Bene Lefi 4 - Baibo Busansulushi Bwa Libuku Ili

Milambu yakulekelelwa shibiibi

¹ Mpomunyaawo Mwaami Lesa wakaambila Mose ayi,

² “Lwiita bene Isilaeli ayi uyo woonse weenga wabisha akusotoka mulawo wangu neMwaami Lesa uli woonse cakuteshiba, ulyeelete kukonkela milawo iyi.

³ “Na ngumupailishi munene wabisha, akuleta mulandu pabantu, ulyeelete kuleta kuli ndime neMwaami Lesa mucende mwaana utacite kampenda kali koonse, alimwi akumubenga ayi ngumulambu wakulekelelwa shibiibi shakwe.

⁴ Ulaakuleta mucende uyo kumulyango wa Tente ya Cipangano, akumubika lyaansa lyakwe pamutwi wakwe alimwi akumucaya peenka apo kunembo lyangu neMwaami Lesa.

⁵ Lyalo mupailishi munene ulaakubwesa bulowa bwa mucende bumwi akubwinjisha muTente.

⁶ Ulaakusumpa munwe wakwe mubulowa ubo akubusanseela kunembo lyangu neMwaami Lesa, nkokwaamba ayi kunembo lya cisani cakushitilisha cisalalite mankanda osanwe aobilo.

⁷ Kuswawaawo, ulaakubika bulowa bumwi pameeca a mumakonko oonse a cipaililo ca tununkila kabotu cili kunembo lyangu neMwaami Lesa muTente. Lyalo bulowa boonse bweshi bukacaaleewo ulaakubutila panshi pacipaililo cakutentelawo milambu, ico cili pamulyango wa Tente.

⁸ Kumucende ngomunya uyu, ulaakukushako mafuta oonse, kubikaawo amafuta ali kushamukati,

⁹ insa shoonse shobilo amafuta a nshisho alimwi acipansha cibotu ca lini.

¹⁰ Mpeeke mupailishi ulaakubwesa mafuta aya akwaatentela pacipaililo ca milambu yakutenta, bweenka mbuli mbwaacita kumafuta a munyama ucaikwa ayi ngumulambu wa bwanabwankashi.

¹¹ Sombi ulaakubwesa cipaya ca mucende uyo, nyama, mutwi, myeendo alimwi ashamukati, kubikaawo amala,

¹² akushitola pansengwe lya misumba kumusena usalalite kweelana amilawo uko nkobapukwita milota. Lyalo ulaakushitenta uko pamulilo wa nkuni.

¹³ “Ono na mbene Isilaeli boonse babisha cakuteshiba kwiinda mukusotoka mulawo umwi pamilawo yangu neMwaami Lesa. Nabi babisha cakuteshiba, balicite mulandu.

¹⁴ Lyalo na beshiba ayi babisha, balyeelete kuleta mucende mwaana ayi ngumulambu wakulekelelwa shibiibi. Mucende mwaana uyu balaakumuleta kuTente ya Cipangano.

¹⁵ Mpomunyaawo batanjilili ba bene Isilaeli balaakubika maansaabo pamutwi wa mucende akumucaila peenka apo.

¹⁶ Lyalo mupailishi munene ulaakutola bulowa bumwi muTente

¹⁷ akasumpemo munwe akubusanseela kunembo lyangu neMwaami Lesa, nkokwaamba ayi kunembo lya cisani cakushitilisha mankanda osanwe aobilo.

¹⁸ Kuswawaawo, ulaakubika bulowa bumwi pameeca mumakonko oonse a cipaililo ca tununkila kabotu cili kunembo lyangu neMwaami Lesa muTente. Lyalo bulowa bumwi boonse ulaakubutila panshi pacipaililo cakutentelawo milambu, ico cili pamulyango wa Tente.

¹⁹ Kuswawaawo ulaakubwesa mafuta a mucende uyo oonse akwaatentela pacipaililo.

²⁰ Kumucende mwaana uyo, ulaakucita mbomunya mbwaacita kumucende wa mulambu wakulekelelwa shibiibi. Aboobo munshila iyi, ulaakubenga mulambu wa shibiibi sha bantu, lyalo balaakulekelelwa.

²¹ Mpeeke ulaakukusha mucende uyo pansengwe lya misumba akumutenta bweenka mbwaatenta mucende ubengwa ayi ngumulambu wakulekelelwa shibiibi shakwe mwiine. Mulambu uyo ngwakukusha cibiibi ca bene Isilaeli boonse.

²² “Ono na ngumutanjilili wabisha cakuteshiba kwiinda mukusotoka mulawo umwi pamilawo yangu neMwaami Lesa, ulicite mulandu.

²³ Lyalo na washibishikwa cibiibi cakwe, ulyeelete kuleta mulambu wa mpongo isankwa itacite kampenda kali koonse.

²⁴ Ulyeelete kubika lyaansa lyakwe pamutwi wa njiyo akwiicaila kunembo lyangu neMwaami Lesa, uko nkobacaila milambu yakutenta. Uyu ngumulambu wakulekelelwa shibiibi.

²⁵ Lyalo mupailishi ulaakusumpa munwe wakwe mubulowa bwa munyama uyo, akububika pameeca a mumakonko oonse a cipaililo. Bulowa boonse bweshi bukacaaleewo, ulaakubutila panshi pacipaililo.

²⁶ Mpomunyaawo mafuta oonse ulaakwaatentela pacipaililo, bweenka mbwaatenta mafuta a banyama bacaikwa ayi njimilambu ya bwanabwankashi. Munshila iyi, mupailishi ulaakubenga mulambu wa cibiibi ca mutanjilili, aboobo ulaakulekelelwa.

²⁷ “Ono na ngumuntubo wabisha cakuteshiba kwiinda mukusotoka mulawo umwi pamilawo yangu neMwaami Lesa, ulicite mulandu.

²⁸ Lyalo na washibishikwa cibiibi cakwe, ulyeelete kubenga mulambu wa mpongo yanakashi itacite kampenda kali koonse.

²⁹ Ulaakubika lyaansa lyakwe pamutwi wa njiyo akwiicaila kunembo lyangu neMwaami Lesa, uko nkobacaila milambu yakutenta.

³⁰ Kuswawaawo, mupailishi ulaakusumpa munwe wakwe mubulowa bwa munyama uyu, akububika pameeca a mumakonko oonse a cipaililo. Bulowa boonse bweshi bukacaaleewo, ulaakubutila panshi pacipaililo.

³¹ Lyalo ulaakukusha mafuta a munyama uyu oonse, bweenka mbwaakusha mafuta a banyama bacaikwa ayi njimilambu ya bwanabwankashi. Mpeeke ulaakwaatentela pacipaililo kwaamba ayi bweema bukansangalashe neMwaami Lesa. Munshila iyi, mupailishi ulaakubenga mulambu wakukusha cibiibi ca muntu uyo, aboobo ulaakulekelelwa.

³² “Ono na muntu uyo waleta mbelele ayi ngumulambu wakulekelelwa shibiibi, ilyeelete kuba yanakashi itacite kampenda kali koonse.

³³ Ulaakubika lyaansa lyakwe pamutwi wa njiyo akwiicaila kunembo lyangu neMwaami Lesa, uko nkobacaila milambu yakutenta.

³⁴ Mupailishi lakwe ulaakusumpa munwe wakwe mubulowa bwa munyama uyu akububika pameeca a mumakonko oonse a cipaililo. Bulowa boonse bweshi bukacaaleewo, ulaakubutila panshi pacipaililo.

³⁵ Kuswawaawo, ulaakukushamo mafuta oonse, bweenka mbwaakusha mafuta a mumbelele icaikwa ayi ngumulambu wa bwanabwankashi, akwaatentela pacipaililo pantu pomwi acipo ca shakulya cipekwa kuli ndime neMwaami Lesa. Munshila iyi, mupailishi ulaakubenga mulambu wakukusha cibiibi ca muntu uyo, aboobo ulaakulekelelwa.