Bene Efeso 5 - Baibo Busansulushi Bwa Libuku Ili

Tulyeelete kwikala mumumuni

¹ Ono mukwiinga muli bana bakwe Lesa abo mbaasuni, mulyeelete kukonkela mibo yakwe.

² Shoonse nshemucita, shilyeelete kutondesha lusuno bweenka mbuli Klistu mbwaakatusuna. Wakaaba buumi bwakwe ceebo ca ndiswe akuba anga ncipo ca bweema bubotu alimwi anga ncipo ca munyama wakutenta cikondelesha pameenso akwe Lesa.

³ Ceebo muli bana bakwe Lesa, bufuule, kucita shintu shitaluleme alimwi akukumbwa camunyono shintu sha bamwi bantu, tasheelete kwaambwa pakati kanu, sobwe.

⁴ Tamweelete kwaamba shintu shilensha nsoni, shabuluya nabi shiteelete, sombi kamwaambabo makani akulumba Lesa.

⁵ Mulyeelete kwishiba cancinencine ayi taakuuwo mufuule, uyo ucita shitaluleme, nabi shikukumbwa camunyono shintu sha bamwi (mukwiinga lunkumbwa lwa munyono lulaba ngolesa wabo) weshi akatambuleko Bweene bwakwe Klistu alimwi aLesa.

⁶ Mutaleeki muntu nabi womwi ayi amucenjeeke kwiinda mumaswi atacite ncito mukwiinga sheenka shintu ishi nsheshilengesha Lesa kuba abukali pabantu abo batamunyumfwili.

⁷ Paceebo ceeco mutanokweenda abantu ba mushobo wooyu.

⁸ Kale kale mwebo mwakalinga mumunshinshe, sombi bulya muli mumumuni mukwiinga mwakaba bantu ba Mwaami. Aboobo mulyeelete kwikala anga mbantu bekala mumumuni.

⁹ Mukwiinga mumuni uyu ngoolengesha bantu kwaamba ayi bacite shintu shoonse shibotu, shiluleme alimwi ashalushinisho.

¹⁰ Anu amwiiye kucita shintu shikondelesha Mwaami.

¹¹ Mutabiko lubasu kushintu shitacite ncito sha mumunshinshe isho shicita bantu bamwi. Sombi mwebo mulyeelete kushileta kumumuni.

¹² Cilalensha nsoni akwaamba shintu shicita bantu batanyumfwili Lesa mubushishi.

¹³ Sombi mumuni ulayubulula shintu shoonse, lyalo bantu balashibona patuba mboshibete.

¹⁴ Mukwiinga mumuni ulalengesha ayi shintu shoonse shiboneke. Nceceeco ncebaambila ayi, “Buka webo noolete, buka kuswa kubafu lyalo Klistu ulaakulengesha ayi ube mumumuni.”

¹⁵ Anu mulyeelete kucenjela mubwikaalo bwanu. Mutekaali anga mbantu batacite lushibo, sombi anga mbantu basongo.

¹⁶ Muciindi coonse mulyeelete kucita shintu shibotu mukwiinga shino nshiku shabica.

¹⁷ Paceebo ceeco mutabi anga mbantu baluya, sombi amweeleshe kwishiba sheesho Mwaami Lesa nshaasuni ayi mucite.

¹⁸ Amucileeke kukolwa uko kweshi kukamunyonyoolebo, sombi amusushikwe aMushimu Usalashi.

¹⁹ Mulyeelete kwaamba kuli womwi awomwi mumaswi a kulumbaisha, nyimbo sha kulemeka alimwi ashimwi sha kulumbaisha Lesa. Kamwiimbila Mwaami cakukondwa amoyo woonse.

²⁰ Kamulumba Lesa Ishiwesu muliina lya Mwaami wesu Jesu Klistu ceebo ca shintu shoonse.

Bantu mbobeelete kwikala mucikwati

²¹ Ceebo mulalemeka Klistu, mulyeelete kunyumfwana.

²² Mwebo nobanakashi, mulyeelete kunoonyumfwila bameebaanu bweenka mbuli mbomunyumfwila Mwaami Jesu.

²³ Mukwiinga musankwa ulicite nkusu pamukaakwe bweenka mbuli Klistu mbwaacite nkusu pacoonde, cili ngomubili wakwe alimwi Klistu mwiine ngoMupulushi wa coonde.

²⁴ Paceebo ceeco, mwanakashi woonse ulyeelete kunoonyumfwila ibaye mushintu shoonse bweenka mbuli coonde mbocinyumfwila Klistu.

²⁵ Amwebo nobasankwa amusune bamakaanu bweenka mbuli Klistu mbwaakasuna coonde akwaaba buumi bwakwe ceebo ca ncico

²⁶ kwaamba ayi acisalashe. Wakacisalasha ndyaakacisansha amaanshi kwiinda mumaswi akwe.

²⁷ Wakasuna ayi coonde cibe caakwe mwiine abulemu bwa ncico, cibe anga ngumuntu utacite kampenda nabi bubi buli boonse, utacite cintu nabi comwi cakumubisha, sombi kacisalalite alimwi kaciluleme.

²⁸ Nkokwaamba ayi basankwa balyeelete kusuna bamakaabo bweenka mbuli mbobasuni mibili yabo. Uyo usuni mukaakwe, ulilisuni mwiine.

²⁹ Mukwiinga taaku muntu upatite mubili wakwe, sombi uloosanina akuulama kabotu. Mbweekoobo Klistu mbwaacitila coonde

³⁰ ico cili ngumubili wakwe alimwi swebo tuli shipansha sha mubili wakwe.

³¹ Kweelana ambokulembetwe muMalembo akwe Lesa ayi, “Aboobo musankwa ulaakushiya ŋanda ya baishi abanyina akuya mukupaankana amukaakwe, lyalo bobilo aba balaakuba mubili womwi.”

³² MuMalembo aya muli cikani cinene calushinisho ico calinga kushishitwe. Ndishi kwaamba ayi alaamba pali Klistu alimwi acoonde.

³³ Nakubi boobo alaamba apali ndimwe. Musankwa uli woonse ulyeelete kusuna mukaakwe bweenka mbwaalisuni mwiine. Alakwe mwanakashi ulyeelete kulemeka ibaye.