Bene Ebulu 9 - Baibo Busansulushi Bwa Libuku Ili

Shakulambila kwa mucishi ca panshi alimwi akwiculu

¹ Cipangano citaanshi cakalinga kucite milawo yakulambililaamo Lesa kubikaawo alimwi amusena wakulambililaamo wakayaka bantu.

² Kwakayakwa Tente itaanshi, umo mwakalinga pakubika lilampi, alimwi atebulu apo pakalinga cimaande cakapekwa kuli Lesa. Cipinda ici cakalinga kwiitwa ayi Musena Usalalite.

³ Kwisule lya cisani cakalinga kushitilisha mwakalinga cipinda cakalinga kwiitwa ayi Musena Usalalite Wiindaawo.

⁴ Mucipinda ici, mwakalinga cipaililo ca golodi apo pakalinga kutentelwa tununkila kabotu alimwi aLibokoshi lya Cipangano ilyo lyakalinga lya mukuba peculu. MuLibokoshi ili mwakalinga mungomo wa golodi umo mwakalinga mana, inkoli yakwe Aloni iyo yakalinga yasonsa matewu alimwi amabwe obilo apampamene apo pakalinga kulembetwe Milawo.

⁵ Ono peculu paLibokoshi ili, pakalinga shintu shicite mapapaminwa shiitwa ayi bakelebu isho shakalinga kubonesha ayi Lesa mpwaali. Mapapaminwa a nshisho akalinga kufwekelesha cifwekesho ca Libokoshi apo pakalinga kulekelelwa shibiibi. Sombi bulya inga tacikonsheki kusansulula kabotu shoonse.

⁶ Anu mbulya shintu mboshakalinga kubambitwe muTente. Bapailishi bakalinga kwinjila mucipinda citaanshi ca muTente lyoonse mukusebensa milimo yabo ya bupailishi.

⁷ Sombi mupailishi munene eenkabo ngowakalinga kwinjila mucipinda ca mukati alimwi ndinkanda lyomwibo pamwaaka. Wakalinga kwinjila abulowa ubo mbwaakalinga kupa kuli Lesa ceebo ca shibiibi shakwe mwiine alimwi asha bantu isho nshebakacita kabateshi.

⁸ Munshila iyi, Mushimu Usalashi uleeisha patuba ayi taaku nshila yakwiinjililamo muMusena Usalalite Wiindaawo kulilabo Tente itaanshi kaicisebensa.

⁹ Shoonse ishi ncikoshanyo ca ciindi cino. Nkokwaamba ayi milambu ya banyama alimwi ashipo shimwi shoonse tashikoonshi kulengesha moyo wa muntu ulambila Lesa kululama cancinencine.

¹⁰ Mukwiinga shilaambabo pashakulya, shakunwa alimwi anshila shakulisalashilaamo shipusenepusene. Yoonse iyi njimilawobo itakumite kumoyo wa muntu, itoosebensa kushikila Lesa ndyeshi akalenge shintu shoonse cipya.

¹¹ Sombi Klistu wakaba kale Mupailishi Munene wa shintu shibotu shiliiwo bulya. Tente njaasebenselaamo njabulemu alimwi teecite kampenda. Teshi bantu bakeeyaka alimwi tente iyi teshi ya mucishi ca panshi.

¹² Klistu ndyaakenjila mutente, akwinjila linkanda lyomwibo ndondoli muMusena Usalalite Wiindaawo, taakwe kutola bulowa bwa mpongo nabi bwa bacende ayi ape kuli Lesa. Sombi lakwe wakatola bulowa bwakwe mwiine akutubambila lupulusho lutamaani.

¹³ Bulowa bwa mpongo, bwa bacende alimwi amilota ya moombe shilasanseelwa pabantu batasalalite kweelana aMilawo. Ishi shilabasalasha kuswa kububi boonse kweelana aMilawo.

¹⁴ Ncakwiila bulowa bwakwe Klistu bwalo buleendaawo nkusu. Bulakonsha kutucitila shiindaawo. Kwiinda muMushimu utamaani, wakalibenga kuli Lesa anga ngumulambu utacite kampenda. Bulowa bwakwe bulasalasha myoyo yesu kumicito itacite ncito, kwaamba ayi tusebensele Lesa muumi.

Shacipangano cipya

¹⁵ Nceceeco Klistu ncaalengeshesha ayi cipangano cipya cibeewo, kwaamba ayi abo Lesa mbwaakeeta ayi bakatambule shoolwe shitamaani nshaakashomesha. Ishi inga shacitika ceebo ca lufu lwakwe Klistu ulo lufuna bantu kuswa mushibiibi nshibakacita muciindi ca cipangano cikulukulu.

¹⁶ Ono pamakani a nkalata yakupyana buboni, cilayandika kutondesha ayi mwine buboni wafwa.

¹⁷ Ceebo nkalata yakupyana buboni taicite ncito na mwine buboni ucili muumi, sombibo na wafwa.

¹⁸ Nceceeco cipangano citaanshi acalo ncecakalinga kucitile nkusu kwiinda mubulowa.

¹⁹ Cakutaanguna, Mose wakalwiita bene Isilaeli shaMilawo yakwe Lesa yoonse. Lyalo wakabwesa bulowa bwa bacende alimwi ampongo, wabusenkanya amaanshi akusanseela palibuku lyakalinga kulembetwemo Milawo alimwi apabantu boonse. Pakusanseela wakasebensesha kasamu kwakalinga kwaangitwe booya busalala bwa mbelele.

²⁰ Ono wakaamba ayi, “Ubu mbobulowa buyumya cipangano ico Lesa ncaakaamba ayi munoocikonkela.”

²¹ Munshila njemunya iyi, Mose alakwe wakasanseela bulowa paTente ya Cipangano alimwi apashintu shoonse shakalinga kusebenseshekwa pakulambila.

²² Ncakwiila kweelana aMilawo, shintu shiinji shilasalashikwa abulowa alimwi shibiibi tashilekelelwi kwakubula kutilwa kwa bulowa.

Lufu lwakwe Klistu ndolukusha shibiibi

²³ Nkokwaamba ayi shintu isho shakalinga kwiimikanina shancinencine sha kwiculu, mboshakalinga kusalashikwa ubo. Sombi shintu sha kwiculu shiine kwaamba ayi shisalashikwe, kulayandika milambu yiinda payeeyo yakalinga kwiimikaninwa.

²⁴ Mukwiinga Klistu taakwe kwinjila muMusena Usalalite wakayaka bantu, ulibo cikoshanyo ca wooyo wa kwiculu. Sombi wakenjila mwiculu mwiine mwiine uko nkwaatwiimikaninaako kuli Lesa.

²⁵ Mupailishi munene wa baJuda ulenjila muMusena Usalalite Wiindaawo linkanda lyomwi pamwaaka, akutola bulowa bwa munyama, buteshi bwakwe. Sombi Klistu taakwe kwiinjila ayi anoolibenga lyoonse,

²⁶ mukwiinga ubo naakalinga kupenshekwa lyoonse, kuswa kumalengelo a cishi. Sombi wakabonekabo linkanda lyomwi kwiimikanina boonse mulishalane lino lya mamanino, kwaamba ayi akushe shibiibi kwiinda mukulibenga kwakwe.

²⁷ Muntu uli woonse ulafwa linkanda lyomwi, kuswawaawo ndyaaomboloshekwa.

²⁸ Mbweeke ubo alakwe Klistu wakabengwa ayi acaikwe linkanda lyomwibo ndondoli kwaamba ayi shibiibi sha bantu baanji shilekelelwe. Ulaakuboneka lwabili, ono teshi akeshiite kulekelela shibiibi sha bantu, sombi ulaakwisa mukupulusha baabo batoomulindila.