Bene Ebulu 5 - Baibo Busansulushi Bwa Libuku Ili

¹ Mupailishi munene uli woonse ulasalwa pakati ka bantu bene mishaabo akubikwa ayi anobeemikanina kuli Lesa. Mulimo wakwe ngwakupa shipo sha banyama alimwi ashipo shimwi shoonse kuli Lesa kwaamba ayi shibiibi sha bantu shilekelelwe.

² Ceebo cakwaamba ayi alakwe mwiine ulilefukite, ulakonsha kubombya moyo kubaabo babisha mukubula lushibo.

³ Alimwi mukwiinga alakwe ulilefukite, teelete kubenga milambu ya banyama kuli Lesa ceebo ca shibiibi sha bantu bamwi beenka, sombi ashibiibi shakwe mwiine.

⁴ Taaku muntu usala kulipa bulemu bwakuba mupailishi munene, sombi nguLesa umwiita, bweenka mbwaakeeta Aloni.

⁵ Mbweeke ubo, alakwe Klistu taakwe kulipa bulemu bwakuba Mupailishi Munene mwiine. Sombi nguLesa wakamwaambila ayi, “Ndiwe Mwanaangu, sunu ndaba baIso.”

⁶ MuMalembo akwe Lesa pamwi alimwi wakaamba ayi, “Ulaakunoolibo mupailishi lyoonse, bupailishi ubo buli mbuli bwakalinga kucite Melikisedeki.”

⁷ Jesu ndyaakalinga muntu mucishi ca panshi, wakalinga kupaila alimwi akusenga cakoolobesha alimwi aminsonshi kuli Lesa, uyo wakalinga kukonsha kumupulusha kulufu. Mukwiinga Jesu wakalinga kuliceesha akulibenga, Lesa wakamukumbula.

⁸ Nakubi kwaamba ayi Jesu wakalinga Mwanaakwe Lesa, kwiinda mukupenshekwa kwakwe wakeeya kunyumfwila Lesa.

⁹ Ndyaakamanisha mulimo wakwe woonse, wakaba nshila ya lupulusho lutamaani kubaabo boonse bamunyumfwila.

¹⁰ Lyalo Lesa wakamubika ayi abe Mupailishi Munene, bupailishi ubo buli mbuli bwakalinga kucite Melikisedeki.

Kucenjeshekwa pamakani akutacileka kushoma

¹¹ Pali maswi aanji ngweenga ndaamba pamakani aya, sombi nciyumu kwaasansulula kuli ndimwe mukwiinga tamufwambaani kunyumfwa.

¹² Nakubi kwaamba ayi bulya mwalinga kweelete kunooli kale bafundishi, muciyandika umwi shikumwiisha shiiyo shitaanshi sha makani akwe Lesa. Ciindi cakwaamba ayi munoolya shakulya shiyumuyumu, muceeletebo kunwa mukupa.

¹³ Uyo woonse uciyandika kunoocinwa mukupa, uli anga ngumwaana kateta utacite lushibo pashintu shiluleme.

¹⁴ Sombi shakulya shiyumuyumu nsha bamanene. Kwiinda mukusebensesha maano, balakonsha kupansaanya cibotu acibiibi.