Bene Kolose 3 - Baibo Busansulushi Bwa Libuku Ili

¹ Ceebo mwakabushikwa pantu pomwi aKlistu, amubike myoyo yanu pashintu sha kwiculu, uko Klistu nkwaashiite kulubasu lwalulyo lwakwe Lesa.

² Amuyandoole shintu sha kwiculu, kuteshi sha mucishi ca panshi, sobwe.

³ Mukwiinga mwebo mwakafwa, aboobo buumi bwanu bulishisitwe pantu pomwi aKlistu muli Lesa.

⁴ Klistu mbobuumi bwanu, ono na akaboneke, amwebo mulaakuboneka pantu pomwi anguwe mubulemu bwakwe.

Buumi bwakale kale alimwi abupya

⁵ Amucaye lunkumbwa loonse lwa mucishi ca panshi ulo luli muli ndimwe, mbuli bufuule, kucita shintu shitaluleme, lunkumbwa lubiibi, miyeeyo ibiibi alimwi abupambi. Mukwiinga kupamba akwalo kulikoshenye akulambila shibumbwabumbwa.

⁶ Ceebo ca shintu sha mushobo wooyu, bukali bwakwe Lesa bulaakuba pabantu abo batamunyumfwili.

⁷ Kale kale mwakalinga mbuli mbabo, ndimwakalinga kushicita.

⁸ Sombi bulya mucileeke shoonse ishi, mbuli kukalala, kukalooka alimwi amiyeeyo ya lupato. Tamweelete kutukana nabi kusebensesha myaambo ibiibi.

⁹ Mutanoobecana mukwiinga mwashiya buumi bwanu bwakale kale amicito ya mbubo

¹⁰ akwinjila mubuumi bupya. Buumi ubu Mulengi wanu utoobubotesha lyoonse mucikoshanyo cakwe kwaamba ayi mumwishibe kabotu.

¹¹ Mubuumi bupya ubu taaku bupusano buliiwo pakati ka baJuda abaswamashi bakunsengwe, bakapalulwa abatana kupalulwa, batacite lushibo, beshinkondo baloondesha, pakati ka basha abaangulukite, sombi cinene nguKlistu mukwiinga lakwe nsheshoonse alimwi uli muboonse.

¹² Mwebo muli bantu abo Lesa mbwaakasuna akumusala kwaamba ayi mube bantu bakwe. Paceebo ceeco, mulyeelete kuba beshinkumbu, bacita kabotu, baliceesha, balibombya akuba bantu bacata myoyo.

¹³ Amunyumfwilane nkumbu akulekelelana womwi awomwi. Na umwi wabishisha mubye, ulyeelete kumulekelela bweenka mbuli Mwaami mbwaakamulekelela.

¹⁴ Pashintu shoonse ishi mulyeelete kuba alusuno, lwalo ndolucatanya shintu shoonse ishi, kwaamba ayi shilulame.

¹⁵ Luumuno Klistu ndwaapa, alweendeleshe myoyo yanu. Lesa wakamwiita kwaamba ayi mube aluumuno ndomunya ulu mukwiinga muli shipansha sha mubili womwi. Amube amyoyo yakulumba.

¹⁶ Maswi akwe Klistu aakalilile mumyoyo yanu lyoonse pakwiishanya alimwi akulwiitana cabusongo boonse. Amwiimbe nyimbo shakulumbaisha, shakulemeka Lesa alimwi anyiimbo shimwi sha Mushimu wakwe Lesa. Amwiimbile Lesa amyoyo yakulumba.

¹⁷ Nkokwaamba ayi shoonse nshemucita nabi kwaamba, mulyeelete kushicita muliina lya Mwaami Jesu akulumba Lesa Ishiwesu kwiinda muli nguwe.

Buumi bupya mucikwati

¹⁸ Nobanakashi, kamuliceesha kubameebaanu mukwiinga mwine Klistu mbwaaelete kucita.

¹⁹ Amwebo nobasankwa amusune bamakaanu, tamweelete kuba alunkutwe.

²⁰ Nobaana amwebo, mulyeelete kunyumfwila bashali banu mushintu shoonse mukwiinga ici ncecikondelesha Lesa.

²¹ Amwebo nobashali, mutanookalasha bana banu mukwiinga inga batyongooka.

²² Amwebo nobasha, mulyeelete kunyumfwila bamaami banu ba mucishi ca panshi mushintu shoonse. Mutanoobanyumfwilabo na mpobali kwaamba ayi bamuluumbe, sombi mubanyumfwile camoyo woonse ceebo mulalemeka Mwaami.

²³ Ono coonse cintu ncemutoocita, amuciciite amoyo womwi anga mutoocitila Mwaami Jesu, kuteshi bantu.

²⁴ Amwiingashile kwaamba ayi Mwaami ulaakumupa cilambu ncaakashomesha bantu bakwe. Anu Mwaami ngomutoosebensela nguKlistu.

²⁵ Sombi muntu woonse ucita shitaluleme, ulaakoomboloshekwa kweelana abubi bwakwe mukwiinga Lesa taasalululi.