Bene Lefi 19 - Baibo Busansulushi Bwa Libuku Ili

Milawo ipusenepusene

¹ Mpomunyaawo Mwaami Lesa wakaambila Mose ayi,

² “Lwiita bene Isilaeli boonse ayi babe bantu basalalite, ceebo nebo neMwaami Lesa wanu ndisalalite.

³ “Womwi awomwi ulyeelete kulemeka banyina abaishi, alimwi mulyeelete kulama inshiku shakookesha kweelana ambondamulwiita. Nebo ndime Mwaami Lesa wanu.

⁴ “Tamweelete kushiya ndime akutalika kulambila shibumbwabumbwa. Tamweelete kubumba balesa ba sheela akutalika kubalambila. Nebo ndime Mwaami Lesa wanu.

⁵ “Ono na mwacaya munyama ayi ngumulambu wa bwanabwankashi, mulyeelete kukonkela milawo njendamupa, lyalo ndaakutambula mulambu uyo.

⁶ Nyama ilyeelete kulikwa pabushiku bweenka munyama ndyaacaikwa, nabi pabushiku bwakuboolaawo. Nyama yoonse yeenga yacaalaawo pabushiku bwatatu ilyeelete kutentwa

⁷ mukwiinga teesalalite kweelana aMilawo. Ono na muntu umwi weelya, teshi nkatambule mulambu uyo.

⁸ Uyo woonse weenga walya nyama iyo ulaakuba amulandu ceebo walengesha cintu cabengwa kuli ndime kuba cintubo. Aboobo teshi akanoociyeeyelwa kuba mulikoto lya bantu bangu.

⁹ “Pakunootebula mumyuunda yanu, mutakanooshisha moyeela alimwi mutakanooboolela sheesho shakacaalamo pakumanisha kutebula.

¹⁰ Mutanooboolela mumyuunda ya minyansa mukuyapa yeeyo yakalinga kucaalaamo nabi kubwesa yakaloka panshi. Mulyeelete kushiila bakandu abaswamashi. Nebo ndime Mwaami Lesa wanu.

¹¹ “Mutanokwiipa, kubeca nabi kuba shikucenjeeka.

¹² Mutanoolumbila muliina lyangu na ulishi ayi teshi ukacite cintu ico, ceebo na wacita boobo, nkucobola liina lyangu. Nebo ndime Mwaami Lesa wanu.

¹³ “Mutapenshi muntu nabi womwi, nabi kumwiipila. Tamweelete kucelwa kufolesha musebenshi wanu nabi bushiku bomwibo.

¹⁴ Tamweelete kushingana muntu ushinkite matwi nabi kubika cintu kunembo lya moofu ayi alyuumeemo, sombi amulemeke ndime neMwaami Lesa wanu.

¹⁵ “Mulyeelete kushomeka akululika pakoombolosha. Mutabi akasalulushi kubantu bakandu nabi kuloonda babile.

¹⁶ Tamweelete kuya cibekesha muntu nabi womwi, alimwi mutapi bukamboni bweenga bwalengesha buumi bwa shikamukobonyinaanu kunyonyoolwa. Nebo ndime Mwaami Lesa.

¹⁷ “Tamweelete kubikila mfundilishi muntu nabi womwi, sombi mubandike pacilubo cili pakati kanu kwaamba ayi mutakabishi ceebo ca nguwe.

¹⁸ Kuteelesha kubisha muntu nabi womwi ayi ceebo alakwe wakamubishisha nabi kutolelela kumupata, sombi amusune mubyaanu bweenka mbomulisuni nobeene. Nebo ndime Mwaami Lesa.

¹⁹ “Kamukonkela milawo yangu. Tamweelete kusuminisha mishobo ya banyama mbomufubite ayi banooshalana amishobo imwi ipusene. Tamweelete kushanga mbuto shobilo shipusene mumuunda womwi, alimwi tamweelete kufwala shakufwala shakapangwa kumishobo yobilo ya shisani.

²⁰ “Ono na musankwa wakumana amwanakashi musha uyo wakamamikilwa kumusankwa umwi, sombi kaatana kulipililwa maali nabi kwaangululwa, boonse bobilo balaakupekwa mulandu. Sombi teshi bakacaikwe mukwiinga mwanakashi uyo taana kwaangululwa.

²¹ Musankwa uyo ulaakuleta mbelele isankwa kumulyango wa Tente ya Cipangano ayi ngumulambu wakumana milandu.

²² Mpeeke mupailishi ulaakucita kweelana aMilawo pakusalasha, aboobo Lesa ulaakumulekelela.

²³ “Na mukenjile mucishi ca Kenani akushanga cisamu cili coonse ca shisepo, mulyeelete kulanga shisepo isho ayi tashisalalite kwa myaaka yotatwe itaanshi. Muciindi ico tamweelete kushilya.

²⁴ Mumwaaka wane, shisepo shoonse shilaakupekwa ayi ncipo cakulumbaisha ndime neMwaami Lesa.

²⁵ Sombi mumwaaka wasanu inga mwalya shisepo isho. Na mukacite shoonse ishi, shisamu shanu shilaakucata shisepo shiinji. Nebo ndime Mwaami Lesa, Lesa wanu.

²⁶ “Tamweelete kulya nyama ili yoonse icicite bulowa mukati. “Tamweelete kuba beshikusonda nabi baloshi.

²⁷ “Kutacesa misusu ili mumbasu sha mutwi wanu nabi kuceeshako ndesu,

²⁸ alimwi tamweelete kulyaanda akulinengoola pamibili ayi mulambile bafu. Nebo ndime Mwaami Lesa.

²⁹ “Kutasebaanya bana banu banakashi kwiinda mukubaalula bafuule ba muŋanda ya balesa bamwi. Na mwacita boobo, mulaakusandukila kubalesa abo, mpeeke cishi ico cilaakwisulabo bufuule.

³⁰ “Kamulama bushiku bwakookesha bwa Cibelu alimwi akulemeka musena wangu usalalite. Nebo ndime Mwaami Lesa.

³¹ “Tamweelete kuya mukucebusha kubantu baamba amishimu ya bafu. Na mwacita boobo, teshi mukanoosalalite kweelana aMilawo. Nebo ndime Mwaami Lesa, Lesa wanu.

³² “Kamubonesha bulemu kubamanene alimwi akubalemeka. Kamumpa bulemu akunyumfwila. Nebo ndime Mwaami Lesa.

³³ “Tamweelete kupensha baswamashi bashiite mucishi canu.

³⁴ Kuli mbabo mucite bweenka mbweenga mwaciita kumwine Isilaelinyinaanu, akubasuna bweenka mbomulisuni nobeene. Kamwiibaluka ayi amwebo mwakalinga baswamashi mucishi ca Ijipiti. Nebo ndime Mwaami Lesa, Lesa wanu.

³⁵ “Tamweelete kubeca muntu nabi womwi kwiinda mukusebensesha shipimo shakubeca mushintu shili shoonse.

³⁶ Kamusebensesha shipimo sheelete. Nebo ndime Mwaami Lesa, Lesa wanu uyo wakamukusha mucishi ca Ijipiti.

³⁷ Amukonkele milawo yangu yoonse alimwi amilasho yangu yoonse. Nebo ndime Mwaami Lesa.”