Bene Filipi 4 - Baibo Busansulushi Bwa Libuku Ili

Milasho imwi

¹ Ono mwebo nobamakwesu, nomusunikwi alimwi ndamuyeeya abuumbi. Mwebo mulansangalasha. Paceebo ceeco ndatangala cankusu ceebo ca ndimwe. Anu ubo nobamakwesu mbomweelete kuyuma muMwaami.

² Ntoosenga Yuwodia aSintiki kwaamba ayi banoonyumfwana mukwiinga mbamukowa muMwaami.

³ Ndakusenga alimwi webo omweensuma muncito kwaamba ayi ubacaafwe balutundu aba. Bakasebensa camaansa obilo anebo mukushimikila Makani Abotu, kubikaawo aKilementi abamwi boonse mbondakalinga kusebensaabo abo bacite meena alembetwe mulibuku lya buumi.

⁴ Amusangalale muMwaami lyoonse alimwi ndaamba ayi, amusangalale!

⁵ Amutondeshe buumi bwakulibombya kubantu boonse ceebo Mwaami Jesu uli pafwaafwi kwisa.

⁶ Mutanoolisukama pacintu nabi comwi, sombi mumipailo yanu yoonse amusenge shintu shoonse nshemutacite kuli Lesa. Kamusenga amoyo wakulumba lyoonse.

⁷ Aboobo luumuno lwakwe Lesa ulo lwiinda pabusongo bwa bantu boonse, lulaakulama myoyo yanu alimwi amiyeeyo yanu muli Klistu Jesu.

⁸ Cakweelaako nobamakwesu, kamuyeeya shintu isho shibotu sheelete kulumbwa, mbuli shintu shalushinisho, shilemekwa, shiluleme, shitacite kampenda, shiboneka kabotu alimwi ashintu shoonse shabulemu.

⁹ Kamucita shintu nshemwakeeya akutambula kuswa kuli ndime, kubikaawo anshemwakanyumfwa alimwi anshemwakabona kaancita. Lyalo Lesa upa luumuno ulaakuba amwebo.

Paulo mbwaakalumba shipo nshibaamupa

¹⁰ Ndisangalete abuumbi muMwaami kwaamba ayi ciindi cilaamfu mbuli ceeci ceenda, mwatalika alimwi kutondesha ayi mulanjeeya. Nshintokwaamba ayi mwakalinga mwacileka kunjeeya, sombi mwebo mwakabulabo ciindi cakwaamba ayi muntondeshe.

¹¹ Nshintokwaamba boobo mukutongooka kwaamba ayi kuli ncendabula mukwiinga nebo ndakeeya ayi nkooncite nkaanji.

¹² Ndibwishi bukandu alimwi abubile, mushoonse ndakeeya cintu cishisitwe ciliimo, nkutatongooka mukukuta nabi kufwa nsala, mukuba ashiinji nabi kubula.

¹³ Ndakonsha kucita shintu shoonse mukwiinga Klistu ngoompa nkusu.

¹⁴ Nakubi boobo mwakabotesha kuncafwa mumapensho angu.

¹⁵ Mwebo nobene Filipi, mulishi kabotu kwaamba ayi nebo ndindakaswa kuMakedoniya munshiku shitaanshi shakushimikila Makani Abotu, tepakalinga coonde nabi comwi cakancafwa pasheesho nshindakalinga kweelete kulipila akutambula. Ncakwiila ndimwebo nweenka.

¹⁶ Ndindakalinga kuTesalonika, mwakantumina lucafwo loonse ndundakalinga kusuni paciindi aciindi.

¹⁷ Teshi kwaamba ayi ndisuni kunootambulabo shipo, sombi ayi mpindu yanu ikomeneneeko.

¹⁸ Ndakatambula shoonse nshimwakantumina, kwalo kwiine shafula. Ndicite shoonse shiyandika mukwiinga ndatambula kuswa kuli Epafuloditasi shoonse nshimwakantumina. Ishi shilibo anga ncipo cinunkila kabotu capekwa kuli Lesa, mulambu uyo utambulwa kuli nguwe alimwi ukondelesha.

¹⁹ Paceebo ceeco, Lesa wangu ulaakumupa shoonse nshemubula kwiinda mububile bwakwe buunji bwa muli Klistu Jesu.

²⁰ Kuli Lesa Ishiwesu akube bulemu lyoonse alyoonse. Ameni!

Kwaansha kwakweelaako

²¹ Amubaanshe boonse bantu bakwe Lesa muli Klistu Jesu. Bamakwesu boonse bali anebo bamwaansha.

²² Bantu bakwe Lesa boonse kuno bamwaansha, bunene bunene abo basebensa kuŋanda ya Muleli munene wa kuLoma.

²³ Luse lwa Mwaami Jesu Klistu lube amwebo noonse.