Bene Efeso 6 - Baibo Busansulushi Bwa Libuku Ili

Bashali abaana mbobeelete kwikala

¹ Nobaana ceebo mulashoma muMwaami Jesu, mulyeelete kunyumfwila bashali banu mukwiinga cililuleme kucita boobo.

² Malembo akwe Lesa alaamba ayi, “Lemeka baiso abanyoko.” Uyu ngomulawo utaanshi muli kushomesha kwa Mwaami Lesa.

³ Kushomesha uku nkwakwaamba ayi, “Na mwacita boobo, mulaakuba acoolwe mushintu shoonse alimwi akwikala myaaka iinji mucishi.”

⁴ Amwebo nobashali, mutanoolela bana banu munshila yakubakalasha. Sombi mulyeelete kubalela cakunoobeeisha akubalwiita nshebeelete kucita mubwikaalo bwa bwine Klistu.

Bamaami abasha babo mbobeelete kwikala

⁵ Amwebo nobasha, mulyeelete kunyumfwila bamaami banu ba mucishi ca panshi cakubalemeka akubaloonda. Mulyeelete kucita nshebamulwiita amoyo womwi bweenka mbweenga mwasebensela Klistu.

⁶ Mutanoocitabo boobo na kabamubwene kwaamba ayi bamuluumbe. Sombi mukwiinga muli basebenshi bakwe Klistu, mulyeelete kucita sheesho Lesa nshaasuni ankusu shanu shoonse.

⁷ Amubasebensele ncito yanu ya busha cakusangalala bweenka mbweenga mwasebensela Mwaami Jesu, kuteshi anga mutoosebenselabo bantu

⁸ mukwiinga mulishi ayi Mwaami ulaakupa muntu cilambu pamulimo ubotu ngwaacita, musha nabi uteshi musha.

⁹ Amwebo nobamaami, mucite bweenka ubo kubasha banu alimwi mutanoobakonga. Amwishibe kwaamba ayi balo alimwi amwebo, mulicitebo Mwaami womwi uli kwiculu utasalululi.

Bene Klistu balyeelete kukoma bubi

¹⁰ Cakweelaako ncakwaamba ayi, nobamakwesu amuyume muMwaami Lesa kwiinda munkusu shakwe shiindaawo.

¹¹ Amufwale shakulwanisha shoonse isho Lesa nshaamupa, kwaamba ayi mukacikoonshe kulwana maano a bucenjeshi bwakwe Satana.

¹² Mukwiinga tatutoolwana abantu, sombi tutoolwana ankusu sha mishimu ibiibi ya mwiculu, iyo yeendelesha alimwi icite nkusu, mishimu iyo yeendelesha bantu munshiku shino shili anga ngumunshinshe.

¹³ Paceebo ceeco amufwale shakulwanisha isho Lesa nshaamupa, kwaamba ayi mukacikoonshe kulwana cakutaboola pesule pabushiku bwa kushikilwa bubi. Mwaakumanisha kulwana, mulaakushimpa.

¹⁴ Aboobo amuyume, mufwaale lushinisho anga ngulaamba mubukome. Amufwale bululami anga ncakufwala ca ceela pacaamba.

¹⁵ Kulibambila kwanu kwa kushimikila Makani Abotu a luumuno kube anga ninsapato nshemufwala.

¹⁶ Kwiilikaawo, amunyamune lushomo anga ndiyawo ndyeenga mwashimishishako mifwi inyaka mulilo iyo iwaala Satana.

¹⁷ Alimwi amunyamune lupulusho anga ncimpoompo cakumutabilishaako alimwi mutambule maswi akwe Lesa kuswa kuMushimu Usalashi ayo eshi abe anga ngumupeeni.

¹⁸ Kamupaila pakucita shintu shoonse ishi. Kunoosenga Lesa kwaamba ayi amucaafwe. Paciindi coonse kamupaila kweelana aMushimu Usalashi mbweenga wamutanjilila. Paceebo ceeco amucenjele, mutatyongooki napaceyi. Lyoonse na mutoopaila, kamupaililako bashomi boonse.

¹⁹ Anebo kamumpaililaako kwaamba ayi andwiite maswi ngoonjelete kwaamba pakushimikila, ayi nshibishe bantu isho shakalinga kushisitwe paMakani Abotu cakutaloonda.

²⁰ Ono kwaamba ayi bantu baanji beshibe Makani Abotu, nebo ndi mutumwi wakwe Jesu Klistu, nabi pacecino ciindi ndi muntolongo. Amumpailileeko kwaamba ayi mbe ankusu shakushimikila Makani Abotu cakutaloonda kweelana ambonjelete.

Maswi akweelaako

²¹ Taikikasi mukwabesu usunikwi ulaakwisa akamulwiite shoonse shapali ndime alimwi ansheencita. Lakwe ngumusebenshi ushomeka mumilimo ya Mwaami.

²² Nceceeco ncentoomutumina kooko kwaamba ayi amulwiite mbuli mbotubete alimwi akwisa mukumuyumya.

²³ Lesa Ishiwesu alimwi aMwaami Jesu Klistu bape bashominyineesu boonse luumuno, lusuno alimwi alushomo.

²⁴ Alimwi luse luswa kuli Lesa lube abaabo boonse basuni Mwaami wesu Jesu Klistu alusuno lutamaani.