Bene Galatiya 5 - Baibo Busansulushi Bwa Libuku Ili

Shalwaanguluko lwa bwine Klistu

¹ Klistu wakatwaangulula kwaamba ayi twaanguluke cancinencine. Anu amuyume kwaamba ayi mutakabooleli mubusha.

² Amunyumfwishe! Nebo nePaulo ntoomulwiita ayi na musumine kwaamba ayi mupalulwe, nkokwaamba ayi Klistu taacite mpindu kuli ndimwe.

³ Ntoomulwiita alimwi ayi na muntu uli woonse wasumina kupalulwa, ulyeelete kukonkela Milawo yoonse.

⁴ Ono mwebo nomusuni kululamikwa pameenso akwe Lesa kwiinda mukukonkela Milawo, mwamanisha cibusa calinga pakati lyanu alimwi aKlistu. Aboobo mwakaswa muluse lwakwe Lesa.

⁵ Sombi kwiinda muMushimu Usalashi usebensa mulushomo lwesu, swebo tutoolangila kwaamba ayi Lesa ulaakutululamika.

⁶ Mukwiinga swebo sotuli muli Klistu Jesu, kupalulwa nabi kutapalulwa taaku mbokubete, sombi cinene nkuba alushomo kwiinda mulusuno.

⁷ Mwakalinga kwisa kabotu abuumbi muMakani Abotu! Ino ngani wakamukasha kunyumfwila shalushinisho?

⁸ Kunyengelelwa kwanu uku takukwe kuswa kuli Lesa umwiita.

⁹ Kweelana ambobaamba ayi, “Cimena ciniinibo cilafutumusha fulaulo woonse.”

¹⁰ Ono ceebo cakwaamba ayi tuli womwi muMwaami wesu Jesu Klistu, ndashoma kwaamba ayi teshi mukakonkele miyeeyo imwi ipusene. Ono lakwe uyo utoomufulunganya, nabi na ngani, Lesa ulaakumupa mulandu.

¹¹ Nobamakwesu, ono na nebo ncishimikila shakupalulwa ceebonshi bantu bacimpensha? Nendalinga kushimikila boobo, naakwiinga bantu kabatapikishi kushimikila shalufu lwakwe Jesu lwa pamucilingano.

¹² Inga cabota bantu abo batoomufulunganya kulitungula beene.

¹³ Mwebo nobamakwesu, Lesa wakamwiita kwaamba ayi mwaanguluke. Anu amucenjele kwaamba ayi lwaanguluko ulu lutamulengeshi kwikala buumi bwa kubisha, sombi mucafwane womwi awomwi mulusuno.

¹⁴ Mukwiinga Milawo yoonse ilasansululwa mumulawo womwi wakwaamba ayi, “Suna mubyo bweenka mboolisuni omwiine.”

¹⁵ Ono na kamwikala anga mbanyama ba muluundu abo balumana akulyaana, mulyeelete kucenjela mukwiinga inga mwaakunyonyoolana nobeene.

Shamilimo ya buntu alimwi ashisepo sha Mushimu Usalashi

¹⁶ Nceentokwaamba nceeci, amuleke Mushimu Usalashi umutanjilile. Lyalo ndyeshi mubule kukonkela buumi bwa buntu ubo busuni kubisha.

¹⁷ Mukwiinga buumi bwa buntu ubo bulisuni sheesho shitasuni Mushimu Usalashi, ashalo shisuni Mushimu Usalashi teshi nshesheesho shisuni buumi bwa buntu. Shintu shobilo ishi tasheendelani, nkokwaamba ayi inga tamuciti shibotu isho nshemusuni kwaamba ayi mucite.

¹⁸ Sombi na Mushimu Usalashi ngoomutanjilila, nkokwaamba ayi tamweendeleshekwi aMilawo.

¹⁹ Ono milimo ya buntu ilibwenekete patuba, njeeyi, bufuule, kutanoosalalite, kutalitibuka, kucita shintu shitaluleme,

²⁰ kulambila shibumbwabumbwa, buloshi, kutanyumfwana, kupikishanya, munyono, bukali, kuliyanda, kupansaana alimwi akulipatula,

²¹ lunkumbwa, bucakolwa alimwi ashimwi sha mushobo wooyu. Ntoomucenjeshaako ono bweenka mbuli mbondakamucenjeshawo kale ayi abo bacita sha mushobo wooyu teshi bakenjileewo muBweene bwakwe Lesa.

²² Sombi shisepo sha Mushimu Usalashi, ndusuno, kusangalala, luumuno, kukomenya moyo, nkumbu, kubota moyo, kushomeka,

²³ kulibombya alimwi akulitibuka. Taaku mulawo ukasha shintu ishi.

²⁴ Ono abo bali kulubasu lwakwe Klistu bakapopa buumi bwa buntu alimwi asheesho shoonse shisuni buumi ubo pamucilingano.

²⁵ Ono na Mushimu Usalashi ngootupa buumi, nkokwaamba ayi ngoweelete kututanjilila mushintu shoonse.

²⁶ Tatweelete kunoolisumpula, kunookalashanya nabi kunoonyumfwilana munyono.