Bene Ebulu 4 - Baibo Busansulushi Bwa Libuku Ili

¹ Aboobo ceebo cakwaamba ayi kushomesha Lesa nkwaakaamba kwakwinjila mukookesha mpokucili. Anu atucenjele kwaamba ayi kutabi nabi womwi eshi akaalilwe kwinjila.

² Mukwiinga aswebo twakanyumfwa Makani Abotu bweenka mbuli mbabo. Sombi taaku bubotu mbobakacanaamo mukwiinga bakanyumfwabo, ono tabakwe kushoma.

³ Nkokwaamba ayi swebo sotushoma muli Lesa ono twenjila mukookesha uko. Kweelana abwakaamba Lesa ayi, “Ndakakalala akushomesha cakulumbila ayi, ‘Teshi bakenjileewo mucishi umo mondalinga kweelete kubapa kookesha!’ ” Lesa wakaamba boobo nakubi kwaamba ayi wakamanisha milimo yakwe yoonse ndyaakalenga cishi coonse.

⁴ MuMalembo akwe Lesa, pamwi palaamba shabushiku bwasanu ashobilo ayi, “Lesa wakookesha pabushiku bwasanu ashobilo, kucileka milimo yoonse njaakalinga kucita.”

⁵ Alimwi pamakani ngomunya aya, Lesa wakaamba ayi, “Teshi bakenjileewo mumusena wangu mwakookeshesha.”

⁶ Lesa wakabamba ayi bamwi benjile mukookesha uko. Sombi abo bakataanguna kunyumfwa Makani Abotu tabakwe kwinjilaamo ceebo bakakaka kushoma shakaamba Lesa.

⁷ Nceceeco Lesa ncaakabambila bushiku bumwi, ubo mbwaaita ayi, “Sunu.” Lesa wakalinga kwaamba pabushiku mbomunya ubu kwiinda muli Defedi, ndipakeenda myaaka iinji ndyaakaamba paMalembo aya ngotwaambawo kale ayi, “Na munyumfwe maswi akwe Lesa sunu, mutabi beshicimpamya.”

⁸ Joshiwa naakalengesha ayi bantu bookeshe kweelana akushomesha kwakwe Lesa, naakwiinga pesule, Lesa taakwe kwaamba shabushiku bumwi alimwi.

⁹ Paceebo ceeco, mpokucili kookesha kwa bantu bakwe Lesa bweenka mbuli Lesa mbwaakookesha pabushiku bwasanu ashobilo.

¹⁰ Mukwiinga uyo woonse Lesa ngweshi akalengeshe ayi ookeshe kweelana ambwaakashomesha, ulaakookesha pakumanisha milimo yakwe, bweenka mbuli Lesa mbwaakookesha ndyaakamanisha milimo yakwe mwiine.

¹¹ Aboobo, atweeleshe cankusu kwaamba ayi tukenjile mukookesha umo, kuloonda ayi kutakabi muntu nabi womwi mulikoto lyesu eshi akaalilwe kwiinjilaamo ceebo cakukaka kushoma Lesa bweenka bwakacita bamashali besu bakulukulu muluyanga.

¹² Mukwiinga maswi akwe Lesa ali anga ncintu cuumi alimwi alicite nkusu. Alikolete kwiinda mupeeni ukolete koonse kobilo. Alatimbula pakati kushikila apali moyo amuuya alimwi apali shifuwa alimwi amoomo. Maswi akwe Lesa alayubulula sheesho bantu nshebayeeya alimwi anshebasuni.

¹³ Taaku cintu nabi comwi cishisitwe pameenso akwe Lesa, sombi shoonse shilengwa ulashibona bweenka mbuli mboshibete alimwi nkuli nguwe nkotweelete kusansulwita shoonse nshetwakacita.

Jesu ngoMupailishi Munene wiindaawo

¹⁴ Anu atuyuminine akutolelela mulushomo ndotushimikila. Mukwiinga tulicite Mupailishi Munene wiindaawo, uyo wakenjila kwiculu kubete Lesa. Uyu nguJesu, Mwanaakwe Lesa.

¹⁵ Tatucite Mupailishi Munene utakoonshi kutunyumfwila nkumbu mukulefuka kwesu. Mupailishi wesu wakasunkwa munshila shoonse bweenka mbotusunkwa. Sombi lakwe taakwe kubishaawo.

¹⁶ Aboobo, tutatonshi, atushike kucuuna cakwe Lesa ca bwaami uko kuli luse. Uko Lesa ulaakutunyumfwila nkumbu akutubonesha luse lwakutucafwa paciindi ceelete.