Bene Loma 4 - Baibo Busansulushi Bwa Libuku Ili

Abulaamu mbwaakalulamikwa ceebo ca lushomo

¹ Ono twaambe buyani pali Abulaamu mushali wesu mukulukulu sobaJuda? Nciinshi cakacitika pacikani ici?

² Lesa naakwiinga wakalulamika Abulaamu pameenso akwe kwiinda mumilimo yakwe, naalinga kucite cakulisumpwitaawo, sombi kutaamba kuli Lesa.

³ Malembo akwe Lesa alaamba ayi, “Ceebo cakwaamba ayi Abulaamu wakashoma Lesa, aboobo Lesa wakamwaamba ayi uliluleme.”

⁴ Muntu usebensa, ulafola maali ceebo ca mulimo ngwaacita. Sombi teshi kwaamba ayi ncipo mukwiinga wakaasebensela.

⁵ Ono muntu ushomabo muli Lesa ululamika bamucita shibi, kutashoma milimo yakwe ibotu, Lesa ulamubona ayi uliluleme kwiinda mulushomo lwakwe.

⁶ Ici nceceeci Defedi ncaakaambila ayi ulicite coolwe muntu uyo Lesa ngwaalulamika pameenso akwe, kuteshi ceebo ca milimo ibotu njaacita.

⁷ Wakaamba ayi, “Balicite coolwe abo Lesa mbaalekelela shibiibi shabo, abo bacite shibiibi nshaakashiminganya!

⁸ Balicite coolwe abo Lesa mbwaateebalukili shibiibi shabo.”

⁹ Sa coolwe cakaamba Defedi cilibo kubaabo bakapalulwa beenka? Sobwe! Abalo batakwe kupalulwa balaba acoolwe, kweelana aMalembo ngotwaswa mukwaamba ayi, “Ceebo cakwaamba ayi Abulaamu wakashoma Lesa, aboobo Lesa wakamubona ayi uliluleme.”

¹⁰ Ici cakacitika Abulaamu kaatana kupalulwa, kutaamba ayi kaali wapalulwa kale.

¹¹ Pesule Abulaamu wakapalulwa ayi cibe cishibilo cakutondesha ayi Lesa wakamululamika ceebo ca lushomo lwakwe. Aboobo Abulaamu ngoishiwabo boonse abo bashoma muli Jesu. Paceebo ceeci Lesa ulabalulamika nabi tabana kupalulwa.

¹² Ngoishiwabo abo bakapalulwa abalo. Teshi ceebo cakupalulwa ceenka, sombi bali amunshila ya lushomo iyo yakalinga kwikalamo ishiwesu Abulaamu kaatana kupalulwa.

Lesa mbwaakapangana abaabo bashoma muli nguwe

¹³ Lesa wakashomesha Abulaamu abamulunyungu lwakwe kwaamba ayi cishi cilaakuba cabo. Ici tacikwe kucitika ceebo Abulaamu wakakonkela Milawo, sombi mukwiinga wakashoma Lesa. Aboobo Lesa wakamubona ayi uliluleme.

¹⁴ Nkokwaamba ayi na Lesa nshaashomesha shilatambulwa kwiinda mukukonkela Milawo, ingayi kushoma muli Lesa taaku mbokubete asheesho nshaashomesha taaku mboshibete.

¹⁵ Milawo ilalengesha Lesa kupa milandu bantu, sombi na taaku Milawo, taaku muntu weenga weesotoka.

¹⁶ Lesa wakashomesha mukwiinga Abulaamu wakamushoma kwaamba ayi bamulunyungu lwakwe Abulaamu batambule cipo muluse lwakwe. Teshi kubaabo bakonkela Milawo beenka. Sombi abaabo bashoma bwakashoma Abulaamu ceebo Abulaamu ngoishiwesu soonse sotushoma.

¹⁷ Mbweeke mbuli bwaamba Malembo akwe Lesa ayi, “Ndalengesha kwaamba ayi ube mushali wa mishobo yoonse.” Aboobo cakabota ceebo nguLesa mwiine wakashomesha. Uyu ngoLesa uyo Abulaamu ngwaakashoma, Lesa ubusha bantu kuswa kubafu alimwi ulengesha kwaamba ayi shitako shibeeko kwiinda mukusebenseshabo liswi lyakwe.

¹⁸ Abulaamu wakashoma akulangila nakubi kwaamba ayi cakalinga kuboneka anga teshi cikacitike. Aboobo wakaba mushali wa mishobo yoonse. Kweelana abwaamba Malembo akwe Lesa ayi, “Bamulunyungu lwako balaakufula mbuli nyenyeenshi.”

¹⁹ Wakalinga pafwaafwi kukwanisha myaaka mwaanda. Sombi taakwe kutyongola kushoma Lesa, nakubi kwaamba ayi mubili wakwe wakamana nkusu alakwe Sala mukaakwe kaatashali.

²⁰ Wakatolelela kushoma. Taakwe kutonsha paceeco Lesa ncaakamushomesha. Ncakwiila wakashoma cankusu akumulumbaisha.

²¹ Abulaamu wakalinga kushoma cancinencine ayi Lesa ulakonsha kucita kweelana ambwaakashomesha.

²² Nceceeco Abulaamu kwiinda mulushomo lwakwe, “Lesa wakamubona ayi uliluleme.”

²³ Maswi aya aamba ayi, “Lesa wakamubona ayi uliluleme,” taambi shapali Abulaamu eenka.

²⁴ Sombi alaamba apali ndiswe sweshi tukalulamikwe pameenso akwe Lesa ceebo ca lushomo ndotucite muli nguwe wakabusha Jesu Klistu Mwaami wesu kuswa kubafu.

²⁵ Lesa wakabenga Jesu kwaamba ayi acaikwe ceebo ca shibiibi shesu alimwi wakamubusha kuswa kubafu kwaamba ayi atululamike pameenso akwe.