Amosi 4 - Baibo Busansulushi Bwa Libuku Ili

¹ Amukutike maswi aya mwebo nobanakashi bekala muSamaliya, ee, mwebo nomutokwiinabo anga nimpwishi sha kuBashani. Amukutike mwebo nomupensha bakandu akulyatilila bantu bataaku mbobabete. Amukutike mwebo nomwishi kunokwaambilabo bameebaanu ayi, “Amutuletelewo twakunwa tutontoshewo panshingo!”

² Mwaami Lesa Shinkusu shoonse, utoolumbila mukusalala kwakwe ayi, “Ncakwiila ciindi cilaakushikila ndyeshi mukatolwe busha kamukobetwe ndobo. Ee, womwi awomwi ulaakunooya cikwelaanishikwa kundobo tibili akuwakweelaako.

³ Mulaakukwelelwa kucipense ca lubumbu ceshi cikanooli pafwaafwi akusowelwa pansengwe kulubasu lulangene aAlimoni. Nebo neMwaami Lesa ndaamba.”

Bushicimpamya bwa bene Isilaeli

⁴ Mwaami Lesa Shinkusu shoonse waamba ayi, “Ono kamuyabo kuBetelo mukubisha, muye kuGilugala akuya mukwiindaawo kubisha. Ee, kamutola milambu yanu macuunsa lyoonse akutola shalikumi shanu na nshiku shotatwe sheenda.

⁵ Kamutenta cimaande ayi ncipo cakulumba akulilumbaisha pashipo shanu shakulyaaba. Kamulisumpulabo pali nshisho nobene Isilaeli mukwiinga mwebo isho nsheshintu nshemusuni kucita. Nebo neMwaami Lesa Shinkusu shoonse ndaamba.”

⁶ “Ndime ndakaleta nsala mundabala inene yomwi ayomwi, ee, ndime ndakalengesha ndabala yomwi ayomwi kubula cakulya. Sombi mwebo tamukwe kusandukilawo kuli ndime.

⁷ Ndakamucatila amfuula kakucili myeenshi yotatwe ayi kutebula kushikile. Ndime ndakalengesha mfula kuloka mundabala yomwi, sombi kuteshi mundabala imwi. Ndakeelengesha kuloka mumuunda womwi, sombi kuteshi mumuunda umwi, aboobo mwakayumabo nta!

⁸ Bantu bakalinga kuya citalantanta kuswa kundabala yomwi tibili akuimwi kuya ciyandoola maanshi akunwa. Nakubi boobo tabakwe kucanaako maanshi akwana kunwa. Sombi mwebo tamukwe kusandukilawo kuli ndime. Nebo neMwaami Lesa ndaamba.”

⁹ “Kwashiindi shiinji mumyuunda yanu imwi aya minyansa ndakeeletela muuwo ulungula akuyumya shishango. Cisoshi cakalya shisamu shanu sha nkuyu asha maolifi. Sombi mwebo tamukwe kusandukilawo kuli ndime. Nebo neMwaami Lesa ndaamba.

¹⁰ “Ndakatuma myaalu pakati kanu bweenka mbondakatumina bene Ijipiti. Ndakacaya bacikula bwangu banu basankwa kunkondo pantu pomwi amaaki ayo ngomwakasaala. Ndakalengesha keema kabiibi ka mituntu mumisumba yanu. Sombi mwebo tamukwe kusandukilawo kuli ndime. Nebo neMwaami Lesa ndaamba.

¹¹ “Ndakanyonyoola bamwi pakati kanu bweenka mbondakanyonyoola bene Sodoma abene Gomola. Mwakalingabo anga ndukuni lwayokolwa mumulilo. Sombi mwebo tamukwe kusandukilawo kuli ndime. Nebo neMwaami Lesa ndaamba.

¹² “Ono bulya nobene Isilaeli, ntoomupa mulandu. Ono mukwiinga ntoocita boobo kuli ndimwe, amulibambile koomboloshekwa andime neLesa wanu.”

¹³ Lesa ngowakalenga tulundu, ngowakalenga muuwo, alimwi ngooyubulula miyeeyo yakwe kumuntu. Ulasandula malumwi kuba munshinshe alimwi uleendeenda patulundu twa mucishi ca panshi. Liina lyakwe nguMwaami Lesa Shinkusu shoonse.