Bene Lefi 26 - Baibo Busansulushi Bwa Libuku Ili

Shoolwe shapakunyumfwila

¹ Lyalo Mwaami Lesa wakaamba ayi, “Mutanoopanga shibumbwabumbwa, nabi shintu sha mabwe, nabi mabwe akubesa ayi munooshilambila. Nebo ndime Mwaami Lesa, Lesa wanu.

² Kamulama nshiku shakookesha sha Shibelu alimwi akulemeka musena usalalite umo momunambilila. Nebo ndime Mwaami Lesa.

³ “Na munookala kweelana amilawo yangu alimwi amilasho yangu,

⁴ ndaakumupa mfula paciindi ceelete kwaamba ayi mumyuunda mukaswe shakulya alimwi ashisamu shikacate shisepo.

⁵ Shakulya shanu shilaakufula cakwaamba ayi paciindi cakuyapa minyansa, mwebo mulaakunoocitebula shili anga ngamaila, apalo paciindi cakushanga shakulya, mulaakunoocilongelabo minyansa. Mulaakuba ashakulya shoonse nshemusuni alimwi mulaakunokala kabotu mucishi canu ico.

⁶ “Ndaakumupa luumuno mucishi canu alimwi mulaakunokoona cakutaloonda muntu nabi womwi. Banyama boonse bakali ndaakubatandaamo, anu teshi mukabewo nkondo alimwi.

⁷ Mwebo mulaakukoma balwani banu boonse.

⁸ Bantu bosanwe bamulikoto lyanu balaakukonsha kukoma bali mwaanda, abalo bamulikoto lyanu bali mwaanda balaakukonsha kukoma bali shuulu likumi.

⁹ Nebo ndaakumupa coolwe abaana baanji alimwi ndaakulama cipangano cili pali ndimwe anebo.

¹⁰ Mulaakutebula shakulya shiinji abuumbi isho nsheshi shikamane mwaaka. Nacibi boobo mulaakunoosowa shakulya shamatumba ayi mubikemo sha mwaaka upya.

¹¹ Nebo ndaakunokala pakati kanu muTente yangu ya Cipangano alimwi teshi nkamufutatileewo.

¹² Anu ndaakunooli amwebo akuba Lesa wanu, amwebo mulaakuba bantu bangu.

¹³ Nebo neMwaami Lesa, Lesa wanu ndakamukusha mucishi ca Ijipiti kwaamba ayi mutakabi basha alimwi. Ndakatyola lijoko lya busha bwanu akulengesha ayi munokweenda cakubula nsoni.”

Mulandu wakutanyumfwa

¹⁴ Mwaami Lesa wakaamba ayi, “Na mukabule kukonkela milasho yangu, mulaakupekwa mulandu.

¹⁵ Na mukakake kukonkela milawo yangu amilasho yangu alimwi akupwaya cipangano cili pali ndimwe anebo,

¹⁶ ndaakumupa mulandu. Ndaakumuletela mapensho a mbuli malwashi atashilikwi alimwi ashimpwita isho nsheshi shikamupofole akunyonyoola buumi bwanu. Mulaakushanga mbuto shanu, sombi teshi cikamucafweewo mukwiinga balwani banu balaakumukoma akulya shoonse nshemwakalima.

¹⁷ Ndaakumufutatila ayi mukakomwe alimwi abo bamupatite balaakumweendelesha. Mulaakuloonda cakwaamba ayi mulaakucica nabi taaku utoomutandaanya.

¹⁸ “Na pakumupolela shoonse ishi mukanoocikakitebo kunyumfwila, ndaakwiindilishawo mankanda osanwe aobilo kumupensha.

¹⁹ Ndaakumana cimpamya canu cakulisumpula, teshi kukabewo mfula. Aboobo cishi canu cilaakuboolabo nta anga nceela ca nshimbi.

²⁰ Anu kusebensa kwanu kunene abuumbi teshi kukamucafweewo, ceebo mucishi canu teshi mukaswe shakulya ashalo shisamu teshi shikacate shisepo.

²¹ “Ono na mukatolelele kunkaka akutanyumfwila, alimwi ndaakwiindilishawo mankanda osanwe aobilo kumupensha.

²² Lyalo ndaakutuma banyama bakali pakati kanu abo beshi bakacaye bana banu, kunyonyoola shifubwa shanu, akushiyawobo baniini pakati kanu cakwaamba ayi munshila shanu shoonse mulaakunoobula abeshikwiindaamo.

²³ “Ono na pakumucitikila mapensho oonse aya mukabule kunyumfwila, sombi mukatolelele kukaka nshemulwiita,

²⁴ lyalo ndaakumwaalukila akumupensha mankanda osanwe aobilo kwiinda kataanshi.

²⁵ Mpeeke ndaakuleta nkondo pali ndimwe akumupensha ceebo ca kupwaya cipangano cesu. Na mukabungane mumandabalaanu anene mukuyuba, lyalo ndaakumutumina malwashi atashilikwi. Aboobo mulaakukakatishikwa kulyaaba mumaansa a balwani banu.

²⁶ Ashalo shakulya shanu ndaakushiceesha cakwaamba ayi banakashi likumi balaakunoopangila shinkwa woonse ngobeelete mwakupangila momwi. Balaakwaabana shinkwa uyo, ono pakumanisha kuulya woonse, teshi mukakuteewo.

²⁷ “Ono kwisule lya shintu shoonse ishi, na mukanoocikakitebo nshemulwiita akutanyumfwila,

²⁸ ndaakumwaalukila akwiindilishaawo alimwi pamapensho anu mankanda osanwe aobilo.

²⁹ Mulaakunyumfwa nsala inene abuumbi cakwaamba ayi mulaakunoolya bana banu.

³⁰ Ndaakunyonyoola misena yanu yakulambililaamo patulundu, kumwaya shipaililo shanu sha tununkila kabotu pakutenta alimwi akubunjika mituntu yanu pashibumbwabumbwa shanu shifwite ceebo ca bunya.

³¹ Mandabalaanu anene ndaakwaalula matongo akunyonyoola misena yanu yakulambililaawo alimwi akukaka kutambula milambu yanu.

³² Acalo cishi canu ndaakucinyonywetabo limwi cakwaamba ayi balwani banu bekalaamo balaakukankamana.

³³ Ndaakumuletela nkondo akumupalanganishisha mushishi shimwi. Cishi canu cilaakubula bantu, alimwi mandabalaanu anene alaakucaalabo ngamatongo.

³⁴ Lyalo cishi canu cilaakuba amyaaka yakookesha iyo njemwakalinga kukaka kucipa. Cilaakunookookesha ceebo teshi mukabe bantu paciindi ico mwebo nceshi mukanooli mucishi ca balwani banu.

³⁵ Cishi ici caakucaala matongo, cilaakuba akookesha nkocatakalinga kubaawo ankuko mwebo kamuciliimo.

³⁶ “Ono mwebo nomushi mukanooli mushishi shimwi, ndaakumulengesha kuba boowa cakwaamba ayi kunyumfwabo litewu litooya cuululuka kumuuwo, mwebo nkucica. Mulaakucica anga mutootandaanishikwa munkondo akuliwita nabi taapu mulwani pafwaafwi amwebo.

³⁷ Mulaakulimbana nabi taaku utoomutandaanya alimwi mulaakwaalilwa kulwana amulwani uli woonse.

³⁸ Mulaakufwita mucishi ca balwani akubikwa mweenka umo.

³⁹ Ono abo beshi bakacaaleewo pakati kanu mushishi sha balwani, balaakunyonyooka ceebo ca bubi bwanu nobeene alimwi abubi bwa bamashali banu bakulukulu.

⁴⁰ “Sombi bamulunyungu lwanu balaakulyaambilila shibiibi shabo alimwi asha bamashali babo bakulukulu, abo bakankaka, kungalukila,

⁴¹ kunengesha ayi mbafutatile alimwi akubatuma mukwikala mucishi ca balwani babo. Ono kunembo na bamulunyungu lwanu bakaboneshekwe kubisha kwabo, akulipila pamulandu wabo,

⁴² ndaakwiibaluka cipangano cangu capali Jakobo, Isaki alimwi aAbulaamu. Lyalo ndaakulasha kupa bantu bangu cishi kweelana ambondakabalasha kataanshi.

⁴³ Sombi cakutaanguna, nkukusha bantu bali mucishi ico kwaamba ayi cookeshe cakumaninina, alimwi ayi balipile mulandu wabo woonse wakukaka milawo alimwi amilasho yangu.

⁴⁴ Nacibi boobo, pakunoocili mucishi ca balwani babo, teshi nkabalubileko limwi nabi kubanyonyoola. Ico inga camanisha cipangano cangu ambabo. Nebo ndime Mwaami Lesa, Lesa wabo.

⁴⁵ Ndaakwiibaluka cipangano ico ncendakapanga abamashali babo bakulukulu, ndindakabonesha nkusu shangu kumishobo yoonse kwiinda mukukusha bantu bangu mucishi ca Ijipiti ayi nebo inga ndaba Lesa wabo. Nebo ndime Mwaami Lesa.”

⁴⁶ Anu yoonse iyi njimilawo amilasho iyo Mwaami Lesa njaakapa Mose paKalundu ka Sinayi ayi njabene Isilaeli.