Bene Galatiya 3 - Baibo Busansulushi Bwa Libuku Ili

Sa muMilawo na mulushomo?

¹ Mwebo nobene Galatiya baluya! Anu ngani wakamulowa? Nditwakamushimikila shapali Jesu Klistu, twakamusansulwita patuba ayi wakapopwa pamucilingano.

² Ndisuni kwaamba ayi mundwiitebo cintu comwi. Sa mwakatambula Mushimu Usalashi kwiinda mukukonkela Milawo nabi mukunyumfwa akushoma Makani Abotu?

³ Ino inga mwaba buyani baluya boobo? Mwebo mwakataanguna kushoma munkusu sha Mushimu Usalashi, ono sa mutooyanda kumanisha mulimo uyu kwiinda munkusu shanu nobeene?

⁴ Sa shoonse shintu shibotu shakamucitila Lesa taaku mboshibete? Nshintooshoma boobo.

⁵ Sa Lesa uyo wakamupa Mushimu akucita shaankamiko pakati kanu, wakacita boobo mukwiinga mwakakonkela Milawo nabi ayi mwakanyumfwa Makani Abotu akwaashoma?

⁶ Amuyeeye bwaamba Malembo akwe Lesa pali Abulaamu ayi, “Wakashoma Lesa, aboobo kwiinda mulushomo lwakwe, Lesa wakamwaamba ayi uliluleme.”

⁷ Mulyeelete kwishiba ayi abo bashoma mbamulunyungu lwakwe Abulaamu bancinencine.

⁸ Lesa wakaambila limwi muMalembo akwe ayi ulaakululamika baswamashi bakunsengwe kwiinda mulushomo lwabo. Anu Lesa wakashimikila limwi Makani Abotu kuli Abulaamu kwiinda muMalembo akwe ayi, “Muli ndiwe, Lesa ulaakupa coolwe kumishobo yoonse ya bantu.”

⁹ Abulaamu wakashoma, mpeeke Lesa wakamupa coolwe. Aboobo boonse bashoma balapekwa coolwe bweenka bwakapekwa Abulaamu.

¹⁰ Paceebo ceeco, boonse abo basuni kululamikwa pameenso akwe Lesa kwiinda mukukonkela Milawo, balishinganishitwe. Mukwiinga Malembo akwe Lesa alaamba ayi, “Uyo woonse utaciti shoonse shilembetwe muMilawo yakwe ulishinganishitwe kuli Lesa.”

¹¹ Ono twaboona ayi taaku muntu nabi womwi ululamikwa pameenso akwe Lesa kwiinda mukukonkela Milawo ceebo Malembo akwe Lesa alaamba ayi, “Eenkabo uyo Lesa ngwaalulamika kwiinda mulushomo ngweshi akabe abuumi butamaani.”

¹² Sombi Milawo teekumiteeko kulushomo ceebo Malembo akwe Lesa alaamba ayi, “Uyo woonse ucita shoonse shilembetwe muMilawo ulaakuba abuumi.”

¹³ Klistu wakatulubula kumashingo aswa muMilawo ndyaakashinganwa ceebo cesu mukwiinga Malembo akwe Lesa alaamba ayi, “Ulishinganishitwe woonse uyo upopwa pacisamu.”

¹⁴ Klistu wakacita boobo kwaamba ayi coolwe Lesa ncaakashomesha Abulaamu cipekwe akubaswamashi bakunsengwe boonse kwiinda muli nguwe. Ncakwiila akwaamba ayi kwiinda mulushomo tukatambule Mushimu Usalashi ngwaakashomesha Lesa.

Milawo acipangano

¹⁵ Nobamakwesu, ntooyanda kumulwiitako cikoshanyo ca cintu ncetucita nshiku shoonse. Na bantu bobilo bapangana akusuminishanya pacikani cimwi, taaku muntu weenga wapwaya cipangano ico nabi kunungaako.

¹⁶ Anu Lesa wakashomesha Abulaamu shintu shimwi alimwi aumwi wamulunyungu lwakwe. Taakwe kwaamba ayi, “Bamulunyungu lwako” anga mbaanji, sombi ayi, “Wamulunyungu lwako” ceebo wakalinga kwaambabo muntu womwi, Klistu.

¹⁷ Nceentokwaamba nceeci. Lesa wakapangana aAbulaamu akumushomesha ayi teshi akacilubeeko cipangano ico. Aboobo, Milawo yakapekwa ndipakeenda myaaka ili myaanda yone amakumi otatwe taikoonshi kucaya cipangano ico alimwi aceeco ncaakashomesha Lesa.

¹⁸ Ono na Lesa ulapa muntu cipo ceebo wakakonkela Milawo, nkokwaamba ayi cipo ico tacipekwi ceebo Lesa wakatushomesha. Sombi Lesa wakapa Abulaamu coolwe ceebo wakamushomesha ayi ulaakumupa.

¹⁹ Ino Milawo yakalinga kucite mulimonshi? Lesa wakabika Milawo kwaamba ayi bantu beshibe shibiibi shabo kushikila luseke ulo lwa mulunyungu lwakwe Abulaamu lwakaambwa mucipangano ndilwakesa. Lesa wakapa bantu Milawo kwiinda mubaanjelo bakwe alimwi amuntu uyo shikwiimikana pakati.

²⁰ Sombi tapayandiki shikwiimikana pakati umwi na kapalibo muntu womwi alimwi Lesa ngomwibo.

Milawo nceisebensa

²¹ Sa nkokwaamba ayi Milawo ilapikisha sheesho Lesa nshaakashomesha? Sobwe, napaceyuubo! Mukwiinga bantu nebakalinga kuba abuumi kwiinda mukukonkela Milawo, naakwiinga muntu woonse wakalulamikwa pameenso akwe Lesa kwiinda mukukonkela Milawo iyo.

²² Sombi Malembo akwe Lesa alaamba ayi bantu boonse bali munkusu sha bubi, kwaamba ayi uyo woonse ushoma muli Jesu Klistu akatambule cipo ico Lesa ncaakashomesha.

²³ Kacitana kushika ciindi ca lushomo ulu, twakalinga anga mbakaili ba Milawo kulindilila kwaamba ayi lushomo ulu lukayubululwe.

²⁴ Nkokwaamba ayi Milawo yakapekwa kuli ndiswe ayi itweendeleshe kushikila Klistu ndyaakesa kwaamba ayi Lesa atululamike kwiinda mulushomo.

²⁵ Ono bulya mukwiinga tuli muciindi ca lushomo, nkokwaamba ayi tatucibete mubweendeleshi bwa Milawo.

²⁶ Mwebo noonse muli bana bakwe Lesa mukwiinga mulashoma muli Klistu Jesu.

²⁷ Paceebo ceeco, mwebo nomwakabombekwa akucatana pantu pomwi aKlistu, muli anga mulifwete buumi bwakwe Klistu.

²⁸ Aboobo taapu bupusano buliiwo pakati ka baJuda abaswamashi bakunsengwe, pakati ka basha alimwi abaangulukite nabi pakati ka basankwa alimwi abanakashi ceebo noonse muli womwi muli Klistu Jesu.

²⁹ Na muli bakwe Klistu, nkokwaamba ayi muli bamulunyungu lwakwe Abulaamu, beelete kutambula sheesho Lesa nshaakashomesha.