Amosi 7 - Baibo Busansulushi Bwa Libuku Ili

Cili anga nciloto ca cisoshi

¹ Mbulya Mwaami Lesa Shinkusu shoonse mbwaakambonesha mucili anga nciloto. Wakalenga cisoshi paciindi cipansha ca bwiisu ca mwaami ndicakamana kucesekwa alimwi bwiisu ndibwakatalika kusonsa alimwi.

² Muciloto cangu ndakabona cisoshi kacilya shishango shoonse pacishi ca panshi. Lyalo nebo ndakoolobesha ayi, “NoBaami baLesa Beshinkusu shoonse, amulekelele bantu banu! Ino inga bapuluka buyani? Ncakwiila mbaniini alimwi tabacite nkusu!”

³ Kuswawaawo Mwaami Lesa wakabooshamo moyo akwaamba ayi, “Isho nshewabona teshi shikacitike.”

Cili anga nciloto ca mulilo

⁴ Mbulya Mwaami Lesa Shinkusu shoonse mbwaakambonesha mucili anga nciloto. Muciloto ico ndakamubona kaayeeya kupensha bantu bakwe amulilo. Mulilo uyo wakayumya lweenge lunene panshi lya nshi alimwi akutalika kutenta cishi coonse.

⁵ Lyalo nebo ndakoolobesha ayi, “NoBaami baLesa Beshinkusu shoonse, amucileeke! Ino bantu banu inga bapuluka buyani? Ncakwiila mbaniini alimwi tabacite nkusu!”

⁶ Paceebo ceeco Mwaami Lesa wakabooshamo moyo waamba ayi, “Anu acalo ici teshi cicitike.”

Cili anga nciloto ca ntambo yakuyakisha

⁷ Mbulya Mwaami Lesa mbwaakambonesha mucili anga nciloto. Muli ncico ndakamubona kaaimfwi kufwaafwi alubumbu ulo lwakayakwa mukusebensesha ntambo. Wakalinga kucite antaambo yakuyakisha mulyaansa lyakwe.

⁸ Lyalo Mwaami Lesa wakanjipusha ayi, “Amosi, wabonanshi?” Nebo ndakakumbula ayi, “Ndabona ntambo yakuyakisha.” Mpeeke wakaamba ayi, “Ntoosebensesha ntambo iyi kubonesha bantu bangu ayi bali anga ndubumbu lusendeme. Nebo teshi nkabooshemo moyo alimwi pashakubapa mulandu.

⁹ Misena bamulunyungu lwakwe Isaki njebakalinga kulambililaako ilaakunyonyoolwa. Misena isalalite ya bene Isilaeli, ilaakuba matongo. Ndaakulengesha bulelo bwa mwaami Jeloboamu kumana kunkondo.”

Amosi Aamasiya

¹⁰ Amasiya mupailishi wa kuBetelo wakalalukila Jeloboamu mwaami wa bene Isilaeli ayi, “Amosi utoopinga kumubukila pakati ka bantu boonse. Nshaatokwaamba shitoonyonyoola cishi ici coonse.

¹¹ Amosi utokwaamba ayi, ‘Jeloboamu ulaakufwa munkondo. Abalo bene Isilaeli balaakutolwa busha kuswa mucishi cinebo.’ ”

¹² Lyalo Amasiya wakaambila Amosi ayi, “Swaamo muno webo omulaluki! Boolela kucishi ca Juda. Koya ukanoolalukila nkuko akunoolicanina shakulya nkomunya uko.

¹³ Utakalalukili tubili kuno kuBetelo mukwiinga ngumusena umo mwaami mwaalambilila alimwi niŊanda yakwe Lesa ya cishi cino.”

¹⁴ Amosi wakakumbula ayi, “Nebo nshiishi mulaluki uyo ucana shakulya mukulaluka. Nebo ndakalinga mweembeshi alimwi ndakalinga kulima shisamu sha nkuyu.

¹⁵ Sombi Mwaami Lesa wakankusha kumulimo wangu wa bweembeshi akundwiita ayi, ‘Koya ukalalukile bantu bangu bene Isilaeli.’

¹⁶ Ono bulya kutika Mwaami Lesa mbwaatokwaamba. Webo waamba ayi, ‘Utanoolalukila bene Isilaeli, ee, ayi cileke kushimikila bamulunyungu lwakwe Isaki.’

¹⁷ “Paceebo ceeco pali ndiwe Mwaami Lesa waamba ayi, ‘Mukaako ulaakuba mufuule mundabala inene. Abalo bana bako basankwa abanakashi balaakufwa kunkondo. Cishi cako cilaakutimboolwa akubaanishikwa alimwi webo ulaakufwita mucishi ca bakunsengwe. Ncakwiila bene Isilaeli boonse balaakutolwa busha kuswa mucishi cabo kuya mucishi citeshi cinebo.’ ”