Amosi 6 - Baibo Busansulushi Bwa Libuku Ili

Bene Isilaeli mbobakanyonyoolwa

¹ Mapensho kuli ndimwe nomushiite kwakubula cakulisukama muSiyoni, alimwi amwebo nomushiite muluumuno paKalundu ka Samaliya, nobacinenenene ba mushobo unene wa bene Isilaeli, uko bantu nkobacicila mukusenga lucafwo.

² Kamuya kundabala ya Kalune mukeeboone. Kuswa kooko, muye kundabala inene ya Amati. Lyalo muye kundabala ya Gati mucishi ca Filisiti. Sa bulelo bwanu buleenda kubotu pamalelo abo? Sa cishi cabo cakalinga cinene kwiinda cishi canu?

³ Mwebo mulakaka ayi bushiku bwa mapensho bulaakwisa. Sombi nshemucita shilalengeshabo bushiku ubo kwisa cakufwambaana.

⁴ Muloona pamalo akaboteshekwa ameeca a nsofu. Mulekala pashuuna shibotu abuumbi. Mulalya nyama ibotu ya bana bambelele aya boombe bakeenishikwa.

⁵ Mulisunibo kulisha nyimbo patulumbu bweenka bwakalinga kucita Defedi. Ncakwiila mulisunishi shakulishalisha akupanga nyimbo.

⁶ Mwebo mulanwa mbale shiinji sha waini akunana mafuta eendaawo kubota. Sombi tamuungumani pakunyonyooka kwa cishi ca Isilaeli.

⁷ Ncakwiila mwebo mulaakuba pakati ka baabo beshi bakataangune kuya mubusha. Lyalo kusekelela akwikala pashuuna shibotu kulaakumana.

⁸ Mwaami Lesa Shinkusu shoonse washomesha cakulumbila ayi, “Ndipatite kulisumpula kwa bene Isilaeli, Maandaabo abo abotu anene ndyaacimitwe. Ncakwiila ndaakwaaba ndabala yabo inene pantu pomwi ashintu shoonse shiliimo mumaansa a balwani babo.”

⁹ Na basankwa likumi bacaala muŋanda abalo balaakufwa.

¹⁰ Na shikamukowa weelete kutenta mituntu yabo akese mukwiikushaamo akwiipusha uyo eshi akacaale muŋanda ayi, “Sa kuli ngomuli akwe aumwi muno?” Alakwe akakumbule ayi, “Taamuuwo.” Lyalo ulaakwaamba ayi, “Ashii! Tuteeleshi napaceyi kubanda liina lya Mwaami Lesa.”

¹¹ Ceebo Mwaami Lesa wakashomesha kale. Ndushinisho ulaakupwayoola ŋanda inene mutupanshapansha ayalo ŋanda iniini ulaakwiilengesha kuba matongo.

¹² Sa maaki alacica patulundu twa myaandami? Sa muntu inga walima aŋombe palweenge? Sombi mwebo mwasandula koombolosha kwakutanyengelela kuba shikola akusandula shabululami kuba kulula kwiine kwiine.

¹³ Mwebo mulalilumbaisha pakukoma ndabala ya Lo Deba akwaamba ayi, “Sa te twakakoma ndabala ya Kanaimu munkusu shesu sobeene?”

¹⁴ Mwaami Lesa Shinkusu shoonse waamba ayi, “Nobene Isilaeli, ndaakumusonkomweta mushobo umwi wa bantu kwisa mukumulwana. Bantu abo balaakumupensha nshila yoonse kuswa kumwinjililo wa Amati kuya mukushika kuKalonga ka Alaba.”