Bene Lefi 2 - Baibo Busansulushi Bwa Libuku Ili

Cipo ca fulaulo

¹ “Ono na muntu uli woonse waleta cipo ca fulaulo, ulyeelete kutaanguna kwaapela. Ulyeelete kubikaako amafuta a olifi alimwi atununkila kabotu,

² lyalo nkokuleta kubana bakwe Aloni bapailishi. Mpeeke mupailishi ulaakutapula busu, mafuta a olifi alimwi atununkila kabotu toonse mulupaka, akushitenta pacipaililo ayi cibe cishibilo cakwaamba ayi shoonse shapekwa kuli ndime neMwaami Lesa. Bweema bwa cipo ico ca shakulya bulansangalasha neMwaami Lesa.

³ Shoonse shicaala kucipo ca fulaulo, nsha bapailishi. Cipansha ico cilisalalite abuumbi ceebo caswa pacipo ca shakulya capekwa kuli ndime neMwaami Lesa.

⁴ “Ono na cipo ca fulaulo ncimaande cakapangilwa mucitofu, taceelete kuba acimena. Inga shaba shinene shakapangwa kufulaulo wakusenkanya amafuta a olifi nabi tumaande tupampamene tunanikitwe amafuta a olifi.

⁵ “Na ncipo ca fulaulo cakapangilwa paceela ciselebete, cilyeelete kuba cimaande cakapangwa kufulaulo wakusenkanya amafuta a olifi.

⁶ Ulyeelete kucikomoona alimwi akutilawo mafuta a olifi ayi cibe cipo ca fulaulo.

⁷ “Na cipo ca fulaulo ncimaande cakapangilwa pacikaye, cilyeelete kuba ca fulaulo amafuta a olifi.

⁸ Amulete cipo ico kuli ndime neMwaami Lesa mukutola kumupailishi uyo weshi akacitole kucipaililo.

⁹ Mupailishi uyo ulaakukushako cipansha ayi cibe cishibilo cakwaamba ayi cipo coonse capekwa kuli ndime neMwaami Lesa. Lyalo ulaakucitenta pacipaililo. Bweema bwa cipo ca shakulya ico bulansangalasha neMwaami Lesa.

¹⁰ Shoonse shicaala kucipo ca fulaulo, nsha bapailishi. Cipansha ico cilisalalite abuumbi ceebo caswa pacipo ca shakulya capekwa kuli ndime neMwaami Lesa.

¹¹ “Taaku cipo ca fulaulo nceenga mwapa Mwaami Lesa kacisenkene acimena. Tamweelete kusebensesha cimena nabi buuci mucipo ca shakulya cipekwa kuli ndime neMwaami Lesa.

¹² Inga mwashileta kuli ndime neMwaami Lesa pantu pomwi ashakulya shitaanshi nsheenga mwatebula mumwaaka, sombi tasheelete kutentwa pacipaililo.

¹³ Ono pacipo ca fulaulo coonse, munoobikawo mwiinyo, ceebo mwiinyo uleemikanina cipangano cili pali ndimwe anebo neLesa. Anu mulyeelete kubika mwiinyo mushipo shanu shoonse.

¹⁴ Na mwaleta cipo ca shakulya shitaanshi nsheenga mwatebula kuli ndime neMwaami Lesa, mukape fulaulo shikangitwe nabi shakutwa.

¹⁵ Mukasenkanyeeko amafuta a olifi alimwi atununkila kabotu.

¹⁶ Mpeeke mupailishi ulaakutenta cipansha ca busu alimwi amafuta a olifi kwaamba ayi cibe cishibilo, kubikaawo atununkila kabotu toonse ayi ncipo ca shakulya cipekwa kuli ndime neMwaami Lesa.