Bene Lefi 14 - Baibo Busansulushi Bwa Libuku Ili

Kusalashikwa kwa wooyo ucite bulwashi bwa manata

¹ Mpomunyaawo Mwaami Lesa wakaambila Mose ayi,

² “Milawo ya pamuntu ucite bulwashi bwa manata paciindi cakusalashikwa kwakwe kweelana aMilawo njeeyi. Paciindi ico, ulyeelete kuletwa kumupailishi

³ uyo weshi akamutole pansengwe lya misumba alimwi akumubona. Na manata amana,

⁴ mupailishi ulaakwaamba ayi kuletwe bayuni bobilo basalalite kweelana aMilawo, pantu pomwi akasamu ka sida, kasani kasalala alimwi afuute.

⁵ Lyalo mupailishi ulaakwaamba ayi muyuni umwi acailwe peculu lya mbale ifongomene ya bulongo umo muli maanshi abotu a mukantupu.

⁶ Kuswawaawo ulaakubwesa muyuni umwi ulya akumusumpila pantu pomwi akasamu ka sida, kasani kasalala alimwi afuute mubulowa bwa muyuni wacaikwa.

⁷ Ulaakusanseela bulowa mankanda osanwe aobilo pamuntu uyo utoosalashikwa kumanata, akumwaamba ayi ulisalalite. Mpeeke ulaakuleka muyuni muumi ayi aye muluundu.

⁸ Mpomunyaawo muntu uyo ulyeelete kucapa shakufwala shakwe, kukulula misusu yakwe yoonse alimwi akusamba pamubili. Lyalo ulaakunoosalalite kweelana aMilawo. Inga wenjila amumisumba, sombi ulyeelete kwikala pansengwe lya tente yakwe kwanshiku shosanwe ashobilo.

⁹ Ono pabushiku bwasanu ashobilo, ulyeelete kucesa misusu yakwe yoonse, kukulula ndesu, inkoye alimwi abooya boonse buli pamubili wakwe. Pesule ulaakucapa shakufwala shakwe alimwi akusamba pamubili. Mpeeke ulaakunoosalalite kweelana aMilawo.

¹⁰ “Lyalo pabushiku bwasanu ashotatwe ulyeelete kuleta mbelele shobilo shisankwa alimwi ayanankashi shoonse shicite mwaaka womwi alimwi shitacite kampenda, pantu pomwi amakilogilamu otatwe a fulaulo usenkene amafuta a olifi ayi cibe ncipo ca fulaulo, alimwi acomwi ca shotatwe sha lita ya mafuta a olifi.

¹¹ Lyalo mupailishi uyo umusalasha ulaakubwesa muntu uyo alimwi ashipo isho shakwe akushitola kumulyango wa Tente ya Cipangano.

¹² Mupailishi ulaakubwesa mbelele yomwi isankwa alimwi acomwi ca shotatwe sha lita ya mafuta a olifi, akushibenga ayi ngumulambu wakumana milandu. Ulaakushitambeeka kunembo lya Mwaami Lesa ayi ngumulambu wakutambeeka.

¹³ Ulaakucaya mbelele iyo pamusena usalalite apo pacailwa banyama bamilambu yakulekelelwa shibiibi amilambu yakutenta. Bweenka bubete mulambu wakulekelelwa shibiibi, mulambu wakumana milandu ngwa bapailishi alimwi ulisalalite abuumbi.

¹⁴ Mpeeke mupailishi ulaakubwesa bulowa bumwi bwa mulambu wakumana milandu akunanika muntu uyo utoosalashikwa kweelana aMilawo kukapansha ka panshi ka kutwi wakululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.

¹⁵ Mupailishi ulaakubwesa mafuta a olifi amwi akwaapuumwita mulupaka lwakwe mwiine lwakucipiko

¹⁶ akusumpamo munwe wakwe walulyo alimwi akusanseela bumwi mankanda osanwe aobilo peenka apo kunembo lya Mwaami Lesa.

¹⁷ Kuswawaawo ulaakubwesa mafuta amwi ali mulupaka lwakwe alimwi abulowa bumwi bwa mbelele akunanika muntu uyo utoosalashikwa kweelana aMilawo kukapansha ka panshi ka kutwi wakululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.

¹⁸ Lyalo mafuta oonse acaalaawo mulupaka lwakwe ulaakwaabika pamutwi wa muntu uyo. Munshila iyi ulaakucita kweelana amulawo wakusalasha.

¹⁹ “Mpomunyaawo mupailishi ulaakubenga mulambu wakulekelelwa shibiibi akucita kweelana amulawo wakusalasha. Kuswawaawo ulaakucaya munyama wa mulambu wakutenta,

²⁰ akuubengela pantu pomwi acipo ca fulaulo pacipaililo. Nkokwaamba ayi mupailishi ulaakucita kweelana amulawo wakusalasha. Lyalo munshila iyo, muntu uyo ulaakunoosalalite.

²¹ “Ono na muntu uyo ngumukandu weenga taacikoonshi kuleta shintu shoonse isho, ulyeelete kuletabo mbelele yomwi yaana isankwa ayi ngumulambu wakumana milandu weelete kutambeeka kuli ndime neMwaami Lesa ayi asalashikwe. Ulyeelete kuletabo kilogilamu yomwi ya fulaulo isenkene amafuta a olifi ayi ncipo ca fulaulo, alimwi comwi ca shotatwe sha mafuta a olifi.

²² Ulaakwiilikaawo mpolobe shobilo nabi nkulimba shobilo ayi yomwi ngumulambu wakulekelelwa shibiibi, alimwi imwi ngumulambu wakutenta.

²³ Ono pabushiku bwasanu ashotatwe bwakusalashikwa kwakwe, ulaakushileta kumupailishi pamulyango wa Tente ya Cipangano.

²⁴ Mupailishi ulaakubwesa mbelele ya mulambu wakumana milandu pantu pomwi acomwi ca shotatwe sha mafuta a olifi akushitambeeka kuli ndime neMwaami Lesa ayi ngumulambu wakutambeeka.

²⁵ Lyalo ulaakucaya mbelele ilya akubwesa bulowa bumwi akunanika muntu uyo utoosalashikwa kweelana aMilawo kukapansha ka panshi ka kutwi wakululyo, kucikumo cinene ca kulyaansa lyalulyo, alimwi akucikumo cinene ca kumweendo walulyo.

²⁶ Mpomunyaawo mupailishi ulaakupuumwita mafuta amwi mulupaka lwakwe mwiine lwakululyo

²⁷ alimwi akusanseela amwi mankanda osanwe aobilo amunwe wakwe wakululyo peenka apo kunembo lyangu neMwaami Lesa.

²⁸ Ulaakubika mafuta amwi pamisena njemunya njaakabikawo bulowa bwa mulambu wakumana milandu, nkokwaamba ayi pakapansha ka panshi ka kutwi wakululyo wa muntu uyo, pacikumo cinene ca kulyaansa lyalulyo alimwi apacikumo cinene ca kumweendo walulyo.

²⁹ Lyalo mafuta acaalaawo oonse mulupaka lwakwe ulaakwaabika pamutwi wa muntu uyo. Anu munshila iyi ulaakucita kweelana amulawo wakusalasha.

³⁰ Mpeeke ulaakubwesa mpolobe yomwi nabi nkulimba yomwi

³¹ akwiibenga ayi ngumulambu wakulekelelwa shibiibi, alimwi muyuni umwi ayi ngumulambu wakutenta kubikaawo acipo ca fulaulo. Munshila iyo, ulaakucita kweelana amulawo wakusalasha.

³² Anu iyi njemilawo ya muntu ucite manata uyo weenga kaatacikoonshi kubenga shoonse shiyandika pakusalashikwa kwakwe.”

Kubunda mumaanda

³³ Mpeeke Mwaami Lesa wakaambila Mose aAloni ayi,

³⁴ “Mwaakunjila mucishi ca Kenani ico ncendakamupa ayi ncanu, alimwi ndaakubika kubunda kuya ciindaawo muŋanda yomwi mucishi ico,

³⁵ mwine ŋanda ulyeelete kuya mukulwiita mupailishi ayi, ‘Ndabona cili anga nkubunda muŋanda yangu.’

³⁶ Mupailishi ulaakwaamba ayi shintu shoonse shikushikwe muŋanda yakwe kaatana kuya mukubona mbuli mbomwabunda. Na shabula kukushikwaamo, inga waamba ayi shintu shoonse tashisalalite. Lyalo ulaakuya kuŋanda iyo

³⁷ akubona mbuli mbomwabunda. Na mutooboneka mabala anyansabili nabi asalala anjilite amulubumbu,

³⁸ ulaakuswa muŋanda iyo akwiicala kwanshiku shosanwe ashobilo.

³⁹ Ono pabushiku bwasanu ashobilo, ulaakuboola mukwiibona alimwi. Na kubunda kutooyabo kunembo,

⁴⁰ ulaakwaamba ayi mabwe oonse abundite akushikwe kulubumbu akuwaalwa mumusena umwi utasalalite pansengwe lya ndabala.

⁴¹ Kuswawaawo lubumbu lwa mukati loonse lulyeelete kupalwa akusowa sheesho shapalwaako mumusena utasalalite pansengwe lya ndabala.

⁴² Lyalo mabwe amwi alyeelete kusebenseshekwa pamusena wa aayo akaswaako alimwi akusebensesha bulongo bumwi bwakushingusha lubumbu.

⁴³ “Ono na kubunda kwatalika alimwi muŋanda iyo pesule lyakukusha mabwe akupala lubumbu alimwi akushingula,

⁴⁴ mupailishi ulyeelete kuya mukubonaako. Na kubunda kweendaawo, ingayi nkubunda kuyambukila alimwi ŋanda iyo teesalalite.

⁴⁵ Ilyeelete kumwayululwa, alimwi mabwe a njiyo ashisamu alimwi abulongo boonse mbobakashingusha shilyeelete kutolwa pansengwe lya ndabala kumusena umwi utasalalite.

⁴⁶ Uyo woonse weenga wenjila muŋanda iyo keecicalitwe, teshi akanoosalalite kushikila macolesha.

⁴⁷ Awooyo woonse weenga woona mumo nabi kulitaamo, ulyeelete kucapa shakufwala shakwe.

⁴⁸ “Sombi na mupailishi wesa mukwiibona akucana ayi kubunda takukwe kwiindaawo kuswabo ndiyakashingulwa, ulaakwaamba ayi ŋanda iyo ilisalalite kweelana aMilawo mukwiinga kubunda koonse kwamana.

⁴⁹ Mukusalasha ŋanda iyo, ulaakubwesa bayuni bobilo, kasamu ka sida, kasani kasalala alimwi afuute.

⁵⁰ Ulaakucaya muyuni womwi peculu lya mbale ifongomene ya bulongo umo muli maanshi abotu a mukantupu.

⁵¹ Lyalo ulaakubwesa kasamu ka sida, fuute, kasani kasalala alimwi amuyuni muumi akushisumpa mubulowa bwa muyuni wacaikwa alimwi amumaanshi abotu a mukantupu. Kuswawaawo ulaakusanseela kuŋanda mankanda osanwe aobilo.

⁵² Munshila iyi, ulaakusalasha ŋanda iyo kwiinda mubulowa bwa muyuni, maanshi abotu a mukantupu, muyuni muumi, kasamu ka sida, fuute alimwi akasani kasalala.

⁵³ Mpeeke ulaakuleka muyuni muumi uyo ayi auluke pansengwe lya ndabala akuya muluundu. Munshila iyi, ulaakucita kweelana aMilawo pakusalasha ŋanda iyo, aboobo ilaakunoosalalite.”

⁵⁴ Anu iyi njemilawo ya pamanata, cilondabo,

⁵⁵ kubunda pashakufwala nabi muŋanda,

⁵⁶ kushimba pamubili, shifumu nabi cuute.

⁵⁷ Milawo iyi njeebonesha na cintu cimwi tacisalalite nabi cilisalalite.