Bene Loma 10 - Baibo Busansulushi Bwa Libuku Ili

¹ Nobamakwesu cintu nceensunishi amoyo wangu woonse alimwi nceensenga Lesa, ncakwaamba ayi baJuda abo bamumushobo wangu, bakapulushikwe.

² Nebo inga ndaba kamboni pacikani cakwaamba ayi balisuni abuumbi kusebensela Lesa, sombi kusebensa kwabo takuswi mulushibo lwancinencine.

³ Tabeshi nshila iyo Lesa njaalulamikilamo bantu pameenso akwe. Bakeelesha kupanga nshila yabo beene. Paceebo ceeco tabakwe kusumina nshila yakwe Lesa iyo njaalulamikilamo bantu.

⁴ Mukwiinga Klistu ngowakamanisha nkusu sha Milawo kwaamba ayi uli woonse ushoma, alulamikwe pameenso akwe Lesa.

Woonse muntu inga wapulushikwa

⁵ Kweelana acikani cakululamikwa kwiinda mukukonkela Milawo, Mose wakalemba ayi, “Uyo woonse ukonkela Milawo, ulaakuba abuumi.”

⁶ Ono kweelana acikani cakululamikwa pameenso akwe Lesa kwiinda mulushomo, Malembo akwe Lesa alaamba ayi, “Utaliipushi ayi, ‘Ngani eshi akaye kwiculu?’ ” (Nkokwaamba ayi nkuya mukuleta Klistu panshi.)

⁷ “Utaliipushi nabi ayi, ‘Ngani eshi akaye kumusena wa bafu?’ ” (Nkokwaamba ayi nkuya mukubusha Klistu.)

⁸ Malembo alaamba ayi, “Maswi akwe Lesa ali pafwaafwi amwebo, ali mumilomo amyoyo yanu.” Nkokwaamba ayi maswi akwe Lesa aamba shalushomo ngotushimikila.

⁹ Na walyaambilila amulomo wako omwiine ayi, “Jesu nguMwaami,” akushoma mumoyo wako ayi Lesa wakamubusha kuswa kubafu, ulaakupulushikwa.

¹⁰ Ceebo ulashoma amoyo wako kwaamba ayi ululamikwe alimwi ulalyaambilila amulomo wako kwaamba ayi upulushikwe.

¹¹ Malembo akwe Lesa alaamba ayi, “Uyo woonse ushoma, teshi akalenshekwe nsoni.”

¹² Taapu bupusano pabaJuda abaswamashi bakunsengwe mukwiinga Lesa womwi uyo ngoMwaami wabo boonse alimwi ulapa shoolwe boonse abo bamusenga.

¹³ Bweenka bwaamba Malembo akwe Lesa ayi, “Uyo woonse usenga ayi Mwaami Lesa amucaafwe, ulaakupulushikwa.”

¹⁴ Ino inga bantu basenga buyani kuli Lesa ngobatana kushoma? Inga bashoma buyani Lesa kabatana kunyumfwa shapali nguwe? Ino alimwi inga banyumfwa buyani na taaku shikushimikila makani ayo?

¹⁵ Inga bashimikila buyani na Lesa wabula kubatuma. Bweenka bwaamba Malembo akwe Lesa ayi, “Cilabota abuumbi na besa beshikushimikila Makani Abotu.”

¹⁶ Sombi teshi kwaamba ayi boonse bakashoma Makani Abotu. Kweelana abwakaamba Isaya mulaluki mukulukulu ayi, “Nkambo, ngani ushoma makani ngotushimikila?”

¹⁷ Paceebo ceeco muntu ulashoma ceebo cakunyumfwa Makani Abotu alimwi aalo Makani Abotu alanyumfwika kwiinda mukushimikila shapali Klistu.

¹⁸ Ono sa bene Isilaeli tabakwe kwaanyumfwa Makani aya? Ncakwiila bakaanyumfwa bweenka bwaamba Malembo akwe Lesa ayi, “Maswi abeshikushimikila akanyumfwika mucishi coonse, makani abo akashika akweela cishi.”

¹⁹ Ono ndeepusha alimwi ayi, “Sa bene Isilaeli tabakwe kwishiba Makani Abotu ayo?” Ncakwiila bakalinga kwishi. Mose mwiine ngomutaanshi kukumbula ayi Lesa ulaamba ayi, “Ndaakulengesha ayi mukanyumfwile munyono mushobo uteshi wancinencine. Ndaakumukalasha ceebo ca bantu mbomwaamba ayi mbaluya.”

²⁰ Lesa wakaamba alimwi cankusu kwiinda muli Isaya ayi, “Nebo bakancana, mbantu batakalinga kunyandoola, ndakaboneka kubantu batakalinga kunsenga ayi bamboone.”

²¹ Sombi pabene Isilaeli, Lesa ulaamba ayi, “Bushiku boonse ndakatandabika maansaangu ayi mbooshe kumubili bantu batanyumfwili alimwi beshicimpamya.”