Bene Lefi 21 - Baibo Busansulushi Bwa Libuku Ili

Bapailishi mbobeelete kunoosalalalite

¹ Mpeeke Mwaami Lesa wakaambila Mose ayi, “Lwiita Aloni abana bakwe basankwa bapailishi ayi, ‘Taaku mupailishi weelete kulilengesha kutanoosalalite kweelana aMilawo kwiinda mukucanika mushililo sha bamakwabo bali boonse.

² Ulyeeletebo kucanika kucililo ca banyina, baishi, mwanaakwe musankwa amwanakashi, mukwabo lifumo lyomwi,

³ nabi nankashi yakwe mushike ngwaakalaakwe muŋanda.

⁴ Teelete kulilengesha kutanoosalalite kwiinda mukucanika pashililo sha kubene makwaakwe.

⁵ “ ‘Taaku mupailishi weelete kucesa misusu, kuceesha ndesu nabi kulinengoola pamubili kwaamba ayi aboneshe ayi ulicite cililo.

⁶ Ulyeelete kunoosalalite alimwi teelete kusebaanya liina lyangu. Lakwe ulabenga milambu ya cakulya kuli ndime, aboobo ulyeelete kunoosalalite.

⁷ “ ‘Mupailishi teelete kweeba mwanakashi wakalinga mufuule, mwanakashi wakakumanawo kale amusankwa, nabi wakalekwa mukwiinga lakwe ulisalalite.

⁸ Bantu balyeelete kulanga mupailishi ayi ulisalalite ceebo ulabenga milambu ya cakulya kuli ndime. Nebo ndime Mwaami Lesa, ndisalalite alimwi bantu bangu ndabasalasha.

⁹ “ ‘Ono na mwaana mwanakashi wa mupailishi waba mufuule, wasebaanya baishi. Aboobo ulyeelete kutentwa kushikila wafwa.

¹⁰ “ ‘Alakwe mupailishi munene, uyo wakatilwa mafuta ayo akunanika pamutwi alimwi wakabengwa ayi anoofwala shakufwala sha bupailishi, teelete kutanoosakula misusu nabi kukwamuna shakufwala nshaafwete kwaamba ayi aboneshe ayi ulicite cililo.

¹¹ Teelete kwinjila mumusena muli mutuntu. Teelete kulilengesha ayi abule kunoosalalite kweelana aMilawo kwiinda mukucanika nabibo pacililo ca baishi nabi banyina,

¹² nabi kuswa mumusena usalalite wangu neLesa wakwe nabi kulengesha ayi utanoosalalite, mukwiinga wakabengwa kuli ndime neLesa wakwe kwiinda mumafuta akunanika. Nebo ndime Mwaami Lesa.

¹³ Ulaakweeba mwanakashi utana kukumanawo kale amusankwa,

¹⁴ kuteshi mwanakashi mukalubinje, wakalekwa nabi wooyo wakalinga mufuule. Lakwe ulaakweeba mwanakashi wa mucipani ca mumukowa wakwe utana kukumanawo kale amusankwa.

¹⁵ Na wabula kucita boobo, bana bakwe abo beelete kunoosalalite, teshi bakanoosalalite kweelana aMilawo. Nebo ndime Mwaami Lesa nendakamupatula ayi abe mupailishi munene.’ ”

¹⁶ Lyalo Mwaami Lesa wakaambila Mose ayi,

¹⁷ “Lwiita Aloni ayi taaku muntu mulema nabi womwi wa mulunyungu lwako weelete kubenga mulambu wa cakulya kuli ndime. Ici cilaakunoocitika lyoonsebo mumashalane anu oonse acisa.

¹⁸ Taaku musankwa mulema nabi womwi weelete kubenga mulambu, nkokwaamba ayi moofu, mulema myeendo, ucite kampenda kamwi pamubili.

¹⁹ Taaku uyuminite lyaansa nabi mweendo,

²⁰ alimwi taaku wacifutu nabi mufwaafwi bunene, taaku mulwashi kumeenso nabi ucite bulwashi bwa mubili alimwi awakatungulwa.

²¹ Taaku wamulunyungu lwakwe Aloni mupailishi nabi womwi mulema eshi akanoobenga milambu ya shakulya kuli ndime.

²² Musankwa wa mushobo wooyu inga walya cakulya ncendapekwa, nkokwaamba ayi inga walya mulambu usalalite wa cakulya alimwi amulambu usalalite abuumbi wa cakulya.

²³ Sombi ceebo ca bulema mbwaacite, teelete kushika pafwaafwi acisani cisalalite cakushitilisha nabi kuya kucipaililo. Teelete kulengesha ayi shintu shisalalite ishi shikabule kunoosalalite mukwiinga ndime Mwaami Lesa uyo ushisalasha.”

²⁴ Anu mboboobo Mose mbwaakaambila Aloni, bana bakwe basankwa alimwi abene Isilaeli boonse.