Bene Lefi 20 - Baibo Busansulushi Bwa Libuku Ili

Milandu yakutakonkela milawo

¹ Lyalo Mwaami Lesa wakaambila Mose ayi,

² “Lwiita bene Isilaeli ayi uyo woonse wa mulikoto lyanu, nabi muswamashi ushiite pakati kanu, weenga wabenga mwanaakwe uli woonse mukulambila lesa wiitwa ayi Moleki, bantu bene Isilaeli balyeelete kumucaya kumabwe.

³ Na umwi wabenga mwanaakwe umwi kuli Moleki akulengesha ayi Tente yangu isalalite ibule kunoosalalite alimwi akusebaanya liina lyangu lisalalite, ndaakumwaalukila alimwi teshi nkanoocimuyeeyela kuba mulikoto lya bantu bangu.

⁴ Ono na bene Isilaeli basuula ncaacita, akubula kumucaya,

⁵ nebo nemwiine ndaakumwaalukila abamuŋanda yakwe boonse, alimwi abaabo boonse beenga babula kushomeka kuli ndime kwiinda mukulambila Moleki. Teshi nkanoocibayeeyela kuba bantu bangu.

⁶ “Ono na umwi muntu waya mukucebusha kubantu baamba amishimu ya bafu, ndaakumufutatila, akucileka kumuyeeyela kuba muntu wangu.

⁷ “Amube bantu basalalite mukwiinga nebo ndime Mwaami Lesa, Lesa wanu.

⁸ Kamukonkela milawo yangu ceebo nebo ndime Mwaami Lesa neemusalasha.

⁹ “Uyo woonse ushingana baishi nabi banyina ulyeelete kucaikwa. Lufu lwakwe ndwakuliletela mwiine.

¹⁰ “Na musankwa wapukilwa kumuka Isilaelinyina, boonse musankwa amwanakashi balyeelete kucaikwa.

¹¹ “Na musankwa wakumana amwanakashi uli woonse wa baishi, wasebaanya baishi. Aboobo musankwa uyo alimwi amwanakashi balyeelete kucaikwa. Lufu lwabo ndwakuliletela.

¹² “Na musankwa wakumana amulokashi wakwe, boonse bobilo balyeelete kucaikwa ceebo bacita cimalwamalwa. Lufu lwabo ndwakuliletela.

¹³ “Ono na musankwa wakumana amusankwanyina, bacita cintu cilensha nsoni, anu boonse bobilo balyeelete kucaikwa. Lufu lwabo ndwakuliletela.

¹⁴ “Na musankwa weeba mwaana alimwi abanyina, boonse botatwe balyeelete kutentwa kushikila bafwa, mukwiinga bacita cintu cilensha nsoni. Cintu ca mbuli ceeci taceelete kucitika pakati kanu.

¹⁵ “Na musankwa wakumana amunyama, lakwe alimwi amunyama uyo balyeelete kucaikwa.

¹⁶ “Alakwe mwanakashi na weelesha kukumana amunyama, lakwe alimwi amunyama uyo balyeelete kucaikwa. Lufu lwabo ndwakuliletela.

¹⁷ “Na muntu weeba nankashi yakwe, nabi nankashi yakwe kuli baishi nabi banyina bateshi bakumushala, boonse balyeelete kusebaanishikwa pameenso a bantu akutandwa pakati kanu. Ceebo muntu uyo wakumana anankashi yakwe, ulyeelete kupekwa mulandu weelete.

¹⁸ “Ono na musankwa wakumana amwanakashi wakubala, boonse bobilo balyeelete kutandwa pakati kanu ceebo basotoka milawo ya pakulisalasha kweelana aMilawo.

¹⁹ “Na muntu wakumana abaishinkashi nabi bakwabo banyina, boonse bobilo balyeelete kupekwa mulandu wa cimalwamalwa.

²⁰ “Na muntu wakumana abamuka shimishaabo, wasebaanya bashimishaabo. Lakwe alimwi amwanakashi uyo balyeelete kupekwa mulandu, aboobo boonse bobilo teshi bakashaleewo.

²¹ “Ono na muntu weeba muka mukwabo, balaakufwabo kutashalawo mwaana. Wacita cintu citasalalite kweelana aMilawo, alimwi wasebaanya mukwabo.

²² “Kamulama milawo yangu yoonse amilasho kwaamba ayi cishi ca Kenani ico ncentoomutolaako citakamukaki.

²³ Mutakakonkeli kwishibila kwa bantu bekala kooko. Bakunsengwe abo ntoobatandaanyaamo kwaamba ayi mwebo mukenjile mucishi ico. Banensha nsoni ceebo ca micito yabo ya bubi.

²⁴ Sombi mwebo ndamulasha kumupa cishi ico muli bubile abulongo bubotu. Ncakwiila nebo ndaakumupa cishi ici. Nebo ndime Mwaami Lesa, Lesa wanu uyo wakamupatula kuswa pakati ka mishobo yoonse.

²⁵ “Anu mulyeelete kupusanya pakati ka banyama abayuni basalalite alimwi abaabo batasalalite kweelana aMilawo. Tamweelete kulya banyama nabi bayuni batasalalite. Nebo ndabaamba ayi tabasalalite, ono kubalya kulaakulengesha ayi amwebo mubule kunoosalalite kweelana aMilawo.

²⁶ Mwebo mulyeelete kuba bantu basalalite akubabo baangu neenka, ceebo ndime Mwaami Lesa alimwi ndisalalite. Ndakamupatula kuswa pakati ka mishobo imwi yoonse kwaamba ayi mubebo baangu neenka.

²⁷ “Musankwa uli woonse nabi mwanakashi waamba amishimu ya bafu ulyeelete kucaikwa kumabwe. Muntu woonse weenga wacita boobo, lufu lwakwe ndwakuliletela mwiine.”