaboneka mumuntu womwi, Jesu Klistu.

¹⁶ Pali bupusano pacipo cakaswa kuli Lesa alimwi acibiibi ca muntu womwi Adamu. Ceebo Adamu ndyaakabisha linkanda lyomwibo Lesa wakaamba ayi apekwe mulandu. Sombi cipo ciswa kuli Lesa cilalulamika bantu nabi shibiibi shabo nshiinji buyani.

¹⁷ Ndushinisho kwaamba ayi lufu lwakatalika kweendelesha bantu ceebo ca muntu womwi wakabisha. Sombi cakacita Jesu Klistu, muntu womwibo, cileendaawo nkusu paceeco cakacitika ceebo cakubisha kwa muntu womwi. Aboobo bantu boonse batambula shoolwe shakwe Lesa acipo ca bululami, balaakuba abuumi bwakukoma kwiinda muli Jesu Klistu.

¹⁸ Bweenka mbuli bantu boonse mbobapekwa mulandu ceebo cakubisha kwa muntu womwi, mbweeke ubo bantu boonse bakaangululwa akupekwa buumi ceebo cakwaamba ayi muntu womwi wakacita mulimo ululeme.

¹⁹ Ncakwiila bweenka mbuli bantu boonse mbobakaba bamucita shibi ceebo cakutanyumfwila Lesa kwa muntu womwi, mbomunya ubo bantu boonse mbobalulamikwa ceebo cakunyumfwila Lesa kwa muntu womwi, Jesu Klistu.

²⁰ Lesa wakapa bantu Milawo kwaamba ayi babone kufula kwa shibiibi shabo. Nakubi boobo shibiibi ndishakafula, luse lwakwe Lesa lwakeendaawo kufula.

²¹ Ono bweenka mbuli bubi mbobwakaba ankusu akuleta lufu, alwalo luse lwakwe Lesa lwakaba ankusu mukwiinga Lesa ulalulamika bantu pameenso akwe akubaletela buumi butamaani, kwiinda muli Jesu Klistu Mwaami wesu.