Bene Lefi 11 - Baibo Busansulushi Bwa Libuku Ili

Banyama beenga balikwa

¹ Mpomunyaawo Mwaami Lesa wakaambila Mose aAloni ayi,

² “Amulwiite bene Isilaeli ayi inga balya munyama uli woonse wa muluundu

³ ucite shoondo shipanseene, utikula shakulya akushitafuna alimwi.

⁴ Nkobali banyama batikulabo shakulya akushitafuna nabi bacite shoondo shipanseene sheenkabo, sombi tamweelete kubalya. Ngamela nabi ilatikula shakulya akushitafuna, teecite shoondo shipanseene. Aboobo teesalalite kuli ndimwe.

⁵ Alakwe cibila nabi ulatikula shakulya akushitafuna, taacite shoondo shipanseene. Aboobo, taasalalite kuli ndimwe.

⁶ Sulwe nabi ulatikula shakulya akushitafuna, taacite shoondo shipanseene. Aboobo taasalalite kuli ndimwe.

⁷ Nkumba ayalo nabi ilicite shoondo shipanseene, teetikuli shakulya akushitafuna. Aboobo teesalalite kuli ndimwe.

⁸ Tamweelete kulya banyama aba nabi kukumya mituntu yabo, ceebo tabasalalite kuli ndimwe.

⁹ “Mulakonsha kulya nswi ili yoonse icite twakusambisha alimwi amaamba,

¹⁰ Sombi cintu coonse cikala mumaanshi citacite twakusambisha alimwi amaamba, taceelete kulikwa.

¹¹ Shilengwa shambuli sheeshi, mulyeelete kushilanga ayi tashisalalite kuli ndimwe. Tamweelete kushilya nabi kukumya mituntu ya nshisho.

¹² Anu tamweelete kulya cintu cili coonse cikala mumaanshi ico citacite twakusambisha alimwi amaamba.

¹³ “Bayuni mbomuteelete kulya mukwiinga tabasalalite kweelana aMilawo mbaaba, bamumbankwashi, makubi, bacuungwe,

¹⁴ bacikupwi basalala alimwi abashiya ba mishobo yoonse,

¹⁵ bacikwangala ba mishobo yoonse,

¹⁶ ntibatiba, makwiikwi, bacibengelele, tukoshi

¹⁷ bamwiina, bashicisekwe, bancoli,

¹⁸ bakapwa, balukumba, nshika,

¹⁹ matongola, nkobokobo, nduba alimwi atumpafwa.

²⁰ “Shilongolo shoonse shuuluka alimwi sheendela kumyeendo yone tashisalalite kuli ndimwe.

²¹ Ono nkoshili shimwi shuuluka alimwi sheendela kumyeendo yone isho nsheenga mwalya, nkokwaamba ayi isho shimontooka.

²² Inga mwalya nsoshi shoonse shipusenepusene, tubambala alimwi abateete.

²³ Sombi tulongolo tuniini tumwi toonse tuuluka alimwi tukalaba tatusalalite kuli ndimwe.

²⁴ “Shintu shoonse isho inga shamulengesha kutanoosalalite. Uyo woonse weenga wacata mituntu ya nshisho teshi akanoosalalite kushikila macolesha.

²⁵ Uyo woonse weenga wabwesa mutuntu wa comwi pali nshisho, ulyeelete kucapa shakufwala shakwe, nakubi boobo teshi akanoosalalite kushikila macolesha.

²⁶ Anu munyama woonse upanseene shoondo sombi kashitapanseene cakumaninina nabi shitatikuli shakulya akushitafuna, tashisalalite kweelana aMilawo. Uyo woonse weenga wacata mutuntu wa comwi pali nshisho, teshi akanoosalalite.

²⁷ Pabanyama boonse bacite myeendo yone, ono abo bacite maala tabasalalite kuli ndimwe. Uyo woonse weenga wacata mituntu yabo, teshi akanoosalalite kushikila macolesha.

²⁸ Uyo woonse weenga wabwesa mituntu yabo ulyeelete kucapa shakufwala shakwe, nakubi boobo teshi akanoosalalite kushikila macolesha. Ishi shintu tashisalalite kuli ndimwe.

²⁹ “Patunyama tuniini toonse tukalaba, tutasalalite kweelana aMilawo ninkooko, bakoswe, basosolwe,

³⁰ banabulwe, banantombeleka amishobo yabo yoonse alimwi abanantaambwe.

³¹ Pabanyama boonse bakalaba, ishi tashisalalite kuli ndimwe. Uyo woonse weenga wakumya mituntu yabo, teshi akanoosalalite kushikila macolesha.

³² Ono na mituntu yabo yalokela pacimwi cintu, acalo teshi cikanoosalalite. Cikani ici cilikumite kushintu sha cisamu, cisani, cipaya, nabi lisaka lya mulimo uli woonse. Cilyeelete kusumpwa mumaanshi, sombi teshi cikanoosalalite kushikila macolesha.

³³ Alimwi na mituntu ya nshisho yalokela munongo, shoonse shintu sheshi shikanooliimo teshi shikanoosalalite, anongo iyo ilyeelete kupwaikwa.

³⁴ Pacakulya cili coonse ceelete kulikwa, na patilwa maanshi aswa munongo iyo, teshi cikanoosalalite. Cintu cili coonse ceelete kunwikwa munongo iyo, tacisalalite.

³⁵ Pacintu coonse peenga palokela mituntu iyo, tacisalalite. Na ncitofu ca bulongo nabi nongo yakutelekelaamo ilyeelete kupwaikwa.

³⁶ Sombi kantupu nabi mwakubika maanshi shalo nkunoosalalitebo, ono uyo woonse weenga wakumya mutuntu wa comwi pashintu ishi, teshi akanoosalalite.

³⁷ Ono na mutuntu umwi walokela pambuto yakushanga, imbuto iyo ilaakunoosalalitebo.

³⁸ Sombi na imbuto iyo yakasubikwa mumaanshi, mpeeke mutuntu umwi walokelaawo, nkokwaamba ayi imbuto teshi ikanoosalalite kuli ndimwe.

³⁹ “Na munyama umwi ulikwa walifwita, uyo woonse weenga wamukumya teshi akanoosalalite.

⁴⁰ Alimwi na muntu umwi woonse walya cipansha ca munyama uyo cili coonse, ulyeelete kucapa shakufwala shakwe, nacibi boobo teshi akanoosalalite kushikila macolesha. Awooyo woonse weenga wanyamuna mutuntu uyo ulyeete kucapa shakufwala shakwe, sombi teshi akanoosalalite kushikila macolesha.

⁴¹ “Tamweelete kulya shilongolo shili shoonse sheenda panshi

⁴² nakubi kwaamba ayi shileendela kulifumo, kumyeendo yone nabi kashicite myeendo iinji.

⁴³ Anu tamweelete kulilengesha kutanoosalalite kwiinda mukulya shilongolo isho.

⁴⁴ Nebo ndime Mwaami Lesa, Lesa wanu, aboobo mulyeelete kunoosalalite, mukwiinga nebo ndisalalite.

⁴⁵ Nebo ndime Mwaami Lesa wakamukusha mucishi ca Ijipiti kwaamba ayi nkabe Lesa wanu. Mulyeelete kunoosalalite mukwiinga nebo ndisalalite.

⁴⁶ “Anu iyi njemilawo ya banyama alimwi abayuni, apashintu shoonse shikala mumaanshi alimwi asheesho shoonse shikalaba.

⁴⁷ Mulyeelete kucenjela ayi mupusanye shintu shisalalite kweelana aMilawo asheesho shitasalalite, nkokwaamba ayi pabanyama beelete kulikwa abaabo bateelete kulikwa.”