Bene Ebulu 13 - Baibo Busansulushi Bwa Libuku Ili

Mbweenga twakondelesha Lesa

¹ Amutolelele kusunana mbuli bamukowa.

² Mutaluubi kutambula kabotu beensu mumaandaanu. Nkobali bamwi bakatambula beensu, sombi kabateshi ayi mbaanjelo bakwe Lesa.

³ Kamuyeeya bali muntolongo, akunoobona anga amwebo muli muntolongo ambabo. Kamuyeeya batoopenshekwa akunoobona anga amwebo mutoopenshekwa bweenka mbuli mbabo.

⁴ Cikwati kamucilemeka noonse alimwi basankwa abamakaabo balyeelete kunooshomeka kuli womwi awomwi mukwiinga Lesa ulaakoombolosha akupa mulandu bafuule alimwi abeshibulale.

⁵ Mutasunishi bunene maali, sombi mukondwe mushintu sheenka nshemucite. Ceebo Lesa wakaamba ayi, “Teshi nkamushiyeewo nabi kumulekelesha, sobwe.”

⁶ Paceebo ceeco, katwaamba cakutaloonda ayi, “Mwaami Lesa ngomucafwi wangu, teshi nkaloondeewo. Ino muntu inga wancitanshi?”

⁷ Amwiibaluke bamatanjilili banu, abo bakamushimikila maswi akwe Lesa. Amuyeeye buumi bwabo mbobwakalinga alufu lwabo alimwi mube alushomo mbuli ndobakalinga kucite.

⁸ Jesu Klistu taasandooki. Bweenka mbwaakalinga ciilo, asunu mbwaabete alimwi mbweshi akabe myaaka yamuyayaya.

⁹ Mutasumini kwaamba ayi njiisho sheensu shipusenepusene ayi shimukushe munshila iluleme. Ncibotu kwaamba ayi luse lwakwe Lesa luyumye myoyo yesu, kuteshi kukonkela milawo yaamba pashakulya, ceebo milawo iyi taikwe kucafwawo baabo bakalinga kwiikonkela.

¹⁰ Anu bapailishi basebensa mumusena ngobapaililaamo baJuda, tabasuminishikwi kulya milambu ya banyama ipekwa pacipaililo.

¹¹ Mupailishi munene wa baJuda ulaleta bulowa bwa banyama muMusena Usalalite Wiindaawo kwaamba ayi bube mulambu wa shibiibi sha bantu, sombi mibili ya banyama abo yakalinga kutentelwa pansengwe lya musena mwakalinga kwikala bantu.

¹² Nceceeco Jesu alakwe ncaakafwita pansengwe lya ndabala inene, kwaamba ayi asalashe bantu kuswa kushibiibi shabo kwiinda mubulowa bwakwe mwiine.

¹³ Paceebo ceeco, atuye kuli nguwe pansengwe lya musena mwikala bantu alimwi akusebaana pantu pomwi anguwe.

¹⁴ Mukwiinga pano pacishi ca panshi tatucite ndabala inene njeenga twekalililaamo, sombi tutoolangila ndabala inene itoosa.

¹⁵ Paceebo ceeco kwiinda muli Jesu, atulumbaishe Lesa lyoonse kwaamba ayi kube mulambu wesu, nditulyaambilila ayi nguMwaami wesu.

¹⁶ Mutaluubi kucita shibotu alimwi akucafwana ceebo iyi njemilambu isangalasha Lesa.

¹⁷ Amunyumfwile bamatanjilili banu kwiinda mukukonkela milasho yabo. Lyoonse balalama buumi bwanu cakutookesha mukwiinga balaakusansulwita Lesa mbuli mbobakasebensa milimo yabo. Na kamubanyumfwila, balaakusebensa milimo yabo iyo cakusangalala. Sombi na kamutabanyumfwili, balaakusebensa cabuumba, aboobo ici teshi cikamucafweewo, sobwe.

¹⁸ Amutolelele kutupaililaako. Tulishinishite ayi mumiyeeyo yesu taamu cilubo mukwiinga tulisuni kucita shiluleme ciindi coonse.

¹⁹ Ndamusenga amoyo wangu woonse ayi mupaile kuli Lesa kwaamba ayi ambooshe kuli ndimwe cakufwambaana.

Mupailo

²⁰ Lesa upa luumuno, uyo wakabusha Mwaami Jesu kuswa kubafu, lakwe ngoMweembeshi munene wa mbelele mukwiinga wakalibenga ayi acaikwe alimwi kwiinda mulufu lwakwe, wakabika cipangano citamaani.

²¹ Lesa uyo amupe shibotu shoonse shiyandika kwaamba ayi mucite kuyanda kwakwe alimwi ayi kwiinda muli Jesu Klistu, acite shimukondelesha muli ndiswe. Kuli Klistu akube bulemu lyoonse alyoonse! Ameni.

Maswi akweelaako

²² Nobamakwesu, ndamusenga kwaamba ayi mutambule camoyonteeka maswi aya akumuyumyayumya, nceceeco ncendamulembelabo mukufwiimpyafwiimpya.

²³ Ntoomwishibishaako ayi mukwabesu Timoti bakamukusha muntolongo. Na afwambaane kushika kuno, ndaakwisaakwe mukumubona.

²⁴ Mutwaanshisheko bamatanjilili banu alimwi abantu bakwe Lesa boonse. Bamakwabesu ba kuItali bamwaansha.

²⁵ Luse lwakwe Lesa lube amwebo noonse.