Bene Loma 14 - Baibo Busansulushi Bwa Libuku Ili

Mutanoobona bene Klistunyinaanu ayi balabisha

¹ Amutambule muntu uyo utana kushoma bunene, sombi mutamupikishi pamiyeeyo yakwe.

² Muntu umwi ulashoma ayi inga walya cintu cili coonse, sombi umwi utana kushoma bunene ulalyabo bucisa bweenka.

³ Muntu uyo ulya cili coonse atasebaanyi muntu ulyabo bucisa, alakwe ulyabo bucisa, ataboni wooyo ulya cili coonse ayi utoobisha mukwiinga Lesa wakamutambula.

⁴ Tooelete kubona musebenshi wa muntu umwi ayi utoobisha. Ngumwaami wakwe mwiine ngweenga wakonsha kwishiba na wacita kabotu nabi tau. Kwalo ndishi kwaamba ayi ulaakucita kabotu mukwiinga Lesa ulaakumuyumya.

⁵ Muntu umwi ulayeeya ayi bushiku bumwi bulalemekwa kwiinda nshiku shimwi, alakwe umwi ulayeeya ayi nshiku shoonse shilyeelenebo. Nkokwaamba ayi muntu uli woonse ulyeelete kwishiba ncaatoocita.

⁶ Uyo woonse uyeeya ayi bushiku bumwi bulyeelete kulemekwa ulacita boobo mukulemeka Mwaami, alakwe uyo ulya cili coonse ulacita boobo mukulemeka Mwaami mukwiinga ulalumba Lesa ceebo ca cakulya ico. Uyo woonse ukaka kulya shakulya shimwi ulacita boobo mukulemeka akulumba Lesa.

⁷ Taaku muntu nabi womwi ulikalila alimwi na umwi pali ndiswe wafwa, teshi kwaamba ayi walifwita mwiine.

⁸ Na katuli boomi, tulekalila Mwaami alimwi na twafwa, tulafwa ceebo ca Mwaami. Na katuli boomi nabi twafwa, tuli ba Mwaami.

⁹ Paceebo ceeco Klistu wakafwa akubushikwa kwaamba ayi abe Mwaami wa boomi alimwi abafu.

¹⁰ Takweelete kuba nabi womwi ushi kubona muKlistunyina ayi utoobisha alimwi takweelete kuba nabi womwi ushi kusebaanya muKlistunyina mukwiinga soonse nguLesa eshi akatoomboloshe.

¹¹ Mukwiinga Malembo alaamba ayi, “Mwaami Lesa wakaamba ayi, ‘Nebo ntoolumbila ayi, muntu woonse ulaakufukama kunembo lyangu akwaamba patuba ayi ndime Lesa.’ ”

¹² Anu woonse muntu ulaakulyaambilila kuli Lesa nshaakacita.

Mutalengeshi bene Klistunyinaanu kubisha

¹³ Paceebo ceeco tatweelete kubona bene Klistunyineesu ayi mbeshikubisha. Sombi ncetweelete kucita nkuyeeya kwaamba ayi tutanoolengesha bene Klistunyineesu kubisha.

¹⁴ Kwiinda muMwaami Jesu, ndishi cakutatonsha ayi taaku cintu nabi comwi cibisha muntu ciine. Sombi na muntu ulashoma ayi ncibiibi, nkokwaamba ayi cilabica kuli nguwe kucicita.

¹⁵ Na ncoolya cilalengesha muKlistunyoko kubisha, nkokwaamba ayi micito yako taitootanjililwa alusuno. Utanyonyooli bantu abo Klistu mbwaakafwita mukulya kwako.

¹⁶ Mutalengeshi bamwi kwaamba ayi ncibiibi ico ncemuyeeya ayi ncibotu.

¹⁷ Bweene bwakwe Lesa mubuumi bwesu teshi bwakulya akunwa, sombi mbwabululami, luumuno alimwi akusangalala kuswa muMushimu Usalashi.

¹⁸ Aboobo uyo woonse usebensela Klistu munshila iyi, ulakondelesha Lesa alimwi abantu balakondwa mumilimo yakwe.

¹⁹ Anu lyoonse tulyeelete kucita shintu shileta luumuno pabantu alimwi akucafwa bene Klistu kuyuma mulushomo.

²⁰ Ceebo cakwaamba ayi ulakonsha kulya shakulya shipusenepusene, utanyonyooli milimo yakwe Lesa. Shakulya shoonse inga shalikwa, sombi ncibiibi kulya cintu cilengesha mwine Klistu umwi kubisha.

²¹ Ono ncibotu kucileka kulya nyama, kunwa shibilite nabi kucita cintu cimwi cili coonse ceenga calengesha muKlistunyinaanu kubisha.

²² Anu isho nshooshoma pashintu sha mushobo wooyu shilyeelete kubabo pali ndiwe aLesa. Ulicite coolwe uyo utalipi mulandu na wacita cintu ncaayeeya ayi cilyeelete kucitwa.

²³ Sombi na utootonsha pakulya cintu cimwi nkokwaamba ayi wabisha kale mukwiinga ncaatoocita teshi ncaashoma ayi cilyeelete kucitwa. Nkokwaamba ayi cintu coonse muntu ncaacita kaatashomi ayi cilyeelete kucitwa, nkubisha.