Bene Lefi 5 - Baibo Busansulushi Bwa Libuku Ili

Milandu yeelete kubengelwa milambu yakulekelelwa shibiibi

¹ “Anu milambu yakulekelelwa shibiibi ilyeelete kupekwa pamilandu iyi. “Na muntu weetwa kunkuta ayi akape bukamboni ono wakaka kwaamba makani apacintu ico ncaakabona nabi kunyumfwa, ulyeelete kupekwa mulandu weelete.

² “Na muntu umwi wacata cintu cimwi citasalalite kweelana aMilawo cakuteshiba, banyama bamuluundu batasalalite bafwite, shifubwa shitasalalite shifwite nabi shilongolo shinene atuniini sheenda panshi shitasalalite shifwite. Ono nabi ncakuteshiba, muntu uyo taasalalite alimwi ulicite mulandu.

³ “Ono na muntu wacata cintu cimwi ca kumubili wa muntu cili coonse citasalalite cakuteshiba, lyalo paciindi ceenka ico ndyeeshiba ncaacita ulaba amulandu.

⁴ “Na umwi washomesha cakulumbila pacintu cili coonse kwakubula kuyeeya, paciindi ceenka ico ndyeeshiba ncaacita ulaba amulandu.

⁵ “Na muntu ulicite mulandu, ulyeelete kulyaambilila cibiibi cakwe.

⁶ Ono mulandu wakubisha kwakwe, ulyeelete kuleta mbelele yanakashi nabi mpongo kuli ndime neMwaami Lesa ayi ngumulambu. Mupailishi ulaakubenga mulambu uyo pacibiibi ca muntu uyo.

⁷ “Ono na muntu inga tacikoonshi kucana mbelele nabi mpongo, ulyeelete kuleta mpolobe shobilo nabi nkulimba shobilo kuMwaami Lesa ayi ngomalipilo akubisha kwakwe. Nkokwaamba ayi kayuni komwi ngumulambu wakulekelelwa shibiibi, kamwi ngumulambu wakutenta.

⁸ Ulaakushileta kumupailishi uyo weshi akataangune kubenga kayuni ka mulambu wakulekelelwa shibiibi. Ulaakutyola nshingo ya kayuni kwakutasutulako mutwi

⁹ akusanseela bulowa bwa nkako bumwi kulubasu lwa cipaililo. Bulowa bweshi bukacaaleeko bulaakutilwa panshi pacipaililo. Uyo ngumulambu wakulekelelwa shibiibi.

¹⁰ Kuswawaawo, ndyeshi akabenge kayuni kabili ayi ngumulambu wakutenta kweelana amilawo. Munshila iyi, mupailishi ulaakubenga mulambu wa cibiibi ca muntu uyo, aboobo ulaakulekelelwa.

¹¹ “Ono na muntu inga tacikoonshi kucana mpolobe shobilo nabi nkulimba shobilo, ulyeelete kuleta kilogilamu yomwi ya fulaulo ayi ncipo cakulekelelwa shibiibi. Teelete kubikako mafuta a olifi nabi tununkila kabotu ceebo ncipo cakulekelelwa shibiibi, kuteshi cipo ca fulaulo.

¹² Lyalo ulaakuutola kumupailishi uyo ngweshi akatapulewo lupaka lomwi ayi cikabe cishibilo cakwaamba ayi woonse wapekwa kuli ndime neMwaami Lesa. Lyalo ulaakuutentela pacipaililo peculu lya milambu yakutenta ayi ncipo ca shakulya. Ico ncipo cakulekelelwa shibiibi.

¹³ Munshila iyi, mupailishi ulaakubenga cipo ca cibiibi ca muntu uyo, aboobo ulaakulekelelwa. Fulaulo umwi woonse ngwa mupailishi kweelana ambocibete mumakani a cipo ca fulaulo.”

Milambu yakumana mulandu

¹⁴ Mpomunyaawo Mwaami Lesa wakapa Mose milawo iyi.

¹⁵ “Na muntu umwi wabisha cakuteshiba kwiinda mukwaalilwa kulipila sheesho shisalalite kuli ndime neMwaami Lesa, ulyeelete kuleta mbelele isankwa itacite kampenda kali koonse kuli ndime neMwaami Lesa, ayi ngumulambu wakumana mulandu. Bubotu bwa njiyo bulyeelete kwishibwa kweelana acipimo cakasuminishikwa.

¹⁶ Ulyeelete kulipila sheesho nshaakaalilwa alimwi ulyeelete kwiilikaawo acomwi ca shosanwe ca sheesho nshaakaalilwa. Ulaakushipa mupailishi uyo weshi akabenge munyama ayi ngumulambu wa cibiibi ca muntu uyo, aboobo ulaakulekelelwa.

¹⁷ “Ono na muntu umwi wabisha cakuteshiba kwiinda mukusotoka mulawo wangu neMwaami Lesa uli woonse, nkokwaamba ayi wabisha. Aboobo ulyeelete kulipila kweelana ambwaaelete.

¹⁸ Ulyeelete kuleta mbelele isankwa itacite kampenda kali koonse kumupailishi ayi ngumulambu wakumana mulandu. Bubotu bwa njiyo bulyeelete kushibwa kweelana acipimo cakasuminishikwa. Lyalo munshila iyi mupailishi ulaakubenga mulambu wa cibiibi cakabisha muntu uyo mukuteshiba, aboobo ulaakulekelelwa.

¹⁹ Uyu ngumulambu wakumana mulandu uyo ngwaakabaawo ceebo cakubishisha nebo neMwaami Lesa.”