Bene Galatiya 2 - Baibo Busansulushi Bwa Libuku Ili

Batumwi bamwi mbobakatambula Paulo

¹ Ndipakeenda myaaka likumi ayone, ndakaboola kuJelusalemu pantu pomwi aBanabasi, kubikaawo aTaitasi.

² Ndakaya kooko mukwiinga Lesa wakanjubulwita ayi ndyeelete kuya. Mulibungano nditwakacita cabushishi abamatanjilili, ndakabasansulwita Makani Abotu ngoonshimikila kubaswamashi bakunsengwe. Ndakacita boobo ceebo ndakalinga kuyeeya ayi milimo njeencita anjendakacita itakabibo ya lutu.

³ Nakubi kwaamba ayi Taitasi wakalinga muGiliki, tabakwe kumukakatisha ayi apalulwe,

⁴ nabi bamwi bakalinga kusuni ayi acitwe boobo. Bantu aba bakalilubyalubya akwinjila mulikoto lya bashomi kwaamba ayi basense lwaanguluko ndotucite muli Klistu Jesu. Bakalinga kusuni kwaamba ayi batulengeshe kuba basha.

⁵ Sombi tatukwe kubashiilawo musena napaceyi ceebo twakalinga kusuni kwaamba ayi tumusungile lushinisho lwa Makani Abotu.

⁶ Ono abo bakalinga kwiitwa ayi bamatanjilili (tacicite mulandu na bakalinga baani ceebo Lesa taasalululi), abo bamatanjilili mbomunya tabakwe kunungaawo ashimwi shakwaamba ayi njiishe.

⁷ Sombi bakabona ayi Lesa wakampa mulimo wa kushimikila Makani Abotu kubaswamashi bakunsengwe bweenka mbwaakapa Pita mulimo wa kushimikila baJuda.

⁸ Mukwiinga Lesa uyo wakalengesha ayi Pita abe mutumwi kubaJuda munkusu shakwe, ngowakalengesha anebo ayi mbe mutumwi kubaswamashi bakunsengwe.

⁹ Mpeeke Jemusi, Pita aJoni, abo bakalinga kwiitwa ayi mbamatanjilili ba bashomi, bakashinisha ayi Lesa muluse lwakwe wakampa mulimo uyu. Kuswawaawo, bakacata Banabasi anebo mumaansa kutondesha bwanabwankashi bwesu. Twakanyumfwana ayi Banabasi anebo tusebensele kubaswamashi bakunsengwe, balo kubaJuda.

¹⁰ Ncebakasengabo ncakwaamba ayi tutakacileeki kucafwa bakandu mulikoto lyabo. Anebo nceceeco ncendakalinga kusunishi bunene kucita.

Paulo mbwaakapikisha Pita kuAntyoki

¹¹ Sombi Pita ndyaakashika kuAntyoki, ndakamupikisha pameenso abantu boonse ceebo wakabisha.

¹² Kabatana kushika basankwa bamwi mbwaakatuma Jemusi, Pita wakalinga kulya abaswamashi bakunsengwe bashominyina. Sombi ndibakashika basankwa abo, wakalipatula akucileka kulyaabo mukwiinga wakalinga kuloonda baabo bakalinga kusuni ayi baswamashi bakunsengwe banoopalulwa.

¹³ Mpeeke baJuda bashomi bamwi boonse bakacita bweenka ubo, kucana alakwe Banabasi wabakonkelesha.

¹⁴ Ono ndindakabona ayi tabatookala kweelana alushinisho lwa Makani Abotu, ndakaambila Pita pameenso abantu boonse ayi, “Webo uli muJuda, sombi walinga kwikala anga ngumuswamashi wakunsengwe. Ino inga wakakatisha buyani baswamashi bakunsengwe kwikala anga mbaJuda?”

Bantu boonse balapulushikwa kwiinda mulushomo

¹⁵ Ncakwiila swebo tuli baJuda, tatubete baswamashi bakunsengwe bamucita shibi.

¹⁶ Nakubi boobo swebo tulishi kwaamba ayi muntu inga taalulami pameenso akwe Lesa kwiinda mukukonkela Milawo, sombi kwiinda mukushoma muli Jesu Klistu. Aswebo twakashoma muli Jesu Klistu kwaamba ayi tululamikwe pameenso akwe Lesa, kuteshi mukukonkela Milawo. Taaku eshi akalulamikwe kwiinda mukukonkela Milawo.

¹⁷ Ono na swebo sotusuni kululamikwa kwiinda muli Klistu, twacanika ayi tuli bamucita shibi bweenka mbuli baswamashi bakunsengwe, sa nkokwaamba ayi nguKlistu utoolengesha ayi tubishe? Tau, napaceyuubo!

¹⁸ Ono na ndatalika alimwi kukonkela nshila ya Milawo yeenka njendakakaka, ntootondesha ayi ndishi kusotoka Milawo.

¹⁹ Kweelana akukonkela Milawo, nebo ndifwite ceebo Milawo yeenka iyo yakancaya kwaamba ayi nsebensele Lesa amoyo wangu woonse.

²⁰ Ndakapopwa pantu pomwi aJesu pamucilingano. Aboobo buumi ubu mboonkala teshi bwangu, sombi nguKlistu uyo ukala muli ndime. Buumi ubu muli ndime mbwakushoma muMwanaakwe Lesa, uyo wakansuna abuumbi akwaaba buumi bwakwe ceebo ca ndime.

²¹ Nshintookaka luse lwakwe Lesa. Ceebo muntu na inga walulamikwa pameenso akwe Lesa kwiinda muMilawo, nkokwaamba ayi Klistu taaku ncaakafwita.