Bene Ebulu 12 - Baibo Busansulushi Bwa Libuku Ili

¹ Ono mukwiinga aswebo tuli abakamboni baanji batushingulukite, atukushe shoonse shitukasha kucita nshetweelete alimwi ashibiibi shoonse isho nshetucita lyoonse. Lyalo tucice cankusu lubilo ulu ndotucite.

² Atushinkamanebo muli Jesu ceebo lakwe ngomatalikilo alushomo lwesu alimwi ngoolengesha ayi lube lwancinencine. Taakwe kuleka mulimo wakwe ceebo ca lufu lwa pamucilingano, sombi mukwiinga wakusangalala kwakalinga kunembo, taakwe kunyumfwa nsoni ceebo ca lufu lwa mbuli loolu alimwi bulya ulishiite kululyo lwa cuuna ca bwaami cakwe Lesa.

³ Amuyeeye mbuli mbwaakapenshekwa ceebo ca lupato lunene abuumbi lwa bamucita shibi! Anu amwebo mutatyongoli akucileka kushoma.

⁴ Mukwiinga mukulifuna munkondo ya shibiibi, tamuna kushika pamapensho akwaamba ayi mutooyanda kucaikwa.

Lesa ishiwesu

⁵ Sa mwalubako maswi alya akumuyumya Lesa ngaakamwaambila anga mbana bakwe basankwa? Wakaamba ayi, “Mwanaangu, konyumfwila Mwaami na kaakulwiita alimwi utanootyongola na wakulwiita cilubo cako.

⁶ Ceebo Mwaami ulalulamika muntu woonse ngwaasuni, alimwi ulooma mwaana uli woonse ngwaatambula.”

⁷ Mulyeelete kubona mapensho anu oonse anga nkululikwa kwaswa kuli ishiwanu. Mapensho anu alabonesha kwaamba ayi Lesa utoomubona ayi muli bana bakwe. Sa mwakanyumfwawo kale mwaana ngobatabuuli baishi?

⁸ Lesa ulabuula bana bakwe boonse. Ono na mwebo taatomubuula, nkokwaamba ayi tamwishi bana bakwe cancinencine, sombi muli baana ba mucikololo.

⁹ Bamaishiwesu bapacishi ca panshi bakalinga kutubuula, aboobo twakalinga kubalemeka. Anu tulyeelete kwiindaawo kulemeka Lesa Ishiwesu uli kwiculu kwaamba ayi tube abuumi!

¹⁰ Bamaishiwesu bapacishi ca panshi bakalinga kutubuula paciindi ico ciniini kweelana akuyanda kwabo. Sombi Lesa ulatubuula ayi tucanemo mpindu alimwi ayi aswebo tube bantu basalalite bweenka mbuli nguwe.

¹¹ Ono swebo na twabuulwa, tulabona anga ncintu cilensha nsoni paciindi ico, tacituboteliiwo. Sombi kunembo, bantu abo Lesa mbwaakabuula munshila yeeyi, balatambula cilambu ca kwikala muluumuno alimwi abululami.

¹² Paceebo ceeco, amuyumye shiso sha maansaanu alefukite, alimwi amumanungo anu mutoobukuma!

¹³ Amutolelele kweenda munshila shiluleme kwaamba ayi mweendo wanu ulema utashonkomoki, sombi ushilikwe.

Shakucenjesha

¹⁴ Amweeleshe kwikala muluumuno abantu boonse alimwi akweelesha kwikala buumi busalalite ceebo taaku muntu utasalalite nabi womwi eshi akabone Lesa.

¹⁵ Amucenjele kwaamba ayi kutabi muntu nabi womwi weshi aswe kuluse lwakwe Lesa, nabi abe anga nimbuto shamilunda isho shicita na shakula, shabisha shimwi shoonse.

¹⁶ Mulyeelete kucenjela kwaamba ayi kutabi mufuule nabi womwi mulikoto lyanu, nabi muntu ucobola Lesa mbuli Esau, uyo wakoolisha bunene bwakwe ceebo ca cakulya ca linkanda lyomwibo.

¹⁷ Kweelana ambomwishi pesule, Esau wakalinga kusuni ayi baishi bamupe coolwe. Sombi cakaala mukwiinga kwakabula nshila yakwaamba ayi abosheshemo ceeco ncaakacita, nakubi kwaamba ayi wakalinga kuciyandoola cakulila aminsonshi.

¹⁸ Mwebo tamuna kushika, mbuli bwakashika bene Isilaeli, kucintu nceenga bakumya mbuli kuKalundu ka Sinayi uko kwakalinga kunyaka mulilo, munshinshe unene, cipuupu,

¹⁹ kwakanyumfwika lupeenga alimwi aliswi. Ono bantu ndibakanyumfwa liswi ilyo, bakasenga ayi batalinyumfwiiwo alimwi,

²⁰ mukwiinga bakaloonda mulawo wakwaamba ayi, “Kulilabo nabi munyama weshi akumye kukalundu aka, ulyeelete kuumwa mabwe kushikila afwe.”

²¹ Shintu shakacitika kukalundu aka shakalinga kuloondesha cakwaamba ayi Mose wakaamba ayi, “Ntootutuma ceebo ndaloonda!”

²² Sombi mwebo mwesa kuKalundu ka Siyoni alimwi akundabala inene yakwe Lesa muumi, njeJelusalemu ya kwiculu umo muli baanjelo bali shuulu ashuulu.

²³ Mwesa kulibungano lyakusangalala lya baana basankwa bakwiiya bakwe Lesa, abo bacite meena alembetwe kwiculu. Mwebo mwesa kuli Lesa, moomboloshi wa bantu boonse, kumyuuya ya bantu baluleme abo bakasalashikwa cancinencine.

²⁴ Mwebo mwesa kuli Jesu, uyo wakalengesha ayi cipangano cipya cibeeko alimwi abulowa bwakwe ubo bushomesha shibotu kwiinda bwakwe Abelo.

²⁵ Paceebo ceeco, amucenjele kwaamba ayi mutakaki kunyumfwila wooyo utokwaamba amwebo. Boonse abo bakakaka kunyumfwila wooyo wakabacenjeshaako pacishi ca panshi pano kwiinda mumakani akwe Lesa, tabakwe kupuluka. Ono na twakaaka kunyumfwila wooyo utokwaamba kuswa kwiculu, ncakwiila aswebo teshi tukapulukeewo.

²⁶ Paciindi ico, liswi lyakwe Lesa lyakatenkaanya cishi ca panshi, sombi bulya wakashomesha ayi, “Ndaakutenkaanya cishi alimwi, ono kuteshi cishi ceenka, sombi aliculu alyalo.”

²⁷ Aboobo, liswi lyakwaamba ayi, “Alimwi” lilabonesha patuba ayi shilengwa shoonse shilaakutenkaanishikwa alimwi akukushikwa, kwaamba ayi kukacaale sheesho shitatenkaanishikwi.

²⁸ Alimwi ceebo tulatambula bweene ubo butatenkaanishikwi, tulyeelete kulumba Lesa, kumulambila munshila imukondelesha alimwi akumulemeka abuumbi.

²⁹ Mukwiinga Lesa wesu ncakwiila ngumulilo unyonyoola.