Bene Loma 13 - Baibo Busansulushi Bwa Libuku Ili

Muntu mbwaaelete kunyumfwila beendeleshi ba cishi

¹ Muntu uli woonse ulyeelete kunyumfwila beendeleshi ba cishi ceebo taaku muntu ucite nkusu shakweendelesha shitakwe kuswa kuli Lesa. Beendeleshi boonse baliiwo, nguLesa wakabasala.

² Aboobo uyo woonse utanyumfwili beendeleshi taatoonyumfwila Lesa. Ncakwiila uyo ucita boobo ulaakulilengesha kupekwa mulandu.

³ Ceebo beendeleshi tabaloondwi kubantu bacita shibotu, sombi kubaabo bacita shibiibi. Sa ulisuni kutaloonda mweendeleshi? Anu kocita shibotu, lyalo lakwe ulaakukulumbaisha.

⁴ Ceebo mweendeleshi ngumusebenshi wakwe Lesa utoosebensela kucafwa ndiwe. Ono na ulacita shibiibi ncakwiila ulyeelete kumuloonda mukwiinga ulicite nkusu shakukupa mulandu. Anu mweendeleshi ngumusebenshi wakwe Lesa uyo upa mulandu bacita shibiibi mumusena wakwe Lesa.

⁵ Paceebo ceeco ulyeelete kunyumfwila beendeleshi, kuteshibo ceebo ca bukali bwakwe Lesa, sombi ayi mukwiinga mumoyo wako ulishi ayi mboweelete kucita ubo.

⁶ Ici nceceeco ncoosonkelela misonko mukwiinga beendeleshi ndibasebensa milimo yabo, balasebensela Lesa.

⁷ Aboobo lipila misonko yoonse yeelete kubeendeleshi, akubalemeka.

Bantu mbobeelete kusunana

⁸ Mutabi ankongole kumuntu uli woonse, sombi ncemweelete kucita, nkusunanabo. Uyo woonse usuni mubye ingayi wacita kale shiyanda Milawo shoonse.

⁹ Mukwiinga milawo yaamba ayi, “Utaciti bulale, utacaayi, uteepi, utanyumfwili munyono mubyo ceebo ca shintu nshaacite” aimwi yoonse, ilasansululwa mumulawo womwibo waamba ayi, “Suna mubyo bweenka mboolisuni omwiine.”

¹⁰ Na muntu ulisuni mubye inga taamubishishiiwo. Nkokwaamba ayi usuni mubye ulakonkela Milawo yoonse.

¹¹ Aboobo mulyeelete kucita sheeshi mukwiinga mulishi kwaamba ayi ciindi cakubuka kuswa mutulo cashikila. Ncakwiila bushiku Lesa ndyeshi akatupulushe bwasenena kwiinda nditwakashomabo.

¹² Ciindi ca mashiku camana butooyanda kuca. Ono atucileeke kucita shamumunshinshe, sombi tubwese shakulwanisha sha mumumuni.

¹³ Atwikale kabotu mbuli bantu bekala mumumuni. Tatweelete kwikala mubucakolwa bupusenepusene, bufuule alimwi akutalilemeka. Tatweelete kulwana alimwi akunyumfwilana munyono.

¹⁴ Tatweelete kubika maano musheesho shiyanda mubili, sombi Jesu Klistu abe nsheshakulwanisha shesu.