Bene Ebulu 11 - Baibo Busansulushi Bwa Libuku Ili

Shalushomo

¹ Kushoma nkutatonsha munshintu nshetutoolangila alimwi akushinisha ayi shintu nshetutaboni nkoshili cancinencine.

² Ceebo ca lushomo lwa bamashali besu bakulukulu, Lesa wakakondwa muli mbabo.

³ Kwiinda mulushomo, tulishi kwaamba ayi Lesa wakalenga cishi kwiinda mumaswi. Aboobo shintu nshetubona, shakalengwa kuswa mushintu shitaboneki.

⁴ Kwiinda mulushomo, Abelo wakapa mulambu weelete kuli Lesa kwiinda wakwe Kaini. Ceebo ca lushomo, Lesa wakabanda Abelo ayi uliluleme mukwiinga Lesa mwiine wakakondwa pamulambu wakwe. Lushomo ndomunya ulu ndolulengesha ayi Abelo anoocaamba kuli ndiswe, nakubi kwaamba ayi ulifwite.

⁵ Ndushomo lwakalengesha ayi Enoki abule kufwa. Taaku muntu wakamubona mukwiinga Lesa wakamutola kwiculu. Malembo akwe Lesa alaamba ayi Enoki kaatana kutolwa kwiculu, wakalinga kukondelesha Lesa.

⁶ Taaku muntu weenga wakondelesha Lesa kaatacite lushomo. Mukwiinga uyo woonse usuni kusena kuli Lesa ulyeelete kushoma ayi Lesa mpwaali alimwi ayi ulapa shilambu kubantu abo bamuyandoola.

⁷ Ndushomo lwakalengesha ayi Nowa anyumfwile sheesho Lesa nshaakamucenjesha, pashintu shakalinga kweelete kucitika kunembo kaatana kushibona. Wakacita kweelana abwakaamba Lesa kwiinda mukupanga bwaato, umo lakwe, bakaakwe alimwi abana bakwe mobakapulukila. Kwiinda munshila iyi Nowa wakabonesha bantu ba mucishi ca panshi ayi bakalinga kulubite, aboobo Lesa wakabanda Nowa ayi uliluleme kwiinda mukushoma nguwe.

⁸ Ndushomo lwakalengesha ayi Abulaamu anyumfwile Lesa ndyaakalwiitwa kuya kucishi ico Lesa mwiine ncaakashomesha ayi ulaakumupa. Wakaswa mucishi cine mishaabo kaateshi ankwaakalinga kuya.

⁹ Kwiinda mulushomo ndomunya, wakekala anga ngumuswamashi mucishi ico Lesa ncaakamushomesha. Isaki aJakobo abo abalo bakatambula kushomesha kwakwe Lesa, bakalinga kwikala mumatente mbuli Abulaamu.

¹⁰ Mukwiinga Abulaamu wakalinga kulangila ndabala inene amaanda acite lwiimbi lutamaani, iyo Lesa mwiine njaakayeeya mbweshi ikabe alimwi akuyaka.

¹¹ Ndushomo lwakalengesha ayi Abulaamu abe amwaana musankwa, nakubi kwaamba ayi wakalinga wacembela abuumbi alimwi alakwe Sala wakalinga wacembelabo kaatacitewo mwaana. Abulaamu wakashoma ayi Lesa ulaakucita kweelana akushomesha kwakwe.

¹² Nakubi kwaamba ayi Abulaamu wakalinga anga ngumuntu ufwite, mumuntu womwi uyu mwakaswa bamulunyungu lwakwe baanji anga ninyenyeenshi sha mwiculu alimwi anga ngumuseese wa muloombe lwa lweenge.

¹³ Bantu aba boonse bakafwabo kabashoma muli Lesa. Tabakwe kutambula shintu isho Lesa nshaakabashomesha, sombi kashicili kulaale, bakashibona akusangalala abuumbi. Bakasumina patuba ayi mucishi ca panshi, ncakwiila mbeensu beendilite.

¹⁴ Abo baamba boobo, balatondesha patuba ayi batoolangila kuba acishi cinebo.

¹⁵ Tebakalinga kuyeeya cishi ncebakashiya. Nebakalinga kuyeeyaako, naakwiinga bakacana ciindi cakuboolela.

¹⁶ Sombi cishi ncebakalinga kulangila cakalinga kwiindaawo kubota, cishi ca kwiculu. Aboobo, Lesa taanyumfwi nsoni pakumwiita ayi Lesa wabo ceebo ngowakabayakila andabala inene.

¹⁷ Ndushomo lwakalengesha ayi Abulaamu ndyaakasunkwa aLesa ayande kupa Isaki mwanaakwe mbuli mulambu kuli Lesa. Nakubi kwaamba ayi Abulaamu ngowakashomeshekwa, wakalinga kulibambite kubenga mwanaakwe musankwa eenkabo ayi abe mulambu.

¹⁸ Pamwaana uyu, Lesa wakalinga waamba ayi, “Muli Isaki mweshi mukaswe bamulunyungu lwako mbondakakushomesha.”

¹⁹ Abulaamu wakalinga kushoma ayi Lesa ulakonsha kubusha Isaki kuswa kubafu. Aboobo inga twaamba ayi Abulaamu wakatambula Isaki anga wabushikwa kuswa kubafu.

²⁰ Ndushomo lwakalengesha ayi Isaki ashomeshe Jakobo alimwi aEsau, ndyaakabalwiitilisha ayi balaakutambula shoolwe kunembo.

²¹ Ndushomo lwakalengesha ayi Jakobo, kaatana kufwa ape coolwe bana bakwe Josefu boonse. Mpeeke wakayaamina pankoli yakwe akulambila Lesa.

²² Ndushomo lwakalengesha ayi Josefu, ndyaakalinga pafwaafwi kufwa, aambe pamakani akulonga kwa bene Isilaeli kuswa muIjipiti. Wakabalwiita mbweshi bakacite amafuwa akwe.

²³ Ndushomo lwakalengesha ayi bashali bakwe Mose bamushiise kwamyeenshi yotatwe ndyaakashalwabo mukwiinga bakabona ayi wakalinga mwaana mubotu abuumbi. Aboobo tabakwe kuloonda kusotoka mulawo wa mwaami.

²⁴ Mose ndyaakakula, ndushomo lwakamulengesha ayi akake kwiitwa ayi mushikulu wakwe Falawo.

²⁵ Wakasuna kupenshekwa pantu pomwi abantu bakwe Lesa kwiinda kusangalalila mububi kwaciindi ciniini.

²⁶ Wakabona ayi kupenshekwa ceebo ca Usalitwe wakwe Lesa nkubotu kwiinda kuba abubile boonse bwa muIjipiti mukwiinga wakalinga kulangilabo cilambu ca kunembo.

²⁷ Ndushomo lwakalengesha ayi Mose aswe muIjipiti, cakutaloonda bukali bwa mwaami. Cakalingabo anga wakabona Lesa utaboneki, akumulengesha ayi atabooli pesule.

²⁸ Ndushomo lwakalengesha ayi abambe bushiku bwa Pasika bwakwiibaluka kusotokela akwaambila bantu ayi basansaile bulowa pamilyango, kwaamba ayi munjelo uleta lufu atacayi baana bakwiiya ba bene Isilaeli.

²⁹ Ndushomo lwakalengesha ayi bene Isilaeli basubuke Lweenge Lusalala kabalyatabo payumu, anga temwakalinga maanshi. Sombi bene Ijipiti ndibakeelesha kusubuka, maanshi akabalobya boonse.

³⁰ Ndushomo lwakalengesha ayi lubumbu lwa ndabala inene ya Jeliko luwe, bene Isilaeli ndibakamana kulushinguluka inshiku shili shosanwe ashobilo.

³¹ Ndushomo lwakalengesha ayi mwanakashi mufuule Laabu atacaikwi pantu pomwi abaabo batakwe kunyumfwila Lesa mukwiinga wakatambula kabotu beshikusensa bene Isilaeli.

³² Sa noociya cibandookabo ashimwi? Nshicite ciindi cakulemba sha pacikani cakwe Gidyoni, Balaki, Samusoni, Jefuta, Defedi, Samwelo alimwi abalaluki bakulukulu.

³³ Kwiinda mulushomo, bantu aba bakalwana shishi alimwi akukoma. Bakacita shiluleme, mpeeke alakwe Lesa wakabapa nshaakabashomesha. Bakalengesha milomo ya nkalamu kutacaluka,

³⁴ bakashimya mililo yakalinga kunyaka abuumbi, bakapulushikwa kukucaikwa amipeeni. Nakubi kwaamba ayi tebakalinga kucite nkusu, bakabaasho. Bakaba bashilumamba bayumu abuumbi, akukoma bashilumamba ba mushishi sha baswamashi.

³⁵ Kwiinda mulushomo, banakashi bakatambula beshikamukowa babo bakalinga bafwa ceebo bakabushikwa kuswa kubafu. Ono bamwi bakakaka kwaangululwa, bakapenshekwa kushikila bafwa, ceebo bakalinga kusuni kwaamba ayi bakabushikwe mubuumi bubotu bwiindaawo.

³⁶ Bamwi alimwi bakawelulukwa akukwipwa, abalo bamwi bakaangwa ncetani akuwaalwa muntolongo.

³⁷ Bamwi bakalinga kucaikwa kwiinda mukuumwa mabwe, bamwi bakalinga kupasulwa pakati, abalo bamwi bakalinga kucaikwa amipeeni. Bamwi bakalinga kweenda kabafwete shipaya sha mbelele nabi sha mpongo, bakalinga bakandu akupenshekwa alimwi akushupikwa.

³⁸ Cishi ca panshi tecakalinga kubeeleteewo! Bakalinga kusubyaangilabo mumayanga alimwi amutulundu akunookalabo mushimfweengo sha panshi alimwi amushilingo.

³⁹ Bantu boonse aba, Lesa wakababanda bululami ceebo ca lushomo lwabo! Nakubi boobo tabakwe kutambula sheesho Lesa nshaakashomesha

⁴⁰ mukwiinga Lesa wakalinga kubambite muyeeyo wiindaawo kubota wa pali ndiswe. Kubamba kwakwe kwakalinga kwakwaamba ayi batalulami cancinencine beenka, sombi balulamine pantu pomwi aswebo.