Bene Ebulu 10 - Baibo Busansulushi Bwa Libuku Ili

¹ Milawo ya baJuda teshi nsheshoolwe shancinencine, sombi ileemikaninabo shoolwe isho shitoosa. Milambu ya mushobo womwi ilabengwa mwaaka amwaaka. Sombi Milawo taikoonshi kusalasha bantu besa kuli Lesa kwiinda mumilambu iyo.

² Bantu abo balambila Lesa nebakasalashikwa cancinencine kuswa kushibiibi shabo, naakwiinga taboongumani mumyoyo ceebo ca shibiibi shabo alimwi naakwiinga bakacileka akubenga milambu yoonse.

³ Sombi kweelana ambocibete, milambu ileebalusha bantu shibiibi shabo mwaaka amwaaka.

⁴ Mukwiinga bulowa bwa bacende alimwi abwa mpongo tabukushi shibiibi sha bantu.

⁵ Paceebo ceeco, Klistu ndyaakalinga pafwaafwi kwisa mucishi ca panshi, wakaambila Lesa ayi, “Toosuni milambu ashipo shimwi shoonse sombi walengesha ayi mbe amubili.

⁶ Tookwe kukondwa mumilambu ya banyama bakabumbulu bakalinga kutentwa pacipaililo, nabi milambu yakukusha shibiibi sha bantu.

⁷ Mpomunyaawo ndakaamba ayi, ‘Mpoondi nebo, kwaamba ayi ncite kuyanda kwako, OLesa, bweenka mbuli maswi mbwaamba pali ndime mulibuku lya Milawo.’ ”

⁸ Pakutaanguna Klistu wakaambila Lesa ayi, “Toosuni nabi kukondwa mumilambu alimwi ashipo shimwi shoonse, nabi banyama bakabumbulu bakutenta pacipaililo alimwi amilambu yakukusha shibiibi.” Wakaamba boobo nakubi kwaamba ayi Milawo njeyaamba ayi shipo shoonse ishi shinoopekwa kuli Lesa.

⁹ Kuswawaawo, wakaamba ayi, “Mpoondi nebo, kwaamba ayi ncite kuyanda kwako, OLesa.” Aboobo, Klistu wakakusha milambu ikulukulu akubika mulambu upya mumusena wa njiyo.

¹⁰ Ceebo Jesu Klistu wakacita ceeco Lesa ncaakalinga kusuni ayi acite, twakasalashikwa kwiinda mukubenga mubili wakwe linkanda lyomwibo ndondoli kwiimikanina bantu boonse.

¹¹ Mupailishi wa baJuda woonse wakalinga kwiimikana akucita mulimo wakwe wa bupailishi inshiku shoonse alimwi wakalinga kubenga milambu yomwi ayomwi mankanda aanji. Sombi milambu teyakalinga kucikonsha kukusha shibiibi sha bantu, sobwe.

¹² Sombi Klistu lakwe wakalibengabo linkanda lyomwi ayi abe mulambu wakukusha shibiibi. Mulambu uyu ulicite nkusu lyoonse. Ndyaakamana kulibenga, wakaya mukwikala kululyo lwakwe Lesa.

¹³ Ono uko, ulalindilabo kushikila Lesa akaalule balwani bakwe kuba mpopakulyata myeendo yakwe.

¹⁴ Kwiinda mukulibenga linkanda lyomwi, wakalengesha kwaamba ayi abo mbwaasalasha kuswa kushibiibi shabo, banoosalalitebo cancinencine lyoonse.

¹⁵ Mushimu Usalashi awalo ulapa bukamboni pamakani ngomunya aya. Ulataanguna kwaamba ayi,

¹⁶ “Mwaami Lesa wakaamba ayi ici ncecipangano nceshi nkapange ambabo munshiku shitoosa. Ndaakubika milawo yangu mumyoyo yabo alimwi akwiilemba mumiyeeyo yabo.”

¹⁷ Kuboolaawo, wakaamba alimwi ayi, “Teshi nkayeeyewo shibiibi shabo amicito yabo ibiibi.”

¹⁸ Nkokwaamba ayi Lesa na walekelela bantu shibiibi shabo, takuyandiki mulambu aumwi wakukusha shibiibi.

Tulyeelete kusena pafwaafwi aLesa

¹⁹ Paceebo ceeco nobamakwesu, tulyaangulukite kwinjila muMusena Usalalite Wiindaawo ceebo ca bulowa bwakwe Jesu.

²⁰ Wakatucalwita nshila ipya ya buumi kwiinda mucisani cakalinga kushitilisha, nkokwaamba ayi kwiinda mumubili wakwe mwiine.

²¹ Tulicite Mupailishi Munene weendelesha Ŋanda yakwe Lesa ya kwiculu.

²² Aboobo, atusene pafwaafwi aLesa amyoyo yakutatonsha alimwi alushomo lwancinencine. Atusene kuli nguwe amyoyo yakasalashikwa itacite kampenda alimwi amibili yakasamba mumaanshi atacite matombe.

²³ Atutolelele mukulangila nkotucite uko nkotushimikila, mukwiinga Lesa wakatushomesha, ulashomeka.

²⁴ Katuyeeya bamakwabesu kwaamba ayi tunoocafwana kubonesha lusuno lwancinencine alimwi akucita shibotu.

²⁵ Anu tutacileeki kwishibila kwesu kwakubungana pantu pomwi, mbuli butoocita bamwi. Sombi twiindilisheewo kuyuminishanya, mukwiinga twaboona ayi Bushiku bwakwisa kwa Mwaami Jesu bwasenena.

²⁶ Mukwiinga na twatolelela kunoobisha kashanga, sombi katwishi kale lushinisho, taaku mulambu umwi weenga wapekwa kuli Lesa ceebo ca shibiibi shesu.

²⁷ Sombi cacaala nkunoolindilabo koomboloshekwa kutoosa caboowa alimwi akunoolindila mulilo uloondesha weshi ukanyonyoole balwani bakwe Lesa!

²⁸ Muntu woonse utakonkeli Milawo yakwe Mose, ulacaikwa cakubula nkumbu, na wacanikwa ayi ulicite mulandu kwiinda mubukamboni bwa bantu bobilo nabi botatwe.

²⁹ Ino cilaakuba buyani kumuntu uyo unyansha Mwanaakwe Lesa. Uyo usuula bulowa bwakalengesha cipangano cakwe Lesa ico cakamusalasha kuswa kushibiibi akucobola Mushimu Usalashi utubonesha luse. Amuyeeye mbuli mbweshi ukeendeewo kubica mulandu ngweshi akapekwe muntu uyu!

³⁰ Mukwiinga tulimwishi uyo wakaamba ayi, “Amubaleeke ndime mboosha shishole, ndaakubapa milandu abalo.” Wakaamba alimwi ayi, “Mwaami ulaakoombolosha bantu bakwe.”

³¹ Ncintu ciloondesha abuumbi kulokela mumaansaakwe Lesa muumi!

³² Amuyeeye cakamucitikila munshiku shakeenda. Munshiku isho Lesa ndyaakamumunikilabo, mwakapenshekwa abuumbi, nakubi boobo mwakatolelela cankusu.

³³ Cimwi ciindi mwakalinga kucobolwa alimwi akupenshekwa pameenso abantu. Ciindi cimwi alimwi mwakalinga kupenga pantu pomwi abaabo bakalinga kupenshekwa munshila iyi.

³⁴ Mwakoongumana pantu pomwi abaabo bakalinga bakaili alimwi beendeleshi ndibakamunyaya shintu shanu, mwakalinga kusangaletebo mukwiinga mwakalinga kwishi ayi mulicite shintu shiindaawo kubota alimwi shitamaani.

³⁵ Paceebo ceeco, mutatyongoli mukwiinga na mwatolelela kutaboola pesule, mulaakutambula cilambu cinene.

³⁶ Mulyeelete kukalika myoyo kwaamba ayi mucite kuyanda kwakwe Lesa alimwi akwaamba ayi mukatambule sheesho nshaakashomesha.

³⁷ Kweelana abwaamba Malembo akwe Lesa ayi, “Kwacaalabo ciindi ciniinibo kwaamba ayi uyo weelete kwisa ashike, teshi acelweewo, tau.

³⁸ Bantu bangu abo baluleme balaakunshoma akuba abuumi. Sombi na umwi akaboole pesule, teshi nkakoondwe muli nguwe.”

³⁹ Swebo tatubete bantu beshikuboola kwisule akunyonyoolwa. Sombi tuli baabo bashoma beshi bakapulushikwe.