Amosi 9 - Baibo Busansulushi Bwa Libuku Ili

Koombolosha kwa Mwaami Lesa

¹ Ndakabona Mwaami Lesa kaaimfwi pacipaililo. Wakaamba ayi, “Amuume macinko a Ŋanda yakwe Lesa kwaamba ayi cipinda cakumwinjililo coonse citenkaane. Mwaawishile pamitwi ya bantu. Taaku nabi womwi eshi akaloboke, ee, taaku nabi womwi eshi akapuluke.

² Nabi bakakaabe panshi kushika kumusena wa bafu, lyaansa lyangu lilaakubakushaako uko. Nabi bakataante kushika kwiculu, nebo ndaakubaselushaako.

³ Nabi bakayube paKalundu ka Kamelo, ndaakubayandoola kushikila nkabacaate. Nabi bakayube panshi peene palweenge lulaamfu, ndaakwaambila shinshimwe ayi abaluume.

⁴ Nabi balwani babo bakabatole mubusha, ndaakulengesha ayi bakacaikwe kunkondo. Ndishinishite kubanyonyoola kuteshi kubacafwa napaceyi.”

⁵ Mwaami Lesa, Lesa Shinkusu shoonse, na wakumya cishi, ncakwiila cilatenkaana alimwi boonse bekalaamo baloongumana. Cishi coonse cilaakuyalookabo anga ngamaanshi a muMulonga wa Nailo akuboola panshi anga ngamaanshi a mumulonga wine Ijipiti.

⁶ Mwaami Lesa wakayaka ŋanda yakwe ya bwaami kwiculu akubika lwiimbi lwa njiyo pacishi ca panshi. Uleeta maanshi a mulweenge akwaaloshesha pacishi ca panshi. Liina lyakwe nguMwaami Lesa.

⁷ Mwaami Lesa utookwaamba ayi, “Kuli ndime, nobene Isilaeli muli anga mbene Kushi. Bweenka mbondakakusha bene Isilaeli kuIjipiti, mbweeke ubo mbondakakusha bene Filisiti kuKileti alimwi abene Silya kuswa kuKili.

⁸ Nebo, neMwaami Lesa Shinkusu shoonse meenso angu ali pabulelo bushishibiibi bwa bene Isilaeli. Ndaakubunyonyoola kwaamba ayi bulobe pacishi ca panshi. Sombi teshi nkanyonyoole cakumaninina bamulunyungu lwakwe Jakobo. Nebo neMwaami Lesa ndaamba.

⁹ “Ncakwiila ndaakupa mulasho akuseba bene Isilaeli anga mbusu musefa. Ndaakubaseba pakati ka mishobo yoonse akukushaamo baabo bateelete.

¹⁰ Bamucita shibi boonse pabantu bangu balaakucaikwa kunkondo, ncakwiila boonse abo baamba ayi, ‘Mapensho teshi akatusene pafwaafwi nabi kutucana.’ ”

Bene Isilaeli mbweshi bakabooshelwe bulemu alimwi

¹¹ Mwaami Lesa waamba ayi, “Bushiku bulaakushika ndyeshi nkabooshe bulemu kubulelo bwakwe Defedi. Bulelo ubo bwababo anga niŋanda yawa akunyonyooka. Ndaakuyakulula lubumbu akuboosha bulemu bwa njiyo. Ndaakwiiyakulula akwiibamba bweenka mboyakalinga pakataanshi.

¹² Munshila iyo bene Isilaeli balaakukoma baabo beshi bakacaaleewo pabene Edomu alimwi amishobo imwi yoonse yakalinga yangu. Nebo neMwaami Lesa ndaamba alimwi ici ndaakucicita cancinencine.”

¹³ Mwaami Lesa wakaamba alimwi ayi, “Nshiku shilaakushika, shikutebula ndyeshi akacanikwe kushikulima, alakwe shikushanga ndyeshi akacanikwe kushikutyana minyansa. Waini upya ulaakunoolokeela kuswa mutulundu akukunka kuswa mutulundu.

¹⁴ Ndaakuboosha bantu bangu bene Isilaeli abo bakatolwa busha. Balaakuyakulula mandabala oonse akanyonyoolwa akwikala muli ngawo. Balaakulima myuunda ya minyansa akunwa waini weshi ukanooswa muli njiyo. Ncakwiila balaakunoolima myuunda ya shisepo akulya shisepo sha njiyo beene.

¹⁵ Ndaakushanga bene Isilaeli mucishi ncendakabapa. Ncakwiila taaku weshi akabatumunemo tubili. Nebo neMwaami Lesa, Lesa wanu ndaamba.”