Bene Ebulu 1 - Baibo Busansulushi Bwa Libuku Ili

Lesa ulaamba kwiinda muMwanaakwe

¹ Kale kale, Lesa wakalinga kwaamba kubamashali besu bakulukulu mankanda aanji alimwi amunshila shipusenepusene, kwiinda mubalaluki bakulukulu.

² Sombi munshiku shino shakweelaako, ulaamba kuli ndiswe kwiinda muMwanaakwe. Muli nguwe Lesa wakalenga cishi alimwi ngonguwe ngwaakasala kuba mwine shintu shoonse.

³ Muli nguwe mulaboneka kumweka kwa bulemu bwakwe Lesa alimwi ncecikoshanyo ciine ca bube bucite Lesa. Ngoolengesha shintu shoonse mucishi ca panshi kuba bweenka mboshibete kwiinda mumaswi akwe a nkusu. Ndyaakamana kulengesha Lesa kulekelela shibiibi sha bantu, wakaya kwiculu mukwikala kululyo lwakwe Lesa Shinkusu shiindaawo.

Shabunene bwa mwanaakwe Lesa

⁴ Mwanaakwe Lesa ngumunene kwiinda baanjelo bweenka mbuli liina Lesa ndyaakamupa mbolibete linene kwiinda lya baanjelo.

⁵ Mukwiinga kuswabo kale kale, taaku munjelo Lesa ngwaakaambilawo kale ayi, “Ndiwe Mwanaangu, sunu ndaba baIso.” Alimwi Lesa taakwe kwaambilawo kale munjelo nabi womwi ayi, “Nebo ndaakuba baIshi alakwe ulaakuba Mwanaangu.”

⁶ Sombi Lesa ndyaakalinga kutuma Mwanaakwe wakwiiya mucishi ca panshi, wakaamba ayi, “Baanjelo bakwe Lesa boonse balyeelete kunoomulambila.”

⁷ Ono shabaanjelo bakwe, Lesa wakaamba ayi, “Lesa ulacita baanjelo bakwe kuba anga ngumuuwo alimwi abasebenshi bakwe kuba anga ngumulilo utoonyaka.”

⁸ Sombi kwalo kuMwanaakwe, Lesa wakaamba ayi, “OLesa, cuuna ca bwaami bwako cilaakunoolikobo lyoonse, alimwi mubweendeleshi bwako muli bululami.

⁹ Ulisuni kucita shiluleme akupata shitaluleme. Nceceeco nebo, neLesa wako, ncendakakusalila akukunanika mafuta abonesha kusangalala kwiinda babyo bamwi boonse.”

¹⁰ Alimwi Lesa wakaamba ayi, “Webo, oMwaami, ndiwe wakalenga cishi ca panshi kumatalikilo, alimwi wakalenga liculu amaansaako.

¹¹ Shoonse ishi shilaakumana, sombi webo ulaakunoolikobo lyoonse. Shoonse shilaakumana ncito bweenka mbuli shakufwala.

¹² Ulaakushifungafunga anga ncakufwala ca peculu. Shilaakuba shiimbi, mbuli muntu wafuula akufwala shakufwala shimwi. Sombi webo unanoolibo bweenka mboobete, alimwi buumi bwako tabweeli.”

¹³ Alimwi Lesa taakwe kwaambilawo kale munjelo wakwe nabi womwi ayi, “Kala kulyaansa lyangu lyalulyo, kushikila nkaalule balwani bako kwaamba ayi babe mpopakulyata myeendo yako.”

¹⁴ Sa te baanjelo bakwe Lesa njimyuuyabo iyo imusebensela akutumwa kubaabo mbweshi akapulushe?