Bene Filipi 3 - Baibo Busansulushi Bwa Libuku Ili

Bululami bwancinencine

¹ Ono cakweelaako nobamakwesu, kamusangalala muMwaami Jesu. Nshileemi kulemba shintu nshendakamulembelaawo kale mukwiinga maswi aya alaakumucafwa.

² Amucenjele abantu bacita shibiibi abo bali anga mbakabwa, abo bantu bacikakatisha kupalulwa.

³ Swebo ndiswe twakapalulwa cancinencine sotutanjililwa aMushimu Usalashi mukulambila Lesa akusangalala muli Klistu Jesu. Aboobo tatushomi shapacishi ca panshi, sobwe.

⁴ Teshi kwaamba ayi nebo ndabuula cintu cakusangalalilaamo. Na kuli muntu uyeeya ayi ulicite shintu sha mushobo uyo, nebo ndamwiindaawo.

⁵ Nebo ndakapalulwa kaancite nsondo abushiku bomwi. Ndi mwine Isilaeli kukushalwa kwangu, mukowa wakwe Benjameni. Ndakaswa kubulowa bwiine bwa bamaEbulu. Ono kwaamba shakukonkela milawo ya baJuda nebo ndakalinga muFalisi.

⁶ Ndakalinga shilunkutwe mukupensha coonde. Kwaamba shabululami buswa mukukonkela Milawo yeenka, ndakaboneka anga ngumuntu utacite shibiibi.

⁷ Nakubi boobo ceebo cakwe Klistu, shoonse nshendakalinga kubona ayi shilicite mpindu, ono ndacana ayi taaku mboshibete.

⁸ Ncakwiila shintu shoonse ishi nshakusowabo tasheelani ampindu yakwishiba Klistu Jesu, Mwaami wangu. Ceebo ca nguwe shoonse ndashisowa. Ndayeeya ayi taaku mboshibete mukwaamba ayi ntambule Klistu

⁹ alimwi akucanika muli nguwe. Nshiliyeeyeli kwaamba ayi ndiluleme kwiinda mukukonkela Milawo, sombi bululami bwangu bulacanika kwiinda mukushoma Klistu. Bululami ubu buswa kuli Lesa bulapekwa kwiinda mulushomo.

¹⁰ Ndisuni kwishiba Klistu ankusu shakubuka kwakwe kuswa kubafu, kukoshanyaakwe mumapensho akuba mbuli nguwe mulufu lwakwe.

¹¹ Ndacita boobo kwaamba ayi anebo nkabuke kuswa kubafu akuba abuumi butamaani.

Kucica lubilo kushikila kumamanino

¹² Nshintokwaamba ayi ndashitambula kale, sombi ntoocica kwaamba ayi nkatambule shoolwe ishi mukwiinga ncaakancatila Klistu Jesu ayi mbe waakwe.

¹³ Nobamakwesu, nshintooyeeya ayi ndashicana kale, sombi cintu cinene nceencita nkushiya shoonse shili kwisule akusukamabo shili kunembo.

¹⁴ Aboobo ndacicila kushika kumeelelesho kwaamba ayi nkatambule cilambu kwiculu ncakatwiitila Lesa kwiinda muli Klistu Jesu.

¹⁵ Ono soonse sotukomete mulushomo tulyeelete kuba amiyeeyo ya mushobo uyu. Na kakuli bamwi pakati kanu bacite miyeeyo ipusene, shoonse isho Lesa ulaakumuyubulwita.

¹⁶ Aboobo nabi caba buyani, atwikale kweelana aciimo ca lushomo lwesu ici ncetwashikaamo.

¹⁷ Nobamakwesu, kamwiiya ndime alimwi mubalabilile abo bantu beenda munshila njetwakamwiisha.

¹⁸ Ndamulwiita lyoonse mankanda maanji alimwi ntekubooshaawo kaandila. Kuli bantu baanji batondesha mubuumi bwabo ayi mbalwani kumakani akwe Klistu pamucilingano.

¹⁹ Kumeelelesho balaakunyonyoolwa mukwiinga lesa wabo nshintu shisangalasha mubili. Aboobo balo balasangalalila mushintu isho sheelete kubapa nsoni alimwi balayeeyabo shintu sha pacishi ca panshi.

²⁰ Swebo ncakwiila kumisheesu kwiine kwiine nkwiculu alimwi tulalangila Mupulushi wesu Mwaami Jesu Klistu kuswa nkomunya uko.

²¹ Lakwe ulaakusandula mibili yesu ilefukite ya buntu kwaamba ayi ikabe mbuli mubili wakwe wa bulemu. Ulaakucita boobo munkusu shakwe isho shikoma shintu shoonse akushilela.