Bene Loma 3 - Baibo Busansulushi Bwa Libuku Ili

¹ Sa mutooyeeya ayi baJuda kuli mbobeendawo baswamashi bakunsengwe? Mbubotunshi buli mukupalulwa?

² Muli mpindu inene abuumbi ceebo Lesa wakataanguna kupa baJuda makani akwe kwaamba ayi baalaame.

³ Ono na bamwi pakati kabo tabakwe kushomeka, sa kutashomeka kwabo inga kwalengesha Lesa alakwe kutashomeka?

⁴ Napaceyuubo! Lesa ulashomeka nabi bantu boonse mbabeshi. Mbweeke bwaamba Malembo akwe Lesa ayi, “Kulilabo na waamba, bantu balyeelete kwishiba ayi nshalushinisho. Alimwi lyoonse ulyeelete kucanikwa ayi toocite mulandu pakukoombolosha.”

⁵ Ono na kutalulama kwesu kulalengesha kubonekela patuba ayi Lesa ulacita shiluleme, inga twaamba buyani pacikani ici? Sa inga twaamba ayi Lesa taaluleme pakutoombolosha akutupa mulandu? (Apa ndaamba bweenka bwaamba bantu.)

⁶ Napaceyuubo! Na Lesa taaluleme, ino inga woombolosha buyani bantu mucishi?

⁷ Bamwi inga baamba ayi, “Na kubeca kwangu kulabonesha patuba kushomeka kwakwe Lesa akufusha bulemu bwakwe, ono inga waŋombolosha buyani ayi ndimucita shibi?”

⁸ Ino ceebonshi inga tatwaambi ayi, “Atucite shibiibi kwaamba ayi shibotu shiboneke?” Ncakwiila bantu bamwi balantukana kwiinda mukumbekesha ayi ndaamba cikani ceenka ici. Bantu abo Lesa ulaakubapa mulandu weelete.

Taaku muntu ululeme pameenso akwe Lesa

⁹ Ono nkokwaamba ayi sa swebo sobaJuda kuli mpotwiindilawo baswamashi bakunsengwe pameenso akwe Lesa? Taapuuwo, mukwiinga ndasansulula kale kwaamba ayi baJuda abaswamashi bakunsengwe boonse mbamucita shibi.

¹⁰ Bweenka bwaamba Malembo akwe Lesa ayi, “Taaku nabi womwi ululeme.

¹¹ Taaku muntu unyumfwisha shiluleme, nabi uyandoola Lesa.

¹² Bantu boonse basuula Lesa, alimwi boonse babisha, taaku nabi womwi ucita shibotu.

¹³ Myaambo yabo njabubeshi, ilacaisha. Kwiinda mumilaka yabo mbeshi kwaamba shakubeca, alimwi mumilomo yabo mulaswabo maswi abucayi, mbuli busoka bwa nsoka.

¹⁴ Milomo yabo iliswitebo mashingo abiibi abuumbi.

¹⁵ Mbantu bafwambaana kucisa akucaya babyaabo.

¹⁶ Balanyonyoola akupensha bantu kuli koonse nkobaya

¹⁷ alimwi tabacishi kwikala pantu pomwi muluumuno.

¹⁸ Tabalemeki Lesa, napaceyi.”

¹⁹ Ono tulishi kwaamba ayi shoonse shaamba Milawo shilaamba pabaabo beendeleshekwa anjiyo kwaamba ayi bakabule pakuyubila milandu Lesa njeshi akabape.

²⁰ Ceebo taaku muntu ululamikwa pameenso akwe Lesa kwiinda mukucita bwaamba Milawo. Sombi Milawo ilalengeshabo bantu kwishiba ayi babisha.

Lesa mbwaalulamika bantu

²¹ Sombi bulya Lesa wayubulula nshila njaalulamikilamo bantu pameenso akwe. Nshila iyo teekumite kunshila yakukonkela Milawo. Milawo iyi alimwi amaswi akaamba balaluki bakulukulu, shoonse shilaamba panshila iyi.

²² Nshila Lesa njaalulamikilamo bantu, nkushoma muli Jesu Klistu. Ulacita boobo kubantu boonse mukwiinga taaku bupusano buli pabaJuda abaswamashi bakunsengwe

²³ ceebo bantu boonse bakabisha akulela kubulemu bwakwe Lesa.

²⁴ Sombi Lesa kwiinda muluse lwakwe lwabupebo, ulalulamika bantu kwiinda muli Jesu Klistu uyo wakabaangulula.

²⁵ Lesa wakamwaaba ayi acaikwe kwaamba ayi lufu lwakwe lube nshila yakulekelelamo shibiibi sha bantu bashoma Jesu. Ici ncitondesho ca bululami bwakwe. Kale kale Lesa wakalinga kulangabo shibiibi sha bantu ceebo ca nkumbu shakwe shakulekelela.

²⁶ Sombi bulya ulatondesha ayi ulalulamika bantu bashoma muli Jesu Klistu kwaamba ayi beshibe ayi lakwe mwiine uliluleme.

²⁷ Aboobo apa taapu nceenga walisumpwitaawo muntu, sobwe. Ceebo taalulamikwi pameenso akwe Lesa kwiinda mukukonkela Milawo, sombi ceebo cakushoma muli Jesu.

²⁸ Paceebo ceeci tulaamba ayi muntu ulalulamikwabo kwiinda mulushomo, kuteshi kukonkela Milawo, sobwe.

²⁹ Sa Lesa ngwa baJudabo beenka? Sa teshi wa baswamashi bakunsengwe abalo? Ee, nguLesa wa baswamashi bakunsengwe abalo.

³⁰ Kuli Lesa womwibo ndondoli alimwi ngoolulamika baJuda mulushomo alimwi abaswamashi bakunsengwe mbomunya.

³¹ Ono sa ici cilaamba ayi Milawo teecite ncito nditutokwaamba ayi nkwiinda mulushomo? Napaceyuubo! Tutooyumyabo Milawo.