Bene Loma 11 - Baibo Busansulushi Bwa Libuku Ili

Lesa mbwaakanyumfwila nkumbu bene Isilaeli

¹ Ono ntoomwiipusha ayi, “Sa Lesa wakakaka bantu bakwe?” Napaceyi! Nebo ndimwine Isilaeli alimwi ndi wamulunyungu lwakwe Abulaamu, mumukowa wakwe Benjameni.

² Lesa taakwe kukaka bene Isilaeli abo mbwaakasala kuswabo kumatalikilo. Sa tamushi bwaamba Malembo akwe Lesa mucikani cilya Elija ndyaakasenga cankusu ayi Lesa ape mulandu bene Isilaeli?

³ Wakaamba ayi, “Nkambo, abo bantu bakacaya balaluki banu bakulukulu akumwaaya shipaililo shanu. Aboobo ndacaalabo neenka, nakubi boobo balisuni kuncaya anebo.”

⁴ Sombi Lesa wakakumbula ayi, “Ndilamite basankwa bali shuulu shosanwe ashobilo abo batana kulambilawo Baali, lesa wakubumba.”

⁵ Acecino ciindi nkobali bantu baniini bakacaala abo Lesa mbwaakasala kwiinda muluse lwakwe.

⁶ Lesa ulasala bantu kwiinda munkumbu shakwe kuteshi ceebo ca milimo njebacita. Ceebo necatalinga boobo, naakwiinga nkumbu shakwe teshi nkumbu shancinencine.

⁷ Anu twaambe buyani? Ncakwiila bene Isilaeli tabakwe kucicana ncibakalinga kuyandoola. Sombi baniini abo Lesa mbwaakasala. Paceebo ceeco bamwi boonse bakaba beshicimpamya.

⁸ Mbweeke bwaamba Malembo akwe Lesa ayi, “Lesa wakalengesha ayi babe beshicimpamya ono abobulya tababoni alimwi tabanyumfwi.”

⁹ Alakwe Defedi wakaamba ayi, “Bacatwe anga mutukuka amushinsaala ndibatoosekelela kwaamba ayi Lesa abawiishe akubapa mulandu.

¹⁰ Abapofole kwaamba ayi bacileeke kubona, bapenshekwe ceebo ca mikuli yabo.”

¹¹ Ono ntoomwiipusha ayi, “Sa baJuda ndibakalisuntula bakawita limwi mulushomo?” Napaceyi! Mukwiinga baJuda bakabisha, baswamashi bakunsengwe bakacana lupulusho. Ici cakacitika kwaamba ayi baJuda banyumfwile munyono baswamashi bakunsengwe.

¹² Ceebo cakubisha kwa baJuda, bantu bamucishi ca panshi bakatambula shoolwe. Ceebo cakwaalilwa kwa baJuda, baswamashi bakunsengwe bakatambula shoolwe. Ino cilaakweela kuli na baJuda boonse bakasalwa, bakasenkane abashomi?

Lesa mbwaakapulusha baswamashi bakunsengwe

¹³ Ono ntokwaambila ndimwe nobaswamashi bakunsengwe. Ceebo cakwaamba ayi ndi mutumwi kubaswamashi bakunsengwe, ndalumba Lesa lyoonse pamulimo uyu ngwaakampa ayi ncite.

¹⁴ Mukucita boobo, mpashi ndalengesha bantu ba mumushobo wangu kunyumfwila munyono baswamashi bakunsengwe kwaamba ayi Lesa akapulushe bamwi mulikoto lyabo.

¹⁵ Ono Lesa ndyaakabakaka, wakalengesha ayi abantu bamwi boonse bamucishi babe beshicibusanyina. Mukwiinga na boonse bakatambulwe, cilaakubabo bweenka mbuli kubuka kuswa kubafu.

¹⁶ Na muntu wapa Lesa kapansha ka shinkwa kakutaanguna ingayi shinkwa woonse ngwakwe Lesa. Na muntu wapa Lesa muyanda wa cisamu, nkokwaamba ayi amisampi yoonse njakwe Lesa.

¹⁷ Misampi imwi ya cisamu ca olifi cakushanga yakatyoka, lyalo Lesa wakalengesha ayi pasonse musampi wa cisamu ca olifi ca muluundu. Mwebo nobaswamashi bakunsengwe muli anga ncisamu ca olifi ca muluundu. Aboobo mulatambula nkusu kuswa kumiyanda ya cisamu ca olifi cakushanga, nkokwaamba ayi kuswa kubene Isilaeli.

¹⁸ Paceebo ceeco tamweelete kulisumpula pabaabo Lesa mbwaakatyola anga njimisampi. Taapu nceenga mwalisumpwitaawo mukwiinga mwebo mulibo anga njimisampi. Tamupi nkusu kumiyanda, sombi yalo njeipa nkusu kumisampi.

¹⁹ Sombi umwi inga waamba ayi, “Ee mbocibete, sombi misampi iyo yakatyolwa kwaamba ayi swebo tubikwe mumisena ya njiyo.”

²⁰ Ncakwiila mbocibete ubo. Balo bakatyolwa ceebo cakutashoma, sombi mwebo muli kucisamu ceebo ca lushomo. Nakubi boobo tamweelete kulisumpula, sombi mulyeelete kucenjela.

²¹ Ono na Lesa taakwe kulekabo bene Isilaeli, abo bali anga njimisampi iineiine, sa mutooyeeya ayi inga wamulekabo mwebo?

²² Ono mulyeelete kwishiba ayi Lesa ngushinkumbu alimwi ngumukali. Ngumukali kubaabo bakabisha, sombi ulicite nkumbu kuli ndimwe, kulilabo na kamucita sheesho nsheenga shaleta nkumbu shakwe. Sombi na mwabula kucita boobo, Lesa ulaakumutyola amwebo.

²³ Abalo baJuda na basanduka kuswa kushibiibi shabo akutalika kushoma Lesa alimwi, inga wababooshaako kucisamu. Ceebo Lesa ulacikonsha kucita boobo.

²⁴ Mwebo nobaswamashi bakunsengwe, muli anga njimisampi ya cisamu ca olifi ca muluundu, iyo Lesa njaakatyola akulengesha ayi isonse pacisamu ca olifi cakushanga, ico citakoonshi kucitika ciine. BaJuda bali anga ncisamu ca olifi cakushanga. Aboobo ncuubu Lesa kuboosha misampi yakatyolwa pacisamu ca njiyo.

Lesa mbwaanyumfwila nkumbu bantu boonse

²⁵ Nobamakwesu, kuli cikani cimwi calushinisho ico calinga kushishitwe nceensuni kwaamba ayi mwishibe, na mucishibe mutoocileka kulibona busongo. Cikani ico nceeci, cimpamya cicite bene Isilaeli bamwi teshi cikatolelele, sombi balaakushoma na baswamashi bakunsengwe bakasalwa, bakasanduke kuswa kushibiibi shabo akushoma Lesa.

²⁶ Anu mboboobo Lesa mbweshi akapulushe bene Isilaeli boonse. Bweenka bwaamba Malembo akwe Lesa ayi, “Mupulushi ulaakuswa kuSiyoni, alimwi ulaakulekelela bubi boonse bwa bene Isilaeli.

²⁷ Cipangano ici cilaakucitika, ndaakubalekelela bubi bwabo.”

²⁸ Ono mukwiinga baJuda balakaka Makani Abotu, mbalwani bakwe Lesa. Ici calengesha kwaamba ayi mwebo nobaswamashi bakunsengwe mupulushikwe. Ceebo Lesa wakabasala, balisunikwi kuli nguwe, mukwiinga wakapangana abamashali babo bakulukulu.

²⁹ Na Lesa wasala akupa coolwe muntu, taasanduki.

³⁰ Kale kale mwebo nobaswamashi bakunsengwe temwakalinga kunyumfwila Lesa, sombi bulya Lesa wamunyumfwila nkumbu ceebo baJuda bakakaka kumunyumfwila.

³¹ Mbweeke ubo mukwiinga Lesa wakamunyumfwila nkumbu, baJuda tabatoonyumfwila Lesa kwaamba ayi abalo inga wabanyumfwila nkumbu.

³² Lesa walengesha bantu boonse kuba anga mbakaili ceebo cakutamunyumfwila. Wakacita boobo kwaamba ayi abanyumfwile nkumbu boonse.

Lesa ulyeelete kulumbaishikwa

³³ Ma, Lesa ulicite nkumbu abuumbi! Ngumusongo bumbi alimwi lushibo lwakwe talwaambiki! Taaku weenga wasansulula miyeeyo yakwe nabi kunyumfwishisha nshila shakwe.

³⁴ Bweenka bwaamba Malembo akwe Lesa ayi, “Anu ngani ushi Lesa mbwaayeeya? Ngani weenga wapanda maano Lesa?

³⁵ Anu ngani weenga wapa Lesa cintu kwaamba ayi alakwe akamuboshesheewo cimwi?”

³⁶ Ceebo shintu shoonse nguLesa wakashilenga, ngooshibamba alimwi nshuumi ceebo ca nguwe. Kuli Lesa akube bulemu lyoonse. Ameni!