Bene Galatiya 4 - Baibo Busansulushi Bwa Libuku Ili

¹ Nceentokwaamba nceeci, mwaana weelete kubwesa buboni bwa baishi, na kaacili mwanike, taapuseneewo amusha nakubi kwaamba ayi buboni boonse mbwaakwe.

² Mwaana uyo ulyeelete kunyumfwila bamulela alimwi abaabo beshikulama buboni bwakwe kushikila ciindi baishi ncebakabamba.

³ Aswebo mbotwakalinga bweenkoobo katutana kwishiba Klistu, twakalinga basha ba nkalilo ya buumi bwa buntu.

⁴ Sombi ciindi ceelete ndicakashikila, Lesa wakatuma Mwanaakwe uyo wakashalwa mumwanakashi alimwi Mwaana uyo wakalinga kukonkela aMilawo ya baJuda.

⁵ Wakacita boobo kwaamba ayi apulushe baabo bakalinga basha ba Milawo ayi tube bana bakwe Lesa.

⁶ Ono mukwiinga tuli bana bakwe, Lesa wakatuma Mushimu wa Mwanaakwe mumyoyo yesu. Walo ngoolengesha kwaamba ayi katwiita ayi, “Aba!” nkokwaamba ayi, “Ta!”

⁷ Paceebo ceeco, tamucibete basha, sombi muli bana bakwe Lesa. Nkokwaamba ayi mbomuli baana, Lesa ulaakumupa shoonse sheelete baana.

Paulo mbwaakakalalila bene Galatiya

⁸ Kale kale Lesa temwakalinga kumwishiiwo, aboobo mwakalinga kusebensela shintu shitabete Lesa.

⁹ Sombi bulya Lesa mulimwishi, nabi ŋambe ayi Lesa ulimwishi, ino ono mutooboola buyani kukwiisha kutacite nkusu alimwi ampindu? Ceebonshi mulisuni kuba basha ba nshisho alimwi?

¹⁰ Mulabona nshiku shimwi ayi nshinene, amyeenshi, shiindi sha mumwaaka alimwi amyaaka imwi.

¹¹ Ndalisukama pali ndimwe mukwiinga ntooyeeya ayi mpashi milimo njendakacita pali ndimwe taaku mbweebete.

¹² Nobamakwesu, ndamusenga ayi mube mbuli ndime mukwiinga anebo ndaba mbuli ndimwe. Tamukwe kumbishishaawo.

¹³ Mwebo mulishi kwaamba ayi kataanshi ndakaba aciindi cakumushimikila Makani Abotu mukwiinga ndakaciswa.

¹⁴ Nakubi kwaamba ayi bulwashi bwangu bwakamupensha, tamukwe kunsuula nabi kunaama. Sombi mwakantambula anga ngumunjelo wakwe Lesa nabi anga nguKlistu Jesu mwiine.

¹⁵ Nciinshi cacitika, nobantu nomwakalinga kukondetwe bobulya? Mukwiinga ndishinishite kwaamba ayi necakalinga kukonsheka naakwiinga meenso anu mwalobolaamo akumpa.

¹⁶ Sa ono ndaba mulwani wanu mukwiinga ndamulwiita shalushinisho?

¹⁷ Beshikukonkela kwiisha kwa baJuda abo batoobonesha lusuno lunene kuli ndimwe, sombi lusuno lwabo taaku mbolubete. Balisunibo kwaamba ayi bamupatule kuli ndiswe ayi mubacafweeko amoyo woonse.

¹⁸ Ncibotu kucita cintu amoyo woonse na muyeeyo wakucita boobo kooli ubotu alimwi mulyeelete kucita boobo lyoonse kuteshibo na ndi andimwe.

¹⁹ Nobana bangu, bweenka mbuli mwanakashi mbwaanyumfwa kucisa na mumala mwabuka, anebo mbontoonyumfwa ceebo ca ndimwe kushikila buumi bwa buKlistu buboneke cancinencine muli ndimwe.

²⁰ Mbocishini ciboteeko nendalingaanu bulya! Mukwiinga nendasebensesha maswi amwi. Mwamfulunganya maano.

Cikoshanyo cakwe Aga alimwi aSaala

²¹ Ono amundwiite mwebo nomusuni kweendeleshekwa aMilawo, sa tamunyumfwishi Milawo iyo nsheyaamba?

²² Cililembetwe muMilawo ayi Abulaamu wakalinga kucite baana basankwa bobilo. Umwi wakamushalila mumwanakashi musha. Alakwe umwi mumwanakashi wakalinga kwaangulukite.

²³ Mwanaakwe wa mumwanakashi musha wakashalwa munshila ishalilwamo baana boonse, sombi mwaana wa mumwanakashi uyo wakalinga kwaangulukite wakashalwa ceebo ca kushomesha kwakwe Lesa.

²⁴ Makani aya ali anga ncikoshanyo. Banakashi bobilo aba baleemikanina shipangano shobilo. Umwi ulaswa kuKalundu ka Sinayi, nkokwaamba ayi nguAga alimwi bana bakwe mbasha.

²⁵ Aga uleemikanina Kalundu ka Sinayi kali mucishi ca Alebya, alimwi ulikoshenye andabala inene ya Jelusalemu ya cecino ciindi, mukwiinga yalo abantu bekalaamo bali mubusha.

²⁶ Sombi Jelusalemu ya kwiculu iyo yaangulukite, ngonyinawesu.

²⁷ Mukwiinga muMalembo akwe Lesa mulilembetwe ayi, “Kondwa webo oŋumba! Tangala akoolobesha cakusangalala, webo nootakwe kunyumfwawo shicisa pakushala. Mukwiinga baana ba mwanakashi wakashiyikwa aibaye, mbaanji, kwiinda baabo ba mwanakashi uli aibaye.”

²⁸ Ono mwebo nobamakwesu, muli bana bakwe Lesa kwiinda mukushomesha kwakwe, bweenka bwakalinga Isaki.

²⁹ Paciindi ico, mwaana uyo wakashalwa mbuli baana boonse, wakalinga kupensha wooyo wakashalwa munkusu sha Mushimu Usalashi. Mbweekoobo mbocibete acecino ciindi.

³⁰ Sombi Malembo akwe Lesa alaamba ayinshi? Alaamba ayi, “Tanda mwanakashi musha alimwi amwanaakwe musankwa. Mukwiinga mwaana wa mwanakashi musha inga taabwesiko buboni bwa baishi pantu pomwi amwaana wa mwanakashi waangulukite.”

³¹ Paceebo ceeco nobamakwesu, swebo tatwishi baana ba mwanakashi musha, sombi tuli baana ba mwanakashi waangulukite.