Amosi 8 - Baibo Busansulushi Bwa Libuku Ili

Cili anga nciloto ca mutaanga uswite shisepo

¹ Mbulya Mwaami Lesa Shinkusu shoonse mbwaakambonesha mucili anga nciloto. Muli ncico ndakabona mutaanga kooswite shisepo shipite.

² Mwaami Lesa wakanjipusha ayi, “Amosi, wabonanshi?” Ndakakumbula ayi, “Ndabona mutaanga uswite shisepo shipite.” Mpeeke Mwaami Lesa wakandwiita ayi, “Ciindi cashikila cakwaamba ayi bantu bangu bene Isilaeli bakapekwe mulandu. Nebo teshi nkabooshemo moyo alimwi pashakubapa mulandu.

³ Pabushiku ubo kwiimba kulaakuba kulila muŊanda yakwe Lesa. Mituntu ilaakubabo pali poonse. Ilaakusowekwa cakutayobeka. Nebo neMwaami Lesa Shinkusu shoonse ndaamba.”

Kunyonyoolwa kwa bene Isilaeli

⁴ Amosi wakaamba ayi, “Amunyumfwe mwebo nomulyatilila bapengete akunyonyoola bakandu mucishi cabo.

⁵ Mwebo mulaamba ayi, ‘Kusekelela kwa Mweenshi Upya kulaakumana lili kwaamba ayi tukoolishe shili anga ngamaila shesu? Anu bushiku bwakookesha bwa Cibelu bulaakumana lili kwaamba ayi tukoolishe witi? Lyalo tukatantike mweelo akusebensesha shipimo shakubeca ee, tukanyengelele bantu mukusebensesha shipimo shitaluleme.

⁶ Kuswawaawo tukoole busha bakandu amaali a silifa. Ee, tukoole bapengete mukushintabo ankwabilo. Ncakwiila tulaakuulisha amukuka woonse wa witi pamweelo wapeculu.’ ”

⁷ Mwaami Lesa, Lesa wa bene Isilaeli washomesha cakulumbila ayi, “Taaku nabi comwi ncebakacita nceshi nkalubeeko.

⁸ “Cishi cilaakuntenkaana ceebo ca mulandu uyu. Abalo bantu boonse bekalaamo balaakulila. Cishi coonse cilaakuyalookabo anga ngamaanshi a muMulonga wa Nailo. Ncakwiila cilaakuyalooka akuboola panshi anga ngamaanshi a mumulonga wine Ijipiti.

⁹ Pabushiku ubo ndaakulengesha lisuba kutabala lyakuba pakati ka mutwi akulengesha kuba munshinshe kalicilibo malumwi. Nebo neMwaami Lesa Shinkusu shoonse ndaamba.

¹⁰ Ndaakusandula nshiku shanu shakusekelela kuba shakulila. Ndaakusandula kwiimba kwanu kuba kulila. Ndaakulengesha ayi mukafwale masaka akucesa munkunyu mumitwi yanu. Kulila kwanu kulaakuba anga nkulila kwa bashali ba mwaana womwibo. Meelelesho a nkuko alaakuba anga mbushiku bwa mapensho.”

¹¹ Mwaami Lesa Shinkusu shoonse waamba ayi, “Nshiiku shitoosa ndyeshi nkatume nsala mucishi cino. Teshi nsala ya shakulya nabi nyotwa ya maanshi, sombi ninsala yakubula maswi a Mwaami Lesa.

¹² Bantu balaakunooya citalantanta kuswa kulweenge kuya kulweenge. Balaakwiingooka kuswa kumatwa kuya kwicwe kuya ciyandoola maswi a Mwaami Lesa. Sombi teshi bakaacaneewo, sobwe.

¹³ “Pabushiku bweenka ubo bamyooye babotu abacikula bwangu basankwa bayumu, balaakunoowisooka ceebo ca nyotwa.

¹⁴ Boonse bashomesha cakulumbila kushibumbwabumbwa shine Samaliya, nabi baamba ayi, ‘Bweenka mbocibete lushinisho ayi lesa wako ondabala ya Dani ngumuumi,’ nabi ayi, ‘Bweenka mbocibete lushinisho ayi lesa wa kuBiyasheba ngumuumi,’ balaakuwa cakutabukaawo, sobwe.”