Bene Lefi 7 - Baibo Busansulushi Bwa Libuku Ili

Milambu yakumana milandu

¹ “Iyi njimilawo ya pamilambu yakumana milandu iyo isalalite abuumbi.

² Munyama wa pamulambu uyo ulyeelete kucailwa uko kucailwa banyama ba milambu yakutenta, alimwi bulowa bwa munyama uyo bulyeelete kusanseelwa kumbasu shone shoonse sha cipaililo.

³ Mafuta anguwe oonse alaakukushikwa akubengwa pacipaililo. Nkokwaamba ayi mucila ucite mafuta, mafuta a kushamukati,

⁴ insa shoonse shobilo amafuta a nshisho, alimwi acipansha cibotu ca lini.

⁵ Lyalo mupailishi ulaakutenta mafuta oonse pacipaililo ayi ncipo ca shakulya kuli ndime neMwaami Lesa. Uyu ngumulambu wakumana milandu.

⁶ Musankwa woonse wa mumikowa ya bupailishi inga walya mulambu uyu, sombi ulyeelete kulitwa mumusena usalalite, ceebo ulisalalite abuumbi.

⁷ “Ono pali mulawo womwi pamulambu wakulekelelwa shibiibi alimwi amulambu wakumana milandu. Mulawo uyu ngwakwaamba ayi nyama nja mupailishi uyo ubenga mulambu uyo.

⁸ Cipaya ca munyama wapekwa ayi ngumulambu wakutenta nca mupailishi ubenga mulambu uyo.

⁹ Cipo coonse ca fulaulo cakapangilwa mucitofu, cikaye nabi paceela ciselebete, nca mupailishi uyo ucipa kuli Lesa.

¹⁰ Sombi cipo coonse ca fulaulo citana kutelekwa, cisenkene amafuta nabi citana, nca bana bakwe Aloni bapailishi boonse, alimwi kwaabana shipansha sheelene.

Milambu ya bwanabwankashi

¹¹ “Iyi njimilawo ya pamilambu ya bwanabwankashi ipekwa kuli ndime neMwaami Lesa.

¹² Na muntu wabenga mulambu uyo ayi ube wakulumba Lesa, pamunyama uyo ngwaabenga ulyeelete kwiilikawo cipo ca shimaande. Shimaande ishi shilyeelete kuba shinene shakapangwa kufulaulo wakusenkanya amafuta a olifi, tumaande tupampamene tunanikitwe amafuta a olifi nabi shinkwa ubotu wamise wa fulaulo usenkene amafuta a olifi.

¹³ Ulaakwiilikaawo alimwi shinkwa.

¹⁴ Ulaakupa cipansha comwi comwi kuswa kumishobo yoonse ya shimaande alimwi ashinkwa ayi ncipo cipuseneeko cipekwa kuMwaami Lesa. Cipo ico nca mupailishi uyo usanseela bulowa bwa munyama kucipaililo.

¹⁵ Nyama yoonse ya mulambu wa bwanabwankashi uyo ilyeelete kulikwa pabushiku bweenka mbowabengwa. Taaku yeelete kucaalaako kushikila amacuunsa.

¹⁶ “Ono na muntu umwi waleta mulambu wa bwanabwankashi ceebo wakashomesha cakulumbila kucita boobo nabi kwiinda mukuyanda kwakwe mwiine, nyama ilaakulikwa pabushiku bweenka mbowabengwa. Sombi na yacaalaawo, ilakonsha kulikwa bushiku buboolaawo.

¹⁷ Nyama yoonse yeenga yacaalaawo kushikila apabushiku bwatatu ilyeelete kutentwa.

¹⁸ Ceebo na imwi yalikwa pabushiku bwatatu, Lesa teshi akatambule mulambu wa muntu uyo. Mulambu uyo teshi ukatambulweewo, sombi ulaakuboneka ayi toosalalite, alimwi woonse eshi akoolye, ulaakupekwa mulandu weelete.

¹⁹ Na nyama iyo yakumya cimwi cintu citasalalite kweelana aMilawo, nyama iyo tayeelete kulikwa, sombi kutentwa. “Uyo woonse usalalite kweelana amulawo inga walya nyama ya mulambu uyo,

²⁰ sombi na utasalalite kweelana aMilawo weelya, teshi akanoociyeeyelwa kuba mulikoto lya bantu bakwe Lesa.

²¹ Alimwi na umwi walya nyama ya mulambu wa bwanabwankashi pakuswa mukukumya cintu cimwi citasalalite kweelana aMilawo, cakumuntu nabi kumunyama, muntu uyo teshi akanoociyeeyelwa kuba mulikoto lya bantu bakwe Lesa.”

²² Mpomunyaawo Mwaami Lesa wakaambila Mose ayi,

²³ “Lwiita bene Isilaeli ayi taaku mafuta a ŋombe, mbelele nabi mpongo eelete kulikwa.

²⁴ Mafuta a munyama wafwa mwiine nabi wacaikwa kumunyama wa muluundu taaelete kulikwa, sombi inga asebenseshekwa kumilimo imwi yoonse.

²⁵ Uyo woonse weenga walya mafuta a munyama wakapekwa ayi ngumulambu wa shakulya kuli ndime neMwaami Lesa teshi akanoociyeeyelwa kuba mulikoto lya bantu bakwe Lesa.

²⁶ Kuli koonse uko bene Isilaeli nkweenga kabashiite, tabeelete kulya bulowa bwa bayuni nabi banyama.

²⁷ Anu uyo woonse weenga walya bulowa, teshi akanoociyeeyelwa kuba mulikoto lya bantu bakwe Lesa.”

Cipansha ca mupailishi

²⁸ Lyalo Mwaami Lesa wakaambila Mose ayi,

²⁹ “Lwiita bene Isilaeli ayi uyo woonse weenga wabenga mulambu wa bwanabwankashi, ulyeelete kuleta cipansha cimwi ayi ngumulambu upuseneeko ubengwa kuli ndime neMwaami Lesa.

³⁰ Ulyeelete kucileta amaansaakwe ayi ngumulambu wa shakulya. Ulaakuleta amafuta a munyama uyo alimwi antiti yakwe akutambeeka ntiti kunembo lyangu neMwaami Lesa ayi ngumulambu wakutambeeka.

³¹ Mpeeke mupailishi ulaakutenta mafuta pacipaililo, sombi ntiti nja bapailishi.

³² Mweendo wakatako walulyo ulaakupekwa ayi ncipo cipuseneeko

³³ ca mupailishi uyo ubenga bulowa alimwi amafuta a mulambu wa bwanabwankashi.

³⁴ Ntiti alimwi amweendo wakatako walulyo kumunyama ncipo cipuseneeko citambulwa kuli ndime neMwaami Lesa kuswa kubene Isilaeli akupekwa kubapailishi. Ici bene Isilaeli ncebeelete kunoopa bapailishi lyoonsebo.”

³⁵ Ici ncecipansha ca mulambu wa shakulya ubengwa kuMwaami Lesa alimwi akupekwa kuli Aloni alimwi abana bakwe basankwa pabushiku ubo ndibakabikwa pabupailishi.

³⁶ Pabushiku ubo, Mwaami Lesa wakaambila bene Isilaeli ayi banoopa bapailishi cipansha ici ca mulambu. Uyu ngumulawo bene Isilaeli ngobeelete kunookonkela lyoonsebo.

³⁷ Anu iyi njemilawo ya pamilambu yakutenta, cipo ca fulaulo, milambu yakulekelelwa shibiibi, milambu yakumana milandu, milambu yakubika bantu pabupailishi alimwi amilambu ya bwanabwankashi.

³⁸ PaKalundu ako ka Sinayi muluyanga, Mwaami Lesa mpwaakapeta bene Isilaeli milawo kwiinda muli Mose, pabushiku ubo ndyaakabaambila ayi banoopa milambu alimwi ashipo.