Bene Filipi 1 - Baibo Busansulushi Bwa Libuku Ili

¹ Ndime Paulo alimwi aTimoti basebenshi bakwe Klistu Jesu. Tutoolembela ndimwe noonse nobantu bakwe Lesa muli Klistu Jesu nomuli muFilipi, pantu pomwi abamatanjilili ba coonde abacafwi.

² Luse aluumuno shibe amwebo kuswa kuli Lesa Ishiwesu aMwaami Jesu Klistu.

Paulo mbwaakapailila coonde ca kuFilipi

³ Ndalumba Lesa wangu lyoonse ndyeemuyeeya.

⁴ Mumipailo yangu yoonse njeemupaililaako, ndalumba Lesa akusangalala

⁵ mukwiinga wa lubasu ulu ndomucite mukushimikila Makani Abotu, kuswa bushiku mbomwakaatambula kushikila asunu.

⁶ Ndishinishite kwaamba ayi Lesa wakatalika ncito ibotu muli ndimwe ulaakutolelela akwiimanishisha paBushiku ubo aakuboola Klistu Jesu.

⁷ Ndamuyeeya lyoonse mukwiinga ndimusuni alimwi cililuleme kuli ndime kunyumfwa boobo. Ndyeembete muntolongo nabi ciindi cakwiimikanina akuyumya Makani Abotu mumyoyo ya bantu boonse, noonse mulaba andime muluse lwakwe Lesa.

⁸ Lesa inga wambeta bukamboni kwaamba ayi ndamuyeeya abuumbi mukwiinga ndimusuni amoyo wangu woonse alusuno luli mbuli lwakwe Klistu Jesu mwiine.

⁹ Ndapaila ayi mukomene mulusuno, lushibo lwancinencine alimwi akunyumfwishisha kwanu kwa shintu shoonse,

¹⁰ kwaamba ayi mukakonshe kusala bwikaalo bwiindaawo kubota. Lyalo mulaakwaanguluka kuswa kububi boonse akutumpenda paBushiku ubo aakuboola Klistu.

¹¹ Buumi bwanu bulaakutondesha micito ya bululami, iyo iswabo kuli Jesu Klistu, kwaamba ayi boonse balemeke akulumbaisha Lesa.

Buumi kuli ndime nguKlistu

¹² Nobamakwesu, ntooyanda kumwishibisha ayi shakacitika kuli ndime shacafwilisha abuumbi kwaamba ayi Makani Abotu anyumfwike kubantu baanji.

¹³ Aboobo balishi boonse beshikulindilila ŋanda ya muleli wa kuLoma abamwibo boonse bali kokuno kwaamba ayi ndyaangitwe ceebo cakwe Klistu.

¹⁴ Peculu lya waawo kwaangwa kwangu kwalengesha ayi bamakwesu baanji muli Klistu babe ankusu shakushimikila maswi akwe Lesa cakutaboola pesule akubula boowa.

¹⁵ Ncakwiila nkobali bamwi bashimikila pali Klistu mukwiinga wa munyono akusuna kupikishanya, sombi nkobali bamwi bashimikila amoyo woonse.

¹⁶ Aba balashimikila calusuno mukwiinga balishi ayi Lesa wakampa ncito yakwiimikanina Makani Abotu.

¹⁷ Ono bamwi abo tabashimikili pali Klistu calushinisho mukwiinga balilisuni beene. Aboobo balisuni kunjilikilawo mapensho ndyeencili muntolongo.

¹⁸ Tacicite mulandu! Cintu cinene ncakwaamba ayi mububeshi nabi mulushinisho Jesu Klistu utooshimikilwa. Paceebo ceeco ndisangalete. Ee, ndanoosangaletebo lyoonse

¹⁹ mukwiinga ndishi ayi kwiinda mumipailo yanu alucafwo lwa Mushimu wakwe Jesu Klistu, ndaakwaangululwa.

²⁰ Ntoolangila amoyo woonse kwaamba ayi kutakabi nabi comwi ceshi cikanenshe nsoni. Aboobo ntooyandishisha kwaamba ayi mbe ankusu sheelete bulya, mbuli lyoonse ayi Klistu alemekwe muli ndime, mubuumi nabi mulufu.

²¹ Buumi kuli ndime nguKlistu alimwi alwalo lufu nimpindu.

²² Na kubukila buumi kulampa ciindi cakusebensa ncito itondesha shisepo, anu nceenga ndasalaawo nshicishi.

²³ Ndacata mambili. Cintu nceensuni bunene nkuswaawo pacishi cino ca panshi akuya mukwikala aKlistu mukwiinga ncecintu ciindaawo kubota.

²⁴ Nakubi boobo muceebo ca ndimwe, cilyeelete kwaamba ayi noocili muumi.

²⁵ Apa nshintootonsha, ndicishi kwaamba ayi ndanoocili muumi akwikala andimwe noonse kwaamba ayi lushomo lwanu lukomene akumusangalasha.

²⁶ Aboobo ndaakuba amwebo alimwi, kusangalala kwanu muli Klistu Jesu kulaakwiindaawo ceebo ca ndime.

²⁷ Ono cinene ncakwaamba ayi bwikaalo bwanu bulyeelete kweendelana aMakani Abotu ayo aamba shakwe Klistu. Nabi ndesa mukumubona nabi ndabuula kwisa, ndyeelete kunyumfwa ayi mulimfwibo cakutatenkaana camuyeeyo womwi alimwi ayi mulacafwana kwiimikanina lushomo ndomucite muMakani Abotu.

²⁸ Mutaloondi balwani banu, sombi amuyume cakubula boowa. Aboobo cilaakutondesha kwaamba ayi balaakunyonyoolwa, sombi mwebo Lesa ulaakumupulusha.

²⁹ Mwebo mwakapekwa coolwe cakusebensela Klistu, kuteshi kushomabo muli nguwe, sombi amukumupengela.

³⁰ Aboobo amwebo mutoolwana nkondo iyo yeenka njemwakabona kaandwana alimwi njeencilwana abobulya kweelana ambomutoonyumfwa.