Amosi 5 - Baibo Busansulushi Bwa Libuku Ili

Bene Isilaeli mbobakasengwa kusanduka kuswa kushibiibi shabo

¹ Nobene Isilaeli amunyumfwe lwiimbo lwangu lwakulila pali ndimwe.

² “Cishi ca Isilaeli cawa. Teshi cikabukeewo alimwi. Ncakwiila cacaalabo cisuukila, kwakubula aucibusha, sobwe.”

³ Mwaami Lesa Shinkusu shoonse waamba ayi, “Ndabala ine Isilaeli iyo ituma bashilumamba bali cuulu kunkondo, palaakuboolabo mwaanda womwi. Ndabala imwi iyo ituma bashilumamba bali mwaanda kunkondo, palaakuboolabo likumi lyomwi.”

⁴ Mwaami Lesa waamba kubene Isilaeli ayi, “Amunangoole, lyalo mulaakuba abuumi.

⁵ Mutanoolangoola ndabala ya Betelo. Mutayi kundabala ya Gilugala. Mutayi lweendo kundabala ya Biyasheba mukwiinga ndabala ya Gilugala ilaakucatwa busha ayalo ndabala ya Betelo ilaakubabo matongo.”

⁶ Amuyandoole Mwaami Lesa, lyalo mulaakuba abuumi. Nobene Isilaeli na mubule kucita boobo, ulaakumulobya anga ngumulilo utenta masakasaka kukubilima. Ndabala ya Betelo ilaakupya cakumaninina alimwi taaku aweshi akeeshimyeeko.

⁷ Mwamana katyenke mwebo nomoombolosha cakunyengelela, ee, mwebo nomoombolosha kuteshi mubululami.

⁸ Mwaami Lesa ngowakalenga nyenyeenshi shiitwa ayi Puleiyadesi alimwi aOlyoni. Ulasandula mashiku kuba malumwi alimwi ulasandula malumwi kuba mashiku. Uleeta maanshi a mulweenge akwaaloshesha pacishi ca panshi. Liina lyakwe nguMwaami Lesa.

⁹ Lakwe ulaleta kunyonyoola pabeshinkusu anga nkalumba akulengesha ndabala icite malinga kunyonyoolwa.

¹⁰ Mulipatite bantu bapikisha koombolosha kwakunyengelela akusebaanya wooyo waamba shalushinisho munkuta.

¹¹ Mulalyatilila bakandu akubakakatisha ayi bamupe shili anga ngamaila. Nabi mwakayaka maanda a mabwe abotu abuumbi, teshi mukekaleemo. Nabi mwakalima myuunda ibotu ya minyansa, teshi mukanwewo waini ushi ukaswe kuli njiyo.

¹² Mukwiinga nebo ndishi milandu yanu njemucite alimwi ndishi shibiibi shanu mboshibete kukomena. Mulalyatilila baluleme akutambula makulo akunyengelela bakandu nabi kabaluleme munkuta.

¹³ Paceebo ceeco muntu ucite maano uloomunabo muciindi ca mushobo uyo mukwiinga nciindi nca bubi.

¹⁴ Kamuyandoola shibotu kuteshi shibiibi kwaamba ayi mwikale ciindi cilaamfu. Lyalo Mwaami Lesa Shinkusu shoonse ulaakunooli amwebo bweenka mbomwaamba lyoonse ayi tuli akwe.

¹⁵ Amupate bubi akusuna shintu shibotu. Kamoombolosha cakutanyengelela munkuta. Mpashi Mwaami Lesa Shinkusu shoonse ulaakunyumfwa nkumbu pabene Isilaeli bakacaala.

¹⁶ Mwaami Lesa Shinkusu shoonse waamba ayi, “Mulaakuba kulila mumikwakwa yoonse akulila cakupenga mumisena mucanika bantu baanji. Balimi balaakwiitikwa ayi balilile pantu pomwi abaabo balipilwa maali.

¹⁷ Mumyuunda ya minyansa moonse mulaakuba kulila mukwiinga ndaakwisa mukumupa mulandu. Nebo neMwaami Lesa ndaamba.”

Bushiku bwa Mwaami Lesa

¹⁸ Mapensho kuli ndimwe nomutookumbwa kubona bushiku bwa Mwaami Lesa. Ceebonshi mulakumbwa kubona bushiku ubo? Bushiku ubo bulaakuba bwa munshinshe, kuteshi bwa mumuni.

¹⁹ Cilaakuba anga ngumuntu utoocica nkalamu, nakubi boobo wakumana abeya. Ono ayi enjile muŋanda yakwe akuyaamina kulubumbu, walumwa nsoka.

²⁰ Bushiku bwa Mwaami Lesa bulaakuba bwa munshinshe, buteshi bwa mumuni nauceyi. Kulaakuboolabo mbi kutabonaawo mumuni, sobwe.

²¹ Mwaami Lesa waamba ayi, “Nebo ndipatite kulambila kwanu pakusekelela. Mabungano anu nshaasuni napaceyi.

²² Nabi mukandetele milambu yakutenta, kubikaawo ashipo shanu sha fulaulo, teshi nkashitambuleewo. Nabi mukandetele milambu ya bwanabwankashi ili buyani, teshi nkeetambuleewo, sobwe.

²³ Mwanjobekela anyiimbo shanu! Teshi nkakutikeewo mukumo wa tulumbu twanu!

²⁴ Sombi koombolosha kwakutanyengelela kwanu akube anga nkalonga katookunka. Akwalo kululama kwanu kube anga ngumulonga utookunka cakubula kuyuma.

²⁵ “Nobene Isilaeli, sa mwakalinga kumbengelawo milambu mumyaaka makumi one njomwakekala muluyanga?

²⁶ Ono ceebo cakwaamba ayi mwasumpula Sakuti lesa wakubumba uyo ngomwiita ayi mwaami, aKaiwanu lesa ngomwakabumba anga ninyenyeenshi, mulaanooyumuna shibumbwabumbwa isho shobilo

²⁷ ndaakumutola mubusha mucishi cili kwiindilila ndabala ya Damasikasi. Nebo neMwaami Lesa Shikunsu shoonse ndaamba.”