Bene Lefi 24 - Baibo Busansulushi Bwa Libuku Ili

Kulama malampi

¹ Mpeeke Mwaami Lesa wakaambila Mose ayi,

² “Ambila bene Isilaeli ayi balete mafuta a olifi ayo abotu abuumbi amumalampi muTente, kwaamba ayi munooba mumuni lyoonsebo.

³ Macolesha lyoonse Aloni ulyeelete kunokwaanyasha akubona ayi anoobucesha kunembo lyangu neMwaami Lesa, nkokwaamba ayi pansengwe lya cisani cakushitilisha, kunembo lya Libokoshi lya Cipangano lili muMusena Usalalite Wiindaawo. Mulawo uyu ulyeelete kunookonkelwa lyoonsebo mumashalane anu oonse acisa.

⁴ Anu Aloni ulaakunoolama malampi pacakwaabikaawo ca golodi, akubona kwaamba ayi anoonyaka kunembo lyangu neMwaami Lesa lyoonse.

Shimaande shipekwa kuMwaami Lesa

⁵ “Mubwese makilogilamu likumi aobilo a fulaulo akupanga shimaande shili likumi ashobilo.

⁶ Shimaande ishi mushibike mumindando yobilo, shosanwe acomwi mumundando womwi womwi patebulu inanikitwe golodi wiine wiine iyo ili kunembo lyangu neMwaami Lesa.

⁷ Mumindando yoonse yobilo, mubikewo tununkila kabotu ayi cibe anga ncipo ca cakulya kuli ndime neMwaami Lesa pamusena wa shimaande.

⁸ Pabushiku bwakookesha bwa Cibelu bomwi abomwi, kwashiindi shoonse shitoosa, shimaande isho shilyeelete kubikwa kunembo lyangu neMwaami Lesa. Uyu ngumulimo wa bene Isilaeli kwamuyayaya.

⁹ Shimaande ishi nshakwe Aloni alimwi abamulunyungu lwakwe, alimwi balaakushilita mumusena usalalite mukwiinga ncipansha cisalalite abuumbi ca shakulya shipekwa kuli ndime neMwaami Lesa ayi nsha bapailishi.”

Koombolosha kululeme

^10-11 Ono kwakalinga musankwa umwi wakalinga mwaana wa musankwa mwine Ijipiti amwanakashi mwine Isilaeli wiitwa ayi Shelomiti, mwanaakwe Dibuli wamulunyungu lwakwe Dani. Bumwi bushiku musankwa uyo wakatalika kwaambana amwine Isilaeli umwi mumisumba yabo umo mwaakalinga kwikala. Ndibakalinga kwaambana, musankwa uyo wakacobola Mwaami Lesa mumashingo. Paceebo ceeci bakamutola kuli Mose.

¹² Lyalo bakamubika mumaansa abeshikulindilila kushikila beshiba mbobeelete kumucita kuswa kuMwaami Lesa.

¹³ Mpeeke Mwaami Lesa wakaambila Mose ayi,

¹⁴ “Musankwa uyo mukushe mumisumba. Uyo woonse wamunyumfwa kaashingana, ulyeelete kubika maansaakwe pamutwi wa musankwa uyo ayi abe kamboni kukubisha kwakwe. Kuswawaawo, bene Isilaeli boonse balyeelete kumucaya kumabwe.

¹⁵ Lyalo ulwiite bene Isilaeli boonse ayi uyo woonse ushingana Lesa, ulyeelete kupekwa mulandu

¹⁶ wakucaikwa. Mwine Isilaeli woonse nabi muswamashi wikala muIsilaeli uyo unshingana nebo neMwaami Lesa, bene Isilaeli boonse balyeelete kumucaya kumabwe.

¹⁷ “Awooyo woonse ucaya mubye ulyeelete kucaikwa.

¹⁸ Alakwe uyo ucaya munyama wa mubye, ulyeelete kubooshawo umwi. Mulawo ngwakwaamba ayi paswa buumi palaboola buumi.

¹⁹ “Ono na muntu wacisa mubye, ico coonse ncaacita kumubye alakwe ncecakumucita.

²⁰ Na watyola cifuwa, alakwe nkutyolwa cifuwa, na ndiinso ndyaatulula, alakwe nkutululwa liinso, na wasokola liino, alakwe nkusokolwa liino. Nkokwaamba ayi ubo bweenka mbwaacisa mubye, alakwe mbwaaelete kucisikwa.

²¹ Anu uyo woonse weenga wacaya munyama wa mubye, ulyeelete kubooshawo umbi, sombi uyo woonse ucaya mubye ulyeelete kucaikwa.

²² Mulawo uyu ulikumite kuli ndimwe noonse, kubene Isilaeli alimwi abaswamashi abo bekala pakati kanu, mukwiinga nebo ndime Mwaami Lesa, Lesa wanu.”

²³ Mose ndyaakamana kulwiita boobo bene Isilaeli, musankwa uyo bakamutola pansengwe lya misumba akumucaya kumabwe. Munshila iyi bakacita kweelana aMwaami Lesa mbwaakaambila Mose.