Bene Ebulu 6 - Baibo Busansulushi Bwa Libuku Ili

¹ Ono anu atuye kunembo mumakani eelete bamanene mulushomo. Tuteelilwibo kunokwaamba pasheesho nshemwakataanguna kwiiya shapali Klistu. Tatweelete kwiiya alimwi shakusanduka kuswa kushintu shitacite ncito alimwi ambweenga twashoma muli Lesa,

² shapakubombekwa, kubika maansa pabantu ayi bapekwe coolwe, kubuka kuswa kubafu alimwi ambuli Lesa mbweshi akoomboloshe bantu akubapa mulandu wamuyayaya.

³ Atuye kunembo! Aboobo ici nceshi tucite, na nkuyanda kwakwe Lesa.

⁴ Inga tacicitikiiwo cakuboosha bantu bakasowa lushomo ayi basanduke kuswa kushibiibi shabo alimwi. Lesa wakalinga wabamunikilaawo kale, bakalinga basomawo kale cipo ciswa kwiculu, alimwi abalo bakalinga batambula Mushimu Usalashi.

⁵ Bakalinga beshiba bubotu bwa maswi akwe Lesa alimwi akwishiba nkusu sha mubweendeleshi bwa ciindi citoosa.

⁶ Lyalo balo bakacileka kushoma! Inga tatubasanduliiwo kuswa kushibiibi shabo alimwi mukwiinga mukucileka kushoma, cilibo anga batoopopa Mwanaakwe Lesa pamucilingano alimwi akumulensha nsoni pameenso a bantu.

⁷ Lesa ulapa coolwe bulongo bwa mumuunda umo mulokela mfula liinji liinji akulengesha ayi mbewu sha balimi shicate shisepo shibotu shibaletela mpindu.

⁸ Sombi na mumuunda umo kamumena myuumfwa alimwi atulembwelembwe taucite mpindu alimwi ingayi Lesa uli pafwaafwi kuushingana, pesule akuunyonyoola mumulilo.

⁹ Nomusunikwi, nabi tutokwaamba bobulya, tatutonshi pali ndimwe. Tulishi kwaamba ayi muli munshila ibotu imutola kulupulusho.

¹⁰ Lesa uliluleme, aboobo teshi akalube ncito njemwakacita, alimwi alusuno ndomwakamubonesha kwiinda mulucafwo ndomwakacita aloolo ndomucicita kubashominyinaanu.

¹¹ Ncetusuni bunene nkwaamba ayi womwi awomwi mulikoto lyanu atolelele cankusu kushoma kushikila akumamanino, kwaamba ayi isho nshemutoolangila shikacitike cancinencine.

¹² Tatusuni ayi mube batolo, sombi ayi mube anga mbaabo batambula sheesho Lesa nshaakashomesha, kwiinda mulushomo abushimoyonteeka.

Shakushomesha kwakwe Lesa kwalushinisho

¹³ Ono Lesa ndyaakashomesha kupa Abulaamu cintu cimwi, wakalumbila ayi ulaakucita kweelana akushomesha kwakwe. Ono mukwiinga tekwakalinga umwi munene kwiinda pali nguwe, Lesa wakasebensesha liina lyakwe mwiine pakulumbila.

¹⁴ Wakaamba ayi, “Ndashomesha ayi ndaakukupa coolwe alimwi akufusha bamulunyungu lwako.”

¹⁵ Abulaamu wakalindila camoyonteeka, aboobo wakatambula sheesho Lesa nshaakamushomesha.

¹⁶ Bantu balalumbila muliina lya muntu wiinda pali mbabo, paceebo ceeco, kulumbila kwancinencine kwa mushobo wooyu, kulamanisha shimpikisha shoonse pakati kabo.

¹⁷ Lesa wakayanda kubonesha baabo beshi bakatambule sheesho nshaakashomesha ayi ulaakucita kweelana akubamba kwakwe. Nceceeco ncaakalumbilila akukonkomesha mukushomesha kwakwe.

¹⁸ Anu shintu shobilo ishi, kushomesha alimwi akulumbila, shilaakucitika cancinencine alimwi Lesa inga taabeciiwo pali nshisho. Aboobo, Lesa wakalinga kutuyumyayumya sotwakacicila kuli nguwe, ayi tuyuminine mukulangila nkwaakatupa.

¹⁹ Kulangila kwesu uku, kuli anga nceela cakwiimikisha bwaato mubuumi bwesu. Nkokwaamba ayi kulalengesha ayi tubule boowa alimwi tunooshinishite. Kulaakutushisha kwiculu muŋanda yakwe Lesa kwiinda mucisani cishitilisha akwinjila mumusena usalalite wa mukati.

²⁰ Ceebo ca ndiswe, Jesu wakatutanjilila kwinjila mumusena usalalite uyo akuba Mupailishi Munene wamuyayaya, bupailishi buli mbuli bwakwe Melikisedeki.