Bene Lefi 10 - Baibo Busansulushi Bwa Libuku Ili

Kubisha kwakwe Nadabu alimwi aAbiyu

¹ Bana bakwe Aloni basankwa beetwa ayi Nadabu aAbiyu, bakabwesa shikaye shabo shakubikawo mulilo, babikawo makalangasha atununkila kabotu akupa kuMwaami Lesa. Sombi mulilo uyo tewakalinga kusalalite ceebo Mwaami Lesa taakwe kubalwiita ayi bacite boobo.

² Paciindi ceenka ico, Mwaami Lesa wakatuma mulilo uyo wakabatenta kushikila bafwa peenka apo kunembo lyakwe.

³ Mpomunyaawo Mose wakaambila Aloni ayi, “Nceceeci Mwaami Lesa ncaakalinga kwaambawo, ndyaakaamba ayi, ‘Basebensela ndime boonse balyeelete kundemeka ceebo ndisalalite. Ndaakuyubulula bulemu bwangu kubantu bangu.’ ” Sombi Aloni wakoomunabo bwii.

⁴ Mpeeke Mose wakeeta Mishaelo alimwi aElisafani bana bakwe Usiyelo basankwa, alimwi abashimishaabo Aloni akubaambila ayi, “Kamwisa mukushe mituntu ya bapyala banu muTente isalalite, akubabika pansengwe lya misumba.”

⁵ Abalo bakesa babakusha kabacifwete aminjila yabo akubatola pansengwe lya misumba, kweelana abwakaamba Mose.

⁶ Kuswawaawo, Mose wakaambila Aloni alimwi abana bakwe basankwa beetwa ayi Elyasa alimwi aItama ayi, “Mutacileeki kusakula misusu yanu alimwi mutatoleleli kukwamoona shakufwala shanu kwaamba ayi muboneshe ayi mulicite cililo. Na mucite boobo, mutoofwa alimwi Mwaami Lesa inga wakalalila likoto lya bene Isilaeli lyoonse. Sombi bene Isilaelinyinaanu boonse balisuminishitwe kulila palufu lwa baabo Mwaami Lesa mbwaanyonyoola amulilo.

⁷ Alimwi tamweelete kuswa kumulyango wa Tente ya Cipangano mukwiinga inga mwafwa, ceebo mwakabengwa kuMwaami Lesa kwiinda mumafuta akwe akunanika.” Aboobo, bakacita bweenka bwakaamba Mose.

Milawo ya bapailishi

⁸ Lyalo Mwaami Lesa wakaambila Aloni ayi,

⁹ “Webo abana bako basankwa tamweelete kwinjila muTente ya Cipangano na mwanwa waini nabi shibilite shimwi shoonse. Na mukacite boobo, mulaakufwa. Uyu ngumulawo ngobeelete kukonkela boonse bamulunyungu lwako.

¹⁰ Mulyeelete kwishiba shintu sha Mwaami Lesa alimwi ashintu shakusebensesha munshila ili yoonse, akwishiba shintu shisalalite kweelana aMilawo alimwi ashitasalalite.

¹¹ Alimwi mulyeelete kwiisha bene Isilaeli milawo yoonse njendakamupa kwiinda muli Mose.”

¹² Kuswawaawo Mose wakaambila Aloni abana bakwe basankwa bakacaalaawo beetwa ayi Elyasa alimwi aItama ayi, “Amubwese cipo ca fulaulo cakacaala kucipo ca shakulya, mupange cimaande alimwi akulita kulubasu lwa cipaililo ceebo cipo ici cilisalalite abuumbi.

¹³ Munoocilita mumusena usalalite mukwiinga ici ncecipansha canu abana banu basankwa kuswa kucipo ca shakulya. Anu Mwaami Lesa mbwaandwiita ubo.

¹⁴ Sombi mwebo abamumaandaanu inga mwalya ntiti yakatambeekwa amweendo wakatako wakabengwa kuMwaami Lesa ayi ngwa bapailishi. Ishi inga mwashilita mumusena usalalite kweelana aMilawo. Shakapekwa kuli ndimwe abana banu ayi ncecipansha canu kuswa pamilambu ya bwanabwankashi ya bene Isilaeli.

¹⁵ Balaakunooleta mweendo wakatako alimwi antiti paciindi cakubenga mafuta kuMwaami Lesa ayi ncipo ca shakulya. Ishi shipansha nshanu abana banu kwamuyayaya bweenka bwaamba Mwaami Lesa.”

¹⁶ Mpeeke Mose wakeepusha shampongo ya mulambu wakulekelelwa shibiibi, akulwiitwa ayi yatentwa kale. Ici cakalengesha ayi akalalile Elyasa aItama. Wakabeepusha ayi,

¹⁷ “Tamukwe kulitaanshi mulambu wakulekelelwa shibiibi mumusena usalalite? Mulambu uyu ulisalalite abuumbi, alimwi Mwaami Lesa wamupa ayi shibiibi sha bene Isilaeli boonse shilekelelwe.

¹⁸ Ceebo bulowa bwa njiyo tabukwe kuletwa muTente isalalite, naakwiinga momwalita mulambu, kweelana ambondakamwaambila.”

¹⁹ Mpomunyaawo Aloni wakakumbula ayi, “Sa Mwaami Lesa naakwiinga wasangalala nindoolya sunu mulambu wakulekelelwa shibiibi? Bantu babenga mulambu wakulekelelwa shibiibi kuMwaami Lesa sunu akuleta mulambu wabo wakutenta, nacibi boobo shintu shibiibi mbuli sheeshi shancitikila.”

²⁰ Mose ndyaakanyumfwa makani aya, wakakondwa.