Bene Lefi 1 - Baibo Busansulushi Bwa Libuku Ili

Milambu yakutenta yakabumbulu

¹ Mwaami Lesa wakeeta Mose kuswa muTente ya Cipangano akwaamba ayi,

² “Lwiita bene Isilaeli ayi na umwi muntu wabenga mulambu, ulyeelete kuba mulambu wakaswa mulitanga lya ŋombe, mbelele nabi mpongo shakwe.

³ “Na utoobenga mulambu wakutenta kuswa mulitanga lya ŋombe shakwe, ulyeelete kuleta mucende utacite kampenda kali koonse. Ulyeelete kumuleta pamulyango wa Tente ya Cipangano kwaamba ayi nebo neMwaami Lesa nkootambule.

⁴ Ulyeelete kubika lyaansa pamutwi wakwe, lyalo ulaakutambulwa ayi ngumulambu wakukusha shibiibi shakwe.

⁵ Lyalo ulaakucaya mucende uyo apo kunembo lyangu neMwaami Lesa. Mpeeke bana bakwe Aloni bapailishi balaakusanseela bulowa mumbasu shoonse shone sha cipaililo cili pamulyango wa Tente.

⁶ Ndyeshi akamufuunde akumutimboola.

⁷ Lyalo baana basankwa bakwe Aloni mupailishi balaakubika nkuni pacipaililo akunyasha mulilo.

⁸ Mpomunyaawo balaakubika shipansha sha munyama uyo pamulilo kubikaawo amutwi alimwi amafuta.

⁹ Muntu uyo ulyeelete kusansha shamukati shoonse alimwi amyeendo mumaanshi. Mpeeke mupailishi ulaakutenta mulambu woonse pacipaililo ayi ngumulambu wakutenta. Bweema bwa mulambu uyo bulansangalasha neMwaami Lesa.

¹⁰ “Na muntu utoobenga mulambu kuswa mulitanga lya mbelele nabi mpongo shakwe, ulyeelete kubenga isankwa itacite kampenda kali koonse.

¹¹ Ulyeelete kwiicaila kumatwa lya cipaililo kunembo lya Mwaami Lesa. Mpeeke bapailishi balaakusanseela bulowa bwa njiyo kumbasu shoonse shone sha cipaililo.

¹² Ono muntu uyo ulyeelete kwiitimboola. Lyalo mupailishi ulaakubika shipansha shoonse pamulilo kubikaawo amutwi alimwi amafuta.

¹³ Ulyeelete kusansha shamukati shoonse alimwi amyeendo mumaanshi. Mpeeke mupailishi ulaakutenta mulambu woonse pacipaililo ayi ngumulambu wakutenta. Bweema bwa mulambu uyo bulansangalasha neMwaami Lesa.

¹⁴ “Na muntu utoobenga muyuni ayi ngumulambu wakutenta, ulyeelete kuba mpolobe nabi nkulimba.

¹⁵ Mpeeke mupailishi ulaakwiileta kucipaililo, akeeshongonone nshingo akutenta mutwi wa njiyo pacipaililo. Bulowa bwa njiyo bukatililwe kulubasu lwa cipaililo.

¹⁶ Muntu uyo ulyeelete kukusha cifuntwa ashamukati sha ncico, akushisowa kwicwe lya cipaililo uko kupukwitwa milota.

¹⁷ Kuswawaawo, ulaakwiicata kumapapaminwa akwiikwamuna ayi ipabuke kwakutatumuna mapapaminwa. Mpeeke mupailishi ulaakwiitenta pacipaililo yoonse ayi ngumulambu wakutenta. Bweema bwa mulambu uyu bulansangalasha neMwaami Lesa.