Bene Loma 2 - Baibo Busansulushi Bwa Libuku Ili

Lesa ulaakoombolosha bantu boonse

¹ Omweensuma, webo nowoombolosha babyo, taaku mpweshi ukayubile mulandu, nabi ubaani. Ceebo ndiwoombolosha bamwi pabubi bweenka mboocita, awebo utolishinina omwiine.

² Soonse tulishi kwaamba ayi Lesa uloombolosha mubululami bantu bacita shibiibi sha mushobo uyu.

³ Sombi webo omweensuma, shintu sheenka ishi nshoopetawo babyo milandu, awebo omwiine nshoocita. Sa utooyeeya ayi webo ulaakuyuba mulandu wakwe Lesa?

⁴ Nabi sa utoonyansha Lesa ceebo ca kwaamba ayi ngushinkumbu abuumbi alimwi taatondeshi bukali bwakwe paciindi ceenka ico, sombi ulatolelela kulekelela? Ncakwiila ulishi kwaamba ayi Lesa ncaabetele shinkumbu nkweelesha kwaamba ayi usanduke kuswa kushibiibi shako.

⁵ Ono ceebo uli shicimpamya utoolengesha Lesa ayi akeendeewo kukutondesha bukali bwakwe pabushiku ndyeshi akoomboloshe bantu boonse mubululami.

⁶ Ceebo Lesa ulaakulambula muntu woonse kweelana amilimo yakwe.

⁷ Abo batolelela kucita shiluleme, kuyandoola bulemu kuli Lesa, shoolwe alimwi abuumi butamaani, Lesa ulaakubapa buumi ubo.

⁸ Sombi bamwi abo basuni kucita nshebasuni beene akukaka kucita shiluleme kabacitabo shitaluleme, Lesa ulaakuboombolosha mubukali bwakwe.

⁹ Mapensho alimwi amakatasho alaakuba pabantu abo bacita shibiibi, kutaanguna baJuda, pesule baswamashi bakunsengwe.

¹⁰ Sombi ulaakulumbaisha akulemeka alimwi akupa luumuno abo bacita shiluleme, kutaanguna baJuda, pesule baswamashi bakunsengwe.

¹¹ Mukwiinga Lesa taasalululi.

¹² Bantu boonse bakabisha kabateshi Milawo balaakunyonyoolwa nakubi kwaamba ayi tebakalinga kwishi Milawo. Abo bakabisha kabeshi Milawo, Milawo yeenka iyo ilaakubashinina.

¹³ Ceebo bantu tabalulamikwi pameenso akwe Lesa kwiinda mukunyumfwabo Milawo, sombi kwiinda mukucita bwaamba Milawo.

¹⁴ Baswamashi bakunsengwe tabakwe kupekwa Milawo, sombi na bacita bwaamba Milawo palwabo beene, nkokwaamba ayi babonesha ayi balicite Milawo mumyoyo yabo, nabi tabakwe kupekwa Milawo iyo.

¹⁵ Nshebacita shilatondesha kwaamba ayi shaamba Milawo shililembetwe mumyoyo yabo. Shintu nshebayeeya mumyoyo yabo shilatondesha ayi nshancinencine ceebo cimwi ciindi shilabalwiita ayi babisha nabi bacita kabotu.

¹⁶ Mbweekoobo mbweshi cikabe pabushiku Lesa ndyeshi akoomboloshe bantu kwiinda muli Jesu Klistu pasheesho nshebayeeya beene, kweelana aMakani Abotu aya ngoonshimikila.

Bwaamba Milawo pabaJuda

¹⁷ Ino webo noolyaamba ayi uli muJuda? Ulacinka manungo muMilawo alimwi akulisumpula muli Lesa.

¹⁸ Ulishi kuyanda kwakwe Lesa alimwi ceebo wakeeishikwa muMilawo, aboobo ulishi bwakusala shintu shibotu.

¹⁹ Kweelana ambocibete ulashoma ayi uli mutanjilili wa boofu, mumuni wa baabo bali mumunshinshe

²⁰ alimwi amufundishi wa baluya abatacite lushibo. Ulishinishite ayi ulishi shoonse alimwi shoonse nsheenga waamba nshalushinisho mukwiinga wakapekwa Milawo.

²¹ Uleeisha bamwi sombi, ulyeelete akuliisha omwiine, ulashimikila ayi bantu tabeelete kwiipa, sombi webo omwiine uleepa.

²² Uleeisha ayi bantu tabeelete kucita bulale, sombi webo omwiine ulacita bulale. Shibumbwabumbwa ulishipatite abuumbi, sombi uleepa shintu sha mumaanda mobapailila shibumbwabumbwa.

²³ Ulalisumpula ayi ulicite Milawo yakwe Lesa, sombi ulamulensha nsoni kwiinda mukutakonkela Milawo iyo.

²⁴ Cililembetwe muMalembo akwe Lesa ayi, “Ceebo ca ndimwe nobaJuda, baswamashi bakunsengwe balacobola Lesa.”

²⁵ Na ulacita kweelana abwaamba Milawo, ingayi kupalulwa kwako kulibo kabotu. Sombi na tooikonkeli, nkokwaamba ayi kupalulwa kwako taaku mbokubete.

²⁶ Balo baswamashi bakunsengwe tabakwe kupalulwa, nakubi boobo na kabakonkela Milawo, ncakwiila Lesa ulaakubabonabo anga bakapalulwa.

²⁷ Paceebo ceeci, na uyo utakwe kupalulwa kaakonkela Milawo, ulaakukushinina webo omuJuda nowakapalulwa alimwi nowakapekwa Milawo, sombi tooikonkeli.

²⁸ Shoonse ishi shitoosansulula ayi muJuda wancinencine teshi wooyo uliboneshabo kubantu ayi ngumuJuda. Akwalo kupalulwa kwancinencine teshi kooko bantu nkobacita kumibili, sobwe.

²⁹ Anu muJuda wancinencine ngooyo muJuda mumoyo. Akwalo kupalulwa kwancinencine nkooko kwa mumoyo kucitikwa aMushimu Usalashi. Kupalulwa uku takucitwi ceebo muntu wacita bwaamba Milawo. Muntu wa mushobo wooyo umulumbaisha nguLesa, teshi bantu, sobwe.